唔知大家仲記唔記得有隻翠如bb股叫聯旺集團（08217），呢隻股在6月27 日的細價股閃崩潮中，股價一日重挫89.4%，之後就散咗。
我都忘記咗呢隻股，但係早兩日有個好日都唔見的朋友仔WhatsApp我，話聯旺一日反彈咗40%，問我點睇？
我打開聯旺的股價圖，發現佢有3毫幾升到4毫幾，心諗都佢已經跌到咁低，升少少又有幾巴閉？又可以點睇呢？
講起呢個朋友仔有段古，聯旺呢隻邪股去年上市之後係咁升，之後略回，去到10月一度回落到11元多的水平，呢個朋友仔就WhatsApp我，問我好唔好買? 我明知隻野係炒股，答呢啲問題真係兩難題，叫人唔買，亦估到隻股短期內好可能會繼續升，就阻人發達。同意佢買，呢啲邪股完全冇基本因素，炒到市值百幾億追得上TVB(0511) ，都係一個殺人局，唔係幾忍心見佢撲入去慘死，所以就提醒佢，炒呢啲炒股要小心。
聯旺一年圖
結果真係阻咗人發達，隻股跌少少就開始急彈，好快上返13元、14元，朋友仔後來就係呢啲水平高追咗。後來聯旺喪升到26 元，聞說朋友仔都無沽，仲起高位20多元再追，仲好開心咁話俾我聽，你話我可以點回應呢？呢個世界「阻人發達如殺人父母」，講多兩句畀人鬧，我盡咗做朋友嘅責任，提醒咗就算。
後來隻股在6月勁插，睇番可能係因為6月27日13隻跌幅超過50%的股票中，它們的投資者持倉名單上，好多都有貝格隆證券，所持的倉位大多位居前列，相信係因為同一個炒作系列的股票遭遇洗倉式拋售，同系股份又可能交叉持股，觸發相關公司股價暴挫，一死咗就好難救得番啦。
我估朋友仔都用咗10幾20萬元去買聯旺，如果平均價20元買，用咗20萬元，而家聯旺股價得番0.45元，即係得返4500元 ，反彈四成都係多緊千幾蚊，真係喊都無謂。
我唔係話唔可以炒作，但係做「投機的我」，一定要知道自己做乜，要好貼市，轉身好快，一唔掂就走。但好似隻聯旺咁一日跌九成，即是你定咗10%作為止蝕位，都走唔到，所以炒莊家股，就要預咗total loss之時。
呢個朋友仔如今好似「見咗棺材都唔識得流眼淚」，仲對着聯旺好有期望咁款，望佢翻身，我真係唔知點講好啦。教人發達唔易，教人唔輸身家，其實一樣咁難。
陸羽仁
** 博客文章文責自負,不代表本公司立場 **
近日大市有好轉趨勢，部份之前的狂插股低位反彈，當然彈得比較喪的是商湯(0020)，商湯大炒人工智能(AI)概念，股價從低位彈升超過一倍，不過呢種上落幅度，心血少啲都頂唔順，若講相對穩健少少的，可留意比亞迪(1211)及新入場搞汽車的小米(1810)。
比亞迪毫無疑問是新能源車王者，不但車型全方位覆蓋，連電池在內主要零件都是垂直整合，競爭條件極強，有望是長線新能源車王者。不過無論基本因素幾好都好，由於股神巴菲特不斷減持，所以股價表現較差。至於業績方面，首季營業額1,250億元人民幣，按年升4%，季度純利45.7億元人民幣，按年增長10.6%，而汽車每輛利潤6700元人民幣，比起2023年第四季的8500元低，主要因價格競爭加劇和密集的研發投資。
投資銀行富瑞估計，比亞迪的每車利潤會受壓，但因為高端品牌的銷量增加和更好的產品組合，連同出口銷量，其將會在次季至第四季度連續改善。該行維持其「買入」評級，將其H股目標價上調26%至268港元。
睇返比亞迪股價，確實從低位反彈，今年低見167.8元，現在沿著一條比較靚的上升軌向上，按走勢有機會上望232元，而回吐就216元係支持位。
比亞迪一年圖。
至於小米(1810)，本業是做手機，早前公布首季業績，營業額跌3.2%至2710億元人民幣，首季經調整淨利潤升1.26倍至192.7億元人民幣，均勝市場預期，毛利率升至21.2%創新高。上季收入亦恢復雙位數增長，績後獲大行普遍唱好，其中麥格理更將目標價升至27.74元，睇得最好。
不過小米的手機業務面臨華為手機回歸的強勢挑戰，反而其汽車業務就相當亮眼，3 月28日發布其電動車SU 7後，市場反應熱烈，最近公布，至4月30日，已交付7058輛SU 7汽車，及收到88063份訂單。
小米賣車成功也令股價反覆衝上高位，去年低位是9.86元，近日已創出高位17.88元，看走勢小米有機會上衝20元，若回吐17元是首個支持位。高盛早前對小米電動車估值是190億元人民幣，給予10%折讓率。一百多億估值，我就覺得有點低估，若小米現在分拆，市值該不止400億元。
小米1年圖。
小米與比亞迪最大的不同，是比亞迪有股神巴菲特沽貨風險，而小米則只有一種車型，這是弱點也是優點，主要炒概念，空間大一點。
無論如何，若大市現在是周期升市，升完就回落，這些股份也回隨大市回落，但若大市結構性轉好，這些股份就有機會反覆炒高。
(陸羽仁《金融High Tea》專欄，逢周一至五，在「石榴台」獨家發布，歡迎您訂閲石榴台收睇)
