早前與一班多年沒見面的同學食飯，大家問起我買股心得，特別係大戶買股與散戶買股有何不同之處。
我回答說，所謂大戶，許多都是基金，基金每年每季都要交業績，基本策略便是要贏，而且要跑贏大市。所以，如果想學大戶，要學這種「要贏」的心態。同學們大惑不解：人人買股票，都是想贏錢，又何需學習呢？
我從幾個角度解釋。基本上要贏，首先要唔輸。唔想輸，便要避開大量會令你輸錢的股票，或者會叫你輸錢的習慣。例如不要買太多三、四線股，不要在市況熱時追貨、冷時沽貨。最好是低揸高沽，以達到贏錢的結果。同學們回應：避開風險股、避開熾熱市況，比較容易理解，但低揸高沽這種「阿媽係女人」的原理又是什麼意思呢？
所謂低揸高沽，意思是在高位時候，捨得沽貨。最好方法是分段出貨，而不是一次過沽出。這也是我經常說，大戶沽貨，愈沽愈高的原因。你永遠不會知道股市今年高位會在24000點？25000點？抑或26000點？所以，見24000點，不妨沽出一部份，到25000，又沽出一部份，至26000，沽埋剩下的貨。平均沽貨價，便是25000。假設大市去到25300便回頭，沽不出第三注，當大市下跌至25000樓下，其實也應該沽埋。睇高位沽貨，唔應該睇得太盡也。
同樣道理，見低入貨的時候，亦唔可以睇得太盡。如果覺得大市高低位，相差4000點，高位25300，低位21300。見到22300的時候，已經可以分批入貨，21300、20300時又再入，入貨平均價便是21300。固然啦，你未必可以揸到全部貨，只能揸到一部份。至於是否決定繼續追入，便要看當時的市況而定。
決定幾時買、幾時追，要考慮許多因素，周期係其中之一。升市有時、跌市有時，升跌都會有一個周期。大市上升，慢慢去到高位，當中會有經歷一段時間，不會一步行完。同樣道理，從高位下跌，也不會一步行完，跌完會彈，彈完又再反覆尋底，跌市同樣也有一個周期。要走完一個周期，也有一段時間。所以要在低位揸貨，要有耐心，慢慢收集。
我解釋完一輪之後，同學似明非明。食完飯，臨講拜拜之前，我提醒同學，不要太貪心，不期望在頂位沽、在底位揸，一年內要有10%至20%的回報，應該可以收工啦。
陸羽仁
** 博客文章文責自負,不代表本公司立場 **
上期講過，大市遇著佔中這種情況，「滬港通」又可能唔通，恆指跌勢未完，主調是睇淡的，但亦提醒大家，大市跌得多，隨時會反彈，特別係會跟外圍反彈。大市今個星期的表現同我講嘅差唔多，外圍股市，特別係美股市大幅反彈，港股亦跟隨彈上幾百點。
今期，我想講講一個概念，叫做容錯功能。在未有藍光碟或者DVD之前，大約十多年前，大家睇嘅都係解像度好低嘅VCD，由於當時嘅正版電影光碟好貴，所以一般人睇嘅都係翻版碟。市面上可以買到嘅影碟機有兩種，一種是名牌原廠機，要過千蚊一部，而另一種係大陸山寨廠做嘅「貼牌機」，你想要什麼牌子，都可以貼上去，三幾百就有交易。
我喜歡正牌貨，於是花了千幾元買了部原廠機，但發現很多影碟都播唔到，唔單止翻版影碟，連質量差一點的正版碟，都播唔到。有同事就笑我，「邊有咁傻買原廠機呀？去鴨寮街三幾百蚊買部「翻版王」，乜碟都睇到啦。」我當時心諗，雜牌軍都咁勁？但也姑且買部試試。買咗之後，咦！真係好掂。正版翻版都無問題，就算碟面劃花了，窒一窒就繼續播！
