肥佬黎辭《蘋果》社長怕累報紙

警方今日在金鐘佔領區清場，壹傳媒集團主席黎智英和多名泛民立法會議員一起被拉。肥佬黎在下午5:27分左右被捕，《蘋果日報》在5:46分已刊發消息，話黎智英辭任《蘋果日報》社長一職，該職位會由壹傳媒平面媒體行政總裁葉一堅兼任。

肥佬黎此行動惹起政界議論紛紛，政界中人話，肥佬黎的政治立場一向鮮明，不單是參與佔中，簡直就是核心份子，但一直沒有辭任《蘋果日報》社長的職位，但到佔中快將結束，他被捕之後，就馬上辭任社長職位，難道是怕《蘋果日報》被封?

Ariel話唔係咁誇啩，封報紙？有報壇老人家就話，在1967年4月香港人造膠花廠勞資糾紛，引發「67暴動」，結果死咗50人，拉咗5000人，封咗三份報紙，包括《香港夜報》、《田豐日報》、《新午報》這三家「非正統左報的左報」，於8月9日被港英政府下令停刊。而家呢