久不久就會有網友問起匯控（0005），估計係有不少人揸住，或者想買這隻股。我覺得滙豐是落後股，除非有重大突破出現。
滙控近期走勢受制於英國脫歐進展，英國脫歐一直懸而未決，不能排除有硬脫歐風險。港股已經升穿三萬點，距高位不足10%，而滙控周四收66.6元，距離一年高位77.7元，還有14%差距。若它與大市同步的話，也應該上到70元以上的水平，但現時還在67元左右徘徊。
滙控走勢圖
看滙控的走勢圖，近期主要在63元至68元左右浮動，走波幅的話，可以在63元左右買，到68元就沽出。論股價，滙控並不貴，雖然市盈率13.6倍，但一直願意派高息，股息率6厘，而且每季派息。揸住滙控，收下息也不錯。不過，它想在短期內有突破，就不太容易。
由於滙控股價受制於英國脫歐前景，在英國脫歐問題解決之前，匯控不會太好景。不過，歐盟最近同意讓英國把脫歐限期延後至十月底，應該有助舒緩脫歐的壓力，大市回升時，滙控估計可以繼續炒上，但相信升到68元、69元水平已經行人止步。
不過，如果滙控肯把總部搬回香港的話，到時又可以追入，因為滙控會由一隻暮氣沉沉的英國股，變身成一隻較有朝氣的亞洲股。在此之前，滙控只可以看成一隻收息股，頂多是炒炒波幅而已。
陸羽仁
** 博客文章文責自負,不代表本公司立場 **
我早前有文章叫朋友若持有的股份有錢賺想沽，話可以先沽一半，後來有網友問起我係唔係睇淡，其實我並不是睇淡，有幾條問題可以自問自答。
1. 你叫人有錢賺的股票沽一半是否睇淡？
不是，這和睇市無關，只是一個買賣策略，我的信念是不怕賺少了，只怕無錢落袋無得賺。所以但凡有朋友有獲利貨想沽，諗唔掂，心大心細問我，我大多叫佢諗唔清楚先沽一半，炒股有錢落袋才是真錢，一日未沽，一日只是帳面數。
另一種情況是手上有千年蟹貨，坐了艇了幾年，剛剛返到家鄉，我亦會叫他們至少先沽一半。當日買貴了才要坐艇，今天回到家鄉已升番唔少，沽清也賺了過去幾年收的股息，沽一半留一半再睇睇亦得。
2. 什麼叫做夠膽輸不夠膽贏？
上述叫人若諗唔掂沽一半先的說法，和批評散戶「夠膽輸不夠膽贏」的狀況有點相似。即係話散戶輸的時候跌五成都無止蝕，但一賺少少就走了，結果是輸的多、贏的少。
首先你若對一隻股的經營狀況好有研究，例如知佢轉虧為盈，未來幾年生意都好景，不純粹因為大市而升，睇好佢未來幾年前景，這種股票真是一半也未必要沽，睇得清，要夠膽長揸，可以食到佢盡。奈何一般散戶對股票無甚研究，買股矇查查，「諗唔掂」時，沽一半亦無乜壞。只要大市好，沽了甲，可以買番乙。
3. 未來大市點睇？
上半年、特別是5月前，仍然睇升。到中美達成貿易協議，中國經濟明顯回升時，就要小心。
圖: 恒指半年圖
睇番恒指由1月至今，都係一個完美上升之勢，在此走勢被破壞之前(即上升軌未跌穿之前)，仍可繼續睇好，維持見較明顯回吐就吸納的交易策略，直至這個走勢終結為止。