後來有熟悉影碟機的朋友告訴我，原來大陸製造的貼牌機，預咗播放質素比較差嘅VCD，所以碟機的「容錯功能」會好高，而原廠機預咗播放高質正版VCD，容錯功能會好低，結果係質量差一點的光碟，都播放不了。我不知道這個解釋是否科學，但我卻發現了一個很重要的概念：容忍錯誤係一個重要嘅運作邏輯。自此之後，我將這個概念套用到投資上面。
究竟我們在做每一個投資行為的時候，其中的容錯空間有幾高呢？最近我提到股神巴菲特買股票損手，特別係買了IBM。IBM業績唔理想，股價急挫，一日之內唔見咗9億美元。佢今期黑仔，重倉的四大股份IBM、美國運通、可口可樂同埋富國銀行業績都唔好，四隻股公布業績後首日跌幅，夾埋令巴菲特的巴郡唔見咗27億美元。
強如巴菲特，睇基本因素買股票，也有睇漏眼的時候。我們一般人無巴菲特咁叻，睇大市也好，揀股也好，也一定會出錯。關鍵問題是我們的容錯空間有幾大。
我將買股分成投資及投機兩種心態。從「投資的我」的角度講，容錯功能本質上會大些。正如我之前所講，大市今年高位大約在25300點，再上穿嘅機會不大，而下行空間有大約4000點，即使沒有佔中，大市向下行，也會見番22000點，甚至更低。買股作為投資，睇中長線，例如一年走一轉，上星期覺得大市唔夠平，想等到低一些才買，但大市反向而行，現在彈高了幾百點，我是否能夠接受到這個錯誤呢？我覺得中長線投資，容錯空間會比較大。大市彈高了幾百點沒有買，如果大市一路向上升至25000、26000甚至27000點，低嘅時候買唔到，當然好傷啦，不過，如果大市還要下行的話，彈一段之後又會跌番下來，對我其實是沒有影響的。所以，作為「投資的我」，容錯空間是比較大的。
但作為「投機的我」，容錯功能便會比較小。我覺得投機一定要有止蝕位，特別係你唔想輸身家。以炒期指為例，如果唔止蝕，買錯方向，跌一、兩千點，你會好傷，所以一定要定一個止蝕位。那麼，究竟要定幾多止蝕位才適宜呢？一般短炒期指，一、兩百點已經頗多，炒長一點時間的話，你能夠容忍到四、五百點升/跌幅，已經好強勁。例如我中線睇淡，在23000點沽，定止蝕位在23500點，升穿便要打靶。而期指升到23501點，然後回落到22000點。對唔住，你仍然要輸錢，因為你嘅合約在23501點時已經打了靶，之後嘅跌幅，已經與你無關，遇到咁嘅情況，當然好慘啦。
你可能會問，沽空期指後，如果唔止蝕，就不用打靶啦，期指上完落番嚟，就賺得到啦。但我仍然提醒大家，唔係次次都咁好彩，短炒還是要定止蝕位。寧願止蝕以後，重新嚟過，但還係要定止蝕位。因為止蝕這概念可以保住大家條命仔也。
如果你唔想止蝕的話，入市手法便要相應調整。在23000點的時候，你已經開始睇淡，但不要在此位置沽，而在期指升到23300點，甚至23500點才沽。如果你在23300點沽，定500點止蝕，到23800點才止蝕，需要止蝕的機會便細好多。當然啦，你睇淡，定的沽出位好高，止蝕機會唔高，但風險就係沽唔到。當中如何取捨，要自己衡量。
但無論如何，作為投資者也好，投機者也好，我覺得都需要有一個容錯的容間，唔可以覺得自己一睇就啱。至於容錯空間有幾大？自己可以挨得到，抑或要一個比較窄幅度的止蝕位，到位便打靶呢？自己決定。
千萬不要用自己一定睇得啱的態度去投資或者投機。對一般人而言，睇啱睇錯五五波，已經不錯了，專業投資者有六、七成機會睇啱，三、四成估錯，其實已經非常強勁啦，無人可以咁叻睇啱晒，甚至具體知道指數會係點。所以你嘅投資或者投機方法要能夠容忍錯誤，先至可以冒相應嘅風險。否則的話，你以為每次落注都會贏，結果係隨時輸鑊大的收場。
陸羽仁
