我經常講散戶投資者買股容易輸錢，皆因他們跟從群眾情緒入市。往往在高位買，低位沽。所以應該反其道而行，才有運行，一年買兩三次，沽兩三次，已經可以有不錯的收獲。不過，事實係講就容易，做就很難。股神巴菲特有句名言：「在別人貪婪時恐懼，在別人恐懼時貪婪。」這兩句說話，如何把握，絕不容易。因為要執行這兩個動作，無疑是與市場逆勢而行，需要的忍耐力相當大。
以別人貪婪時恐懼為例，我上個月在巴士的報上做過一次示範。在恆指升穿25000點高位後回落。我當時提到之前建議大家買入的招商局中國基金（133），在高位15.2元回落到14.54元，已經升了45%，也是時候沽出食糊，叫可以先沽一半。到一星期後，佢再回到13.9元，我叫大家沽埋另一半，呢部份都賺39%，夾埋平均賺39%。若然唔沽，佢今天已回到12.88元，回報已跌到29%。
這並不是說我睇得很準，那時叫大家沽，只不過是一來見利潤比較深，已超額完成聚財的目的，二來大市很旺，人人都好貪婪，都在等待滬港通的來臨，以為可以再炒一轉，但大市見高回落，開始乏力，又見到本地政治風險正在上升當中，所以叫大家如果有貨在手，可以沽貨食糊。今次比較僥倖，剛叫完大家沽貨，大市隨即下滑，之後都無好過。但在很多時候，沽貨之後，股市往往會再升，所以話，要做到逆勢恐懼，急流勇退，並不容易。
至於另一個情況，在別人恐懼時貪婪，情況又如何呢？恆指從高位接近25400點回落到現時大約23000點，已經跌近2400點，跌幅說少已經不少，在正常市況，即使大勢向下，都應該先有一波較似樣的反彈。但這次彈唔起，主要受佔中因素及美股回落的影響。彈唔起的話，就要留心大市會繼續反覆向下。以大市一年波幅4000至5000點計算，若直滑向底，隨時要見番22000點樓下。現時投資者只是開始恐懼，但我覺得恐懼程度還未夠，大市踩得未夠深，跌得未夠盡，所以現時貪婪入市，時間還是早了一點。
幾時貪婪，其實也是一種藝術。講政治事件，要觀察滬港通會否宣布暫停，以為佔中何時退場或清場，才可以見到大市會踩得有多深。我有些擔心大市今次會踩得比較深，例如要跌到22000點樓下才見底。我覺得現時市場的恐懼情緒仍未夠，如果某日恆指連續兩日大跌500、600點，報紙將呢啲新聞賣晒頭版，才是市場最恐懼的時候，那時大家不妨貪心點，開始分段入貨。
政治市唔易估，股市的波動也很難把握。但如果大家抱著一年走兩三轉的心態，在相對低價的時候，狠下心去分段入市，再熬他幾個，專有20%的斬獲，好運再可以走多一轉。當然，大家要訓練好自己的EQ，才能夠在適當的機會下，反其道而行。
陸羽仁
** 博客文章文責自負,不代表本公司立場 **
最近同班朋友食飯，有個大學同學自怨自艾地說，他炒股成績衰過佢老婆，真係無面喇！
我問他點衰法呢？ 他說只講今年的結果，炒來炒去都要微輸，都唔敢同老婆講，因他一直都覺得他老婆蠢，又唔識股票，但他老婆到目前為止已有十幾個巴仙回報，論結果現在已到10月，無太多時間俾他追，他今年的投資回報又跑輸老婆了！
我問同學仔，他自己同老婆究竟點買賣呢？他說自己捕捉市場走勢，已不是炒些３﹑４線股，都係吼大股，買吓賣吓，只想捉吓波浪，但鑊鑊都是這樣，時中時唔中，唔中的時候，買時就算唔係最高都係幾高，沽的時候就算唔係最低都幾低，結果贏一次輸一次，贏一次輸一次咁，所以夾夾埋埋比得個桔仲要差少少。
我又問他最近又買了些甚麼，他說個市最近上到高位，他沒有沽貨，因他認為滬港通會上到27000至28000點，希望等到滬港通來到時，去到最高位才沽貨；但他老婆就唔理，揸住隻2828(恒生H股指數基金)見到有近20％回報，在25000點樓上已沽出。真係神得佢呀，老婆沽完個市就碌落黎，老婆食糊，自己食蕉。
佢話早幾日最低位時佢差啲要平埋倉，最後無郁都叫做彈番啲唔使輸，唔係仲要輸。老婆買賣好少，一年得一兩次買賣，他自己就成日買賣，郁嚟郁去，想捕捉最好的時機月但經常都唔得。
我跟他說，你是「聰明人」做法，信自己的聰明分析，意思是市場上太多資訊太多新聞太多股評，你又日日去睇，再加上自己的意見，其實都是一個散戶智慧的集中反映，散戶在這些市場波動的情況下，通常都是接貨者，所以就好難贏，你話贏一次輸一次已算是好，大多數人是輸多過贏，結論是聰明人其實是「聰明笨伯」；而他老婆就係「純笨伯」的做法，知道自己笨，對個市分析唔到，睇住些大股在跌得深的時候買，有10幾20%回報時走，不理當時其他人點講，由於買的係大股唔係細股，係指數股而不是４線股，就算睇錯，揸住一兩年都可返到轉頭。好多時「笨伯投資法」回報仲高。
所以我勸喻這朋友，他可以日日睇市，但將他的portfolio內的七成變成一些好少郁動的投資式股票，意思就是不要經常買賣，選擇在大市比較低時，個個都不看好個股市時才去買，即我經常講隻2828恒生Ｈ股指數基金跌穿100元時買，去到110至120元就搵位沽，咁就會有10多20個％回報，這個投資佔portfolio的主要部份。
其他的三成就跟他往時的方法繼續炒作吓，比對兩種不同運作方法的效果。那七成笨伯式的投資，要在個市低時去揸，是要去忍受可能再跌的痛楚，最安全的對象是指數股，因為個別的股票可能是有其他風險是你不懂得去分析，但指數股高低位都差不多，到大市近22000點，買吓唔拘，唔敢一手買，分段買亦得。然後在市場好時分段出貨，例如24000幾、25000點，就算覺得前面有好好的風景，仲有好多的水位可以升，都照沽，可以先沽一半，再升再沽另一半。用這些手法在低位時揸吓，在高位時盡量減持，可能會有較好的結果。
有時買股票太聰明唔得，笨些慢些反而較容易會有好的回報。
