人哥收外國水唔爭氣

佔中行動持續兩周以上，人民日報海外版曾指佔中為「動亂」，國務院副總理汪洋今日就直指佔中是顏色革命，他訪問俄羅斯時話，西方支持反對派試圖在香港製造顏色革命，在這一形勢下，中國與俄羅斯應該更加團結，鞏固戰略合作，認為這是對西方最有力的回應。阿爺對佔中語氣愈來愈重。

以前泛民遇到這些批評，老例唔認，話人屈佢。但呢排爆料爆到過巷，今日又有「旺角腦場起底組」發電郵到報館，大爆李卓人內幕，話由人哥擔任秘書長的職工盟，由1994年起，每年都向美國國家民主基金會（NED）旗下的美國國際勞工團結中心申請捐贈，累計收取超過1300萬元，認真唔係少數目。爆料者質疑職工盟有否依足法例，就有關資助向稅局報稅。

美國出晒名在不同地區搞顏色革命，職工盟收美國組織這麼多錢，受人錢財替人消災，如今佔中搞到收唔到科，真係想唔認收錢搞顏色革命都唔得。Ariel真係唔係幾明，近10年政府大把錢俾工會搞再培訓，包括職工盟在內的各大工會搞呢啲課程都賺到笑，職工盟使唔使咁唔爭氣，真接收美國佬錢，搞到咁鬼肉酸? 而且按泛民邏輯，乜都話有利益衝突，佢地收美國佬錢後，鬧大陸之時，點解又無先作利益申報?

呢個爆料者揭露其中一些職工盟中人和其他組織通的電郵，講到稅局和廉署查緊李卓人，要改一改貸款的帳目。表面睇呢啲行為已有妨礙司法公正之嫌，真係睇落都覺得好得人驚喎。

Ariel

** 博客文章文責自負,不代表本公司立場 **

CY接受無綫訪問回應了清場的問題，Ariel覺得可能係令人想到佢開始要為清場打底，讓公眾有心理準備。

 

剛好，海外媒體《明鏡郵報》爆料，引述北京政界人士，指中央專門應對香港佔中的特別小組，要求在本月20號，即係中共十八屆四中全會召開前，結束佔中，否則港府應採取強硬措施，但就唔係用暴力及流血措施，而係採取法律手段。

 

報道指中央對佔中遲遲未收場，開始失去耐心，針對香港佔中運動，北京成立咗一個特別小組，由中央港澳工作協調小組組長張德江領導，負責搜集情報，向政治局提供報告及執行政治局常委的決議，又話政治局常委已開過兩次會，討論佔中。報道又引述政界人士透露，特別小組最近的會議中提出時間表，要求佔中活動在20號結束。

 

呢類放料無從求證，但結束時限，睇起上來都好像真，有關方面都有可能開始放定風，等大家開始心中有數喇。