大市反覆向下碌,連27000點都碌穿埋,在中美貿易戰加美元狂升的情況下,再加上港元資金流失,金管局似乎要不斷入市,對股市壓力不小。中美恢佈本月下旬重開副部長級貿易談判,但級別不高控制了大家的預期。
朋友K是退休人士,除了有部份股份長揸之外,喜歡經常買買賣賣,現在大市不好,早前見跌市入了成手貨,現在想炒短線都無乜資金,他問我有何嘢可炒,我反問他是否睇好後市,他說其實不太睇好。
我說,我都識一些股壇老雀,市升市跌都有得炒。市旺時好多有水老人家,買入大股,坐一兩天,等幾個價位,賺兩三巴仙就走,扣埋使費有2%就夠; 市旺時可這樣做,衰左就死坐貨,希望下一個升浪來臨時上返去先走貨。
但遇上跌市,呢招就唔得,好易套牢。若用這方法調轉玩,就是向下炒,意思是若閣下持有100萬元的貨,就拿10萬、20萬來向下炒,例如持有騰訊(0700),星期四收325.8元,跌3 %,若不太看好後市,騰訊跌得多或會反彈,可待股價反彈、例如上升約20元,升至345.8元,就把股份沽出,搏彈完再回落,再插時才買返。又或者唔睇價位等時機,比如等中美貿易談判真正開始,市場大炒反彈時,先至去沽。這不是睇好或睇淡騰訊的分析,而是借騰訊來講向下炒的例子。
股價若向上彈20元,即6.2%,扣手續費,沽完要等跌穿325元先好再買,因為若大市或個股向下行,會一浪低於一浪,這種做法就是向下炒。
朋友K問我,若咁黑仔睇錯市,整體大市調頭向上,咁咪蝕咗? 我話當然係,如果你睇好,就什麼也不要做,但如果麻麻地睇好,攞一兩成持股出來沽吓,這兩成炒作的股份沽出可能追不回,不過手上仍有八、九成貨,所以也無所謂。反過來講,若大市繼續反覆向下,拿一、兩成出來向下炒作,過過手癮,賺一點茶錢。
這方法在跌市時,不用加注,也可以玩短炒,這種策略固然要手上持貨較多,得閒無嘢做,可以玩吓,但若不熟悉短炒,就唔好玩了。
陸羽仁
** 博客文章文責自負,不代表本公司立場 **