近日港股跟外圍下跌，恒指守住25300點這個位未肯跌穿，未到一年低位24540點。內地上證綜指已去到2483點，跌近2449點的年度低位。
早前話內房股2019年政策上可能有起色，之後山東菏澤取消新房限購，未被中央禁止。
在這個典型的三四線城市行出第一步之後，廣州、珠海緊隨其後，幾乎同時傳出局部鬆綁的消息，阿爺亦未出面阻止。隨後開的中央政治局會議，不再將調控樓價作分項列出。而住建部在部署明年工作時表示，「房住不炒」政策不會改變，但將「差別化調控」的表述」改為了「分類指導」。
我早前建議留意萬科(2202)，話萬科從低位反彈了32%，弱股好難有此反彈幅度。它經過這一輪反彈後，未來再試一個小高位29元多之後，應會回吐，可以等股價回落時分三注入，至26元附近買一注，25元再買一注，24元買最後一注，希望博到萬科從拾升軌。
圖:萬科半年圖。
近日萬科真的見29元就回落，已到了26元的水平，周四(27日)就是收26元。朋友A聽從我的建議，26元買了第一注，但係見到外圍股市風高浪急，話有啲驚。我話對萬科及內地樓市的睇法未變，內地樓市政策有小鬆動，不會大放開，但內房已見了政策底，照計不會再穿底，但外圍股市難估一點，若外圍大跌，自然會拖低萬科。
之前建議分26、25、24元3注入，入齊平均價25元，都有一定的防守性。萬科的50天線26.1元，100天線25.5元，照計不跌穿100天線好啲，若然跌穿真是會試25、24元這些低位。在跌市買股，會愈買愈跌，有啲得人驚。但分注的好處就係唔使一注買晒，可以等佢再跌再買，個心會定啲。結論係可以按原定計劃，到位照買。
後記：近日油價大跌，中海油(0883)雖然未到早前講的止蝕位11.2元，但有機會到，若短炒到位要執行止蝕。
陸羽仁
** 博客文章文責自負,不代表本公司立場 **
最近有朋友發短訊問我隻禾賽科技(2525)仲有無得升，佢舊年11月底睇完我個專欄話可以趁低吸納禾賽，朋友一睇完就落手，在147元買咗，估唔到一買完過兩日就一直升，而家仲升番上213元的水平，個幾月升咗45%，佢問我好唔好沽。
禾賽上市至今股價圖。
禾賽主要做激光雷達，產品用於高級駕駛輔助系統、自動駕駛系統及機器人身上，是內地激光雷達市場的龍頭大哥。佢公布去年第三季業績都相當唔錯，純利2.6億元人民幣，創單季新高。但當時禾賽股價相當唔得，去年9月上市時招股定價212.8元，但11月一度跌到116.3元低位，比招股價差不多跌咗100元。
陸羽仁當時覺得禾賽基本因素好好，但招股時反應良好，公開發售接獲169倍認購，街貨好散。大戶要炒，都要沽吓佢先，等佢跌吓才可以收貨，但係事前都估唔到佢跌到116元咁誇張，跌到咁低時，散戶借孖展買都要打靶，所以覺得可以低吸。
其實近日大行都睇好禾賽前景，中金發表報告指，禾賽2025年全年交付量超160萬台，截至1月5日公司已獲24家主機廠超120個車型的量產定點。禾賽規劃年產能將由2025年的200萬台提升至2026年的400萬台、實現翻倍增長，禾賽預計泰國曼谷伽利略工廠將在2027年初投產。中金認為，公司在手訂單充沛、國內外產能拓展積極，有望帶動未來出貨量及收入高增。
中金指，禾賽近日展示最新激光雷達技術成果，並更新交付量、產能規劃、戰略合作等經營情況。量產交付能力領先行業，國內外產能穩步推進。輔助駕駛L3車型禾賽獲工信部准入許可，激光雷達交付數量有望提升。Robotaxi、機器人等下一代物理AI浪潮襲來，激光雷達成關鍵引擎。中金維持對禾賽2025年營收預測不變，上調2026年營收預測6.4%至45.3億元，首次引入2027年營收預測60億元。該行維持禾賽「跑贏行業」評級，考慮到智駕及機器人板塊估值中樞上移，上調禾賽目標價至241.1港元。
禾賽在今日(1月9日)上午收213.4元，升番上招股價212.8元以上水平。朋友147元入貨，已升45%。雖然陸羽仁覺得禾賽在年初仍有一波升浪，會炒至3、4月，但朋友賺價已多，可以先沽一半食一半糊先，留一半可以睇中長線。
(如想睇多啲陸羽仁分析大市貼股票，即訂閱「石榴台」，逢周日至周五，日日睇陸羽仁專欄，吼實有乜好股可以投資！)
