佔中三子今日自首，陳日君亦也加入自首行列，但壹傳媒集團主席肥佬黎唔會自首，佢對《蘋果日報》話，三子自首是明智及有智慧的做法，有助勸告運動退場，但他自已不會跟隨三子自首，因希望能夠守到最後，「走出來抗爭，就寧願俾警方拉、預咗俾佢拉」。對於陳日君將陪同三子自首，佢話「咁好緊要喇」。
肥佬黎相信，佔中三子在決定自首之前，應已經與各單位商討，現時警方以暴力挑撥示威者，令示威者好燥，可能違反三子一直提倡和平及非暴力的宗旨，「佢哋諗退，我覺得係無可厚非」，但他認為三子現時並非扮演一個主動的角色。
肥佬黎認為三子「鋪晒所有路、鋪晒所有心理狀態俾我哋去自發呢場運動」。他又指，三子於佔領運動起初近30日亦在立法會附近留守及支援，幾廿日無返屋企，形容三子犧牲很大，不可以小事批評三子。
表面睇肥佬黎唔自首的理由唔係太充份，因為他一方話三子自首有智慧，可以勸退運動，陳日君自首「好緊要」，但佢自己唔自首，「因為希望能守到最後」，點解佢唔一齊自首勸退運動呢? 而且佢即使想留在現場，可以而家暫時唔自首，到清場時才自首，而不是「唔自首等拉」。
自唔自首的關鍵分別在於認唔認罪，自首是自己承認有罪，唔會否認控罪，呢啲發動群眾去非法集會的大粒佬去自首，都要預咗要坐監啦。肥佬黎話「預咗俾佢拉」，表面睇好英，實際上係唔想坐監，到時自然會搵幾個金牙大狀，抗辯到底，在香港有錢大晒，有錢佬大把錢打官司，要拉佢地坐監，一啲都唔易喎。肥佬黎當日咁支持佔中去公民抗命，而家又唔認罪，佢側側膊又走數啦。
小鯊
** 博客文章文責自負,不代表本公司立場 **
近日飲茶灌水有朋友話壹傳媒中期業績好得，網媒好好賺，叫小鯊去睇睇，睇完之後小鯊又有另類觀察。
首先係壹傳媒業務無表面睇咁大進步。佢到9月底中期盈利1.04億元，比去年同期的1153萬好好多，但當中因為去年同期有7228萬已終止業務虧損，今年無咗呢個虧損，所以業績好睇好多，若然唔計呢個已中止業務的影響，去年同期等如賺8381萬，換言之今年中期只是賺多咗2049萬而矣。
第二是報紙雜誌廣告跌得好厲害。壹傳媒報章雜誌收入大跌2.2億，跌至8.5億，跌幅高達20.4%。此收入包含廣告和發行收入，估計主要是廣告收入下跌。拆開嚟睇，香港蘋果日報半年收入3.3億，較去年同期跌21.4%，半年唔見咗8950萬。當中半年廣告收益1.9億，較去年同期的2.6億，大跌26.7%。半年發行收益1.4億，較去年同期1.6億，跌12.5%。香港蘋果日報廣告收入大跌26.7%，此數字可以用驚人來形容，以此估計蘋果日報今年全年廣告可能唔過4億，以佢早兩年廣告還有6億去計，廣告跌得極急。
相對地台灣蘋果日報無跌得咁甘，半年廣告收入3.3億港元，跌9.9%，而半年發行收入1.4億，跌14%。即係話台灣蘋果發行量跌幅比香港略多少少，但廣告跌少好多。
雜誌方面，忽然1周半年總收入(包含廣告和發行收入，兩者沒有分開披露)1.14億，跌20.5%。壹週刊半年總收入1.03億，比去年同期跌13.8%。Face雜誌半年總收入4280萬元，比去年同期跌9.9%。而台灣壹週刊半年總收入跌6130萬元，跌16.3%。忽然1周作為壹傳媒收入最高的旗艦雜誌，但收入跌幅20.5%也是最大，可以用一個「傷」字來形容。
第三是數碼業務收入大增。半年收益3.3億，比去年同期的1.3億，大增2.1億元，增幅高達161%，當中84.2%來自香港(即2.8億元)，主要是本地網上廣告及手機遊戲收入。但壹傳媒沒有拆分網上廣告和手遊收入的比例。
有趣的是，壹傳媒半年報紙雜誌收入跌2.2億，數碼業務收入2.1億，即是平面媒體所跌，剛好由數碼媒體補番。
另一個值得注意的現象是其數碼媒體成本好重。數碼業務由去年上半年蝕3036萬，到今年上半年賺4025萬，一來一回等如多賺了7061萬，收入增加2.1億但盈利只增7千萬，即是成本也增加了1.4億，成本相當重，半年總成本要2.9億，推算全年成本5.8億，真係重本投資，除了流量多相關費用之外，人力成本、以及手遊的成本都可能好大。
壹傳媒犧牲平面媒體做大網媒的策略是否成功，就見仁見智了，往後要看其平面媒體跌得快，還是網媒升得快了。
