容錯功能

上期講過，大市遇著佔中這種情況，「滬港通」又可能唔通，恆指跌勢未完，主調是睇淡的，但亦提醒大家，大市跌得多，隨時會反彈，特別係會跟外圍反彈。大市今個星期的表現同我講嘅差唔多，外圍股市，特別係美股市大幅反彈，港股亦跟隨彈上幾百點。

今期，我想講講一個概念，叫做容錯功能。在未有藍光碟或者DVD之前，大約十多年前，大家睇嘅都係解像度好低嘅VCD，由於當時嘅正版電影光碟好貴，所以一般人睇嘅都係翻版碟。市面上可以買到嘅影碟機有兩種，一種是名牌原廠機，要過千蚊一部，而另一種係大陸山寨廠做嘅「貼牌機」，你想要什麼牌子，都可以貼上去，三幾百就有交易。

我喜歡正牌貨，於是花了千幾元買了部原廠機，但發現很多影碟都播唔到，唔單止翻版影碟，連質量差一點的正版碟，都播唔到。有同事就笑我，「邊有咁傻買原廠機呀？去鴨寮街三幾百蚊買部「翻版王」，乜碟都睇到啦。」我當時心諗，雜牌軍都咁勁？但也姑且買部試試。買咗之後，咦！真係好掂。正版翻版都無問題，就算碟面劃花了，窒一窒就繼續播！

後來有熟悉影碟機的朋友告訴我，原來大陸製造的貼牌機，預咗播放質素比較差嘅VCD，所以碟機的「容錯功能」會好高，而原廠機預咗播放高質正版VCD，容錯功能會好低，結果係質量差一點的光碟，都播放不了。我不知道這個解釋是否科學，但我卻發現了一個很重要的概念：容忍錯誤係一個重要嘅運作邏輯。自此之後，我將這個概念套用到投資上面。

究竟我們在做每一個投資行為的時候，其中的容錯空間有幾高呢？最近我提到股神巴菲特買股票損手，特別係買了IBM。IBM業績唔理想，股價急挫，一日之內唔見咗9億美元。佢今期黑仔，重倉的四大股份IBM、美國運通、可口可樂同埋富國銀行業績都唔好，四隻股公布業績後首日跌幅，夾埋令巴菲特的巴郡唔見咗27億美元。

強如巴菲特，睇基本因素買股票，也有睇漏眼的時候。我們一般人無巴菲特咁叻，睇大市也好，揀股也好，也一定會出錯。關鍵問題是我們的容錯空間有幾大。

我將買股分成投資及投機兩種心態。從「投資的我」的角度講，容錯功能本質上會大些。正如我之前所講，大市今年高位大約在25300點，再上穿嘅機會不大，而下行空間有大約4000點，即使沒有佔中，大市向下行，也會見番22000點，甚至更低。買股作為投資，睇中長線，例如一年走一轉，上星期覺得大市唔夠平，想等到低一些才買，但大市反向而行，現在彈高了幾百點，我是否能夠接受到這個錯誤呢？我覺得中長線投資，容錯空間會比較大。大市彈高了幾百點沒有買，如果大市一路向上升至25000、26000甚至27000點，低嘅時候買唔到，當然好傷啦，不過，如果大市還要下行的話，彈一段之後又會跌番下來，對我其實是沒有影響的。所以，作為「投資的我」，容錯空間是比較大的。

但作為「投機的我」，容錯功能便會比較小。我覺得投機一定要有止蝕位，特別係你唔想輸身家。以炒期指為例，如果唔止蝕，買錯方向，跌一、兩千點，你會好傷，所以一定要定一個止蝕位。那麼，究竟要定幾多止蝕位才適宜呢？一般短炒期指，一、兩百點已經頗多，炒長一點時間的話，你能夠容忍到四、五百點升/跌幅，已經好強勁。例如我中線睇淡，在23000點沽，定止蝕位在23500點，升穿便要打靶。而期指升到23501點，然後回落到22000點。對唔住，你仍然要輸錢，因為你嘅合約在23501點時已經打了靶，之後嘅跌幅，已經與你無關，遇到咁嘅情況，當然好慘啦。

你可能會問，沽空期指後，如果唔止蝕，就不用打靶啦，期指上完落番嚟，就賺得到啦。但我仍然提醒大家，唔係次次都咁好彩，短炒還是要定止蝕位。寧願止蝕以後，重新嚟過，但還係要定止蝕位。因為止蝕這概念可以保住大家條命仔也。

