我早前有文章叫朋友若持有的股份有錢賺想沽，話可以先沽一半，後來有網友問起我係唔係睇淡，其實我並不是睇淡，有幾條問題可以自問自答。
1. 你叫人有錢賺的股票沽一半是否睇淡？
不是，這和睇市無關，只是一個買賣策略，我的信念是不怕賺少了，只怕無錢落袋無得賺。所以但凡有朋友有獲利貨想沽，諗唔掂，心大心細問我，我大多叫佢諗唔清楚先沽一半，炒股有錢落袋才是真錢，一日未沽，一日只是帳面數。
另一種情況是手上有千年蟹貨，坐了艇了幾年，剛剛返到家鄉，我亦會叫他們至少先沽一半。當日買貴了才要坐艇，今天回到家鄉已升番唔少，沽清也賺了過去幾年收的股息，沽一半留一半再睇睇亦得。
2. 什麼叫做夠膽輸不夠膽贏？
上述叫人若諗唔掂沽一半先的說法，和批評散戶「夠膽輸不夠膽贏」的狀況有點相似。即係話散戶輸的時候跌五成都無止蝕，但一賺少少就走了，結果是輸的多、贏的少。
首先你若對一隻股的經營狀況好有研究，例如知佢轉虧為盈，未來幾年生意都好景，不純粹因為大市而升，睇好佢未來幾年前景，這種股票真是一半也未必要沽，睇得清，要夠膽長揸，可以食到佢盡。奈何一般散戶對股票無甚研究，買股矇查查，「諗唔掂」時，沽一半亦無乜壞。只要大市好，沽了甲，可以買番乙。
3. 未來大市點睇？
上半年、特別是5月前，仍然睇升。到中美達成貿易協議，中國經濟明顯回升時，就要小心。
圖: 恒指半年圖
睇番恒指由1月至今，都係一個完美上升之勢，在此走勢被破壞之前(即上升軌未跌穿之前)，仍可繼續睇好，維持見較明顯回吐就吸納的交易策略，直至這個走勢終結為止。
陸羽仁
** 博客文章文責自負,不代表本公司立場 **
我早幾年推介過雷軍的金山軟件（3888），有朋友C君在2017年低位買過，之後沽咗賺過錢，去年見佢從高位26.8元碌到15元，他在2016年在這個位入貨賺過錢，就再買入。點知隻金山好似食瀉藥咁跌落去，到10月再跌到10.06元，嚇到C君面都青埋。
圖:金山股價5年圖。
不過C君有啲運，最近金山升番上來，升到19.8元，以佢平均入貨價15元計，有32%利潤，最近見佢公布業績麻麻地，但股價又無跌，又話今年盈利好轉，問我點睇。
金山剛在3月27日公佈業績，去年純利大跌88%，至3.89億人民幣，每股盈利29仙，不派末期息。如果和2017年撇除出售附屬收益的純利比較，去年純利跌幅為60%。單計第4季，純利約2.3億人民幣。換言之第4季純利回升。
金山去年收入59.06億元，按年升14%。當中網絡遊戲收入下跌18.2%，至25.52億人民幣，雲服務收入上升66%至22.18億人民幣，而辦公軟件及服務收入上升56%至11.37億人民幣的影響。網絡遊戲業務利潤6.84億人民幣，按年下跌51.6%。雲服務虧損擴大至8.47億人民幣，2017年為6.24億人民幣。主要是網絡遊戲利潤大減，新生意雲服務仍在投資期，令整體純利大受影響。
金山軟件首席財務官吳育強在業績發佈會上話，隨着公司規模的擴大和技術生態進一步成熟，預期今年利潤率較去年有大幅提升。他說，整體而言，「經歷了去年的艱難時期，2019年確實會鬆一口氣」。
照睇走勢金山今年利潤會好過去年，目前大市仍有上升趨勢，短期金山股價應可維持上升勢頭，但睇長啲，就要睇大市啦。
C君問得我，其實佢想食胡，但又心大心細，覺得隻股會再升。我話金山屬科技股，走勢好睇大市，現價市盈率60.6倍，即使盈利升50%，市盈率都有40倍，市好就話唔貴，市差會嫌貴。無人有大市水晶球，想貼中最高位才走有難度。
我話「股價如浮雲，上落不由人」，有胡做乜唔食，可以食一半賺30%先，其餘一半留低再睇，定番買入價15元做止蝕，咁呢個交易就一定有錢賺。股價是虛，落袋為實，呢個係我買股最實在的經驗，我最後補一句，「累你賺少咗唔好怪我」。
