成個娛樂雜誌集團放盤

天氣轉冷，但傳媒業更冷，早上睇到《蘋果》老總沙膽虹的手記，佢話又到做明年預算的時候，要預測2015年4月至2016年3月底年度紙媒的印量和人手，紙媒是夕陽行業，越來越多人轉睇手機，報紙銷量每年下跌，今年託賴已跌得略慢，明年料也不例外，跌少當贏。

沙膽虹話，讀者從紙媒轉往手機，廣告客戶亦然，報紙廣告收入難免向下，《蘋果》從紙媒轉型至手機，人手配置必須加減調整，故未來數月將是痛苦的時候。集團管理層決定加薪多少？會否要求減成本？像去年度一樣要減5%，甚至更多？《蘋果》如何執行？有哪些版面可以更精簡？

手頭執起今個星期一的《蘋果》，上面引述11月17日的印數是16.1萬份，實銷15.1萬份，實銷數就快跌破15萬，這些佔中的日子，按理《蘋果》的銷量應該上升，但實際卻在止唔到跌勢。以《蘋果》這樣一份大眾化綜合性報紙來說，若15萬也守不住，都跌得幾誇張啦。記得6、7年前，《蘋果》銷量還有30萬以上，咁就唔見咗一半，開始唔係幾大眾化。

有個大孖沙同小鯊食飯，透露一個金融大家族的第二代同佢講，某大傳媒集團成個香港雜誌部門全數放盤，唔係賣一本雜誌，係所有雜誌一齊賣，問大孖沙有無興趣去傾，第二代話當中銷量最大的娛樂雜誌，去年仲賺緊3000萬。呢個雜誌部門其實等如一個雜誌集團，有娛樂又有綜合雜誌，估計叫價都唔會平。

大孖沙話佢無落實傾，就費事問人價。因為佢知道呢個集團的雜誌廣告今年跌得好厲害，雖然去年仍賺錢，但今年廣告收入係20、30%咁跌，佢買咗都無力回天。吹吓水講，如果對方索價10億，最後以5億找數，去年仲賺緊幾千萬，計落PE(市價盈利率)好似只係10倍多一啲，以為唔貴，但今年可能差不多無盈利，明年可能要蝕入肉，條數唔易計，所以諗唔過。

有時見到雜誌開始跌，就轉攻網上，但將猛料放晒上網，讀者何需用10幾、20蚊去買雜誌? 又加速雜誌死亡。呢條係唔係生路，都唔易講得清楚。

小鯊

** 博客文章文責自負,不代表本公司立場 **

佔中三子今日自首，陳日君亦也加入自首行列，但壹傳媒集團主席肥佬黎唔會自首，佢對《蘋果日報》話，三子自首是明智及有智慧的做法，有助勸告運動退場，但他自已不會跟隨三子自首，因希望能夠守到最後，「走出來抗爭，就寧願俾警方拉、預咗俾佢拉」。對於陳日君將陪同三子自首，佢話「咁好緊要喇」。

肥佬黎相信，佔中三子在決定自首之前，應已經與各單位商討，現時警方以暴力挑撥示威者，令示威者好燥，可能違反三子一直提倡和平及非暴力的宗旨，「佢哋諗退，我覺得係無可厚非」，但他認為三子現時並非扮演一個主動的角色。

肥佬黎認為三子「鋪晒所有路、鋪晒所有心理狀態俾我哋去自發呢場運動」。他又指，三子於佔領運動起初近30日亦在立法會附近留守及支援，幾廿日無返屋企，形容三子犧牲很大，不可以小事批評三子。

表面睇肥佬黎唔自首的理由唔係太充份，因為他一方話三子自首有智慧，可以勸退運動，陳日君自首「好緊要」，但佢自己唔自首，「因為希望能守到最後」，點解佢唔一齊自首勸退運動呢? 而且佢即使想留在現場，可以而家暫時唔自首，到清場時才自首，而不是「唔自首等拉」。

自唔自首的關鍵分別在於認唔認罪，自首是自己承認有罪，唔會否認控罪，呢啲發動群眾去非法集會的大粒佬去自首，都要預咗要坐監啦。肥佬黎話「預咗俾佢拉」，表面睇好英，實際上係唔想坐監，到時自然會搵幾個金牙大狀，抗辯到底，在香港有錢大晒，有錢佬大把錢打官司，要拉佢地坐監，一啲都唔易喎。肥佬黎當日咁支持佔中去公民抗命，而家又唔認罪，佢側側膊又走數啦。