如果你唔想止蝕的話，入市手法便要相應調整。在23000點的時候，你已經開始睇淡，但不要在此位置沽，而在期指升到23300點，甚至23500點才沽。如果你在23300點沽，定500點止蝕，到23800點才止蝕，需要止蝕的機會便細好多。當然啦，你睇淡，定的沽出位好高，止蝕機會唔高，但風險就係沽唔到。當中如何取捨，要自己衡量。

但無論如何，作為投資者也好，投機者也好，我覺得都需要有一個容錯的容間，唔可以覺得自己一睇就啱。至於容錯空間有幾大？自己可以挨得到，抑或要一個比較窄幅度的止蝕位，到位便打靶呢？自己決定。

千萬不要用自己一定睇得啱的態度去投資或者投機。對一般人而言，睇啱睇錯五五波，已經不錯了，專業投資者有六、七成機會睇啱，三、四成估錯，其實已經非常強勁啦，無人可以咁叻睇啱晒，甚至具體知道指數會係點。所以你嘅投資或者投機方法要能夠容忍錯誤，先至可以冒相應嘅風險。否則的話，你以為每次落注都會贏，結果係隨時輸鑊大的收場。

陸羽仁

陸羽仁

** 博客文章文責自負,不代表本公司立場 **

我經常講散戶投資者買股容易輸錢，皆因他們跟從群眾情緒入市。往往在高位買，低位沽。所以應該反其道而行，才有運行，一年買兩三次，沽兩三次，已經可以有不錯的收獲。不過，事實係講就容易，做就很難。股神巴菲特有句名言：「在別人貪婪時恐懼，在別人恐懼時貪婪。」這兩句說話，如何把握，絕不容易。因為要執行這兩個動作，無疑是與市場逆勢而行，需要的忍耐力相當大。

以別人貪婪時恐懼為例，我上個月在巴士的報上做過一次示範。在恆指升穿25000點高位後回落。我當時提到之前建議大家買入的招商局中國基金（133），在高位15.2元回落到14.54元，已經升了45%，也是時候沽出食糊，叫可以先沽一半。到一星期後，佢再回到13.9元，我叫大家沽埋另一半，呢部份都賺39%，夾埋平均賺39%。若然唔沽，佢今天已回到12.88元，回報已跌到29%。

這並不是說我睇得很準，那時叫大家沽，只不過是一來見利潤比較深，已超額完成聚財的目的，二來大市很旺，人人都好貪婪，都在等待滬港通的來臨，以為可以再炒一轉，但大市見高回落，開始乏力，又見到本地政治風險正在上升當中，所以叫大家如果有貨在手，可以沽貨食糊。今次比較僥倖，剛叫完大家沽貨，大市隨即下滑，之後都無好過。但在很多時候，沽貨之後，股市往往會再升，所以話，要做到逆勢恐懼，急流勇退，並不容易。

至於另一個情況，在別人恐懼時貪婪，情況又如何呢？恆指從高位接近25400點回落到現時大約23000點，已經跌近2400點，跌幅說少已經不少，在正常市況，即使大勢向下，都應該先有一波較似樣的反彈。但這次彈唔起，主要受佔中因素及美股回落的影響。彈唔起的話，就要留心大市會繼續反覆向下。以大市一年波幅4000至5000點計算，若直滑向底，隨時要見番22000點樓下。現時投資者只是開始恐懼，但我覺得恐懼程度還未夠，大市踩得未夠深，跌得未夠盡，所以現時貪婪入市，時間還是早了一點。

幾時貪婪，其實也是一種藝術。講政治事件，要觀察滬港通會否宣布暫停，以為佔中何時退場或清場，才可以見到大市會踩得有多深。我有些擔心大市今次會踩得比較深，例如要跌到22000點樓下才見底。我覺得現時市場的恐懼情緒仍未夠，如果某日恆指連續兩日大跌500、600點，報紙將呢啲新聞賣晒頭版，才是市場最恐懼的時候，那時大家不妨貪心點，開始分段入貨。

政治市唔易估，股市的波動也很難把握。但如果大家抱著一年走兩三轉的心態，在相對低價的時候，狠下心去分段入市，再熬他幾個，專有20%的斬獲，好運再可以走多一轉。當然，大家要訓練好自己的EQ，才能夠在適當的機會下，反其道而行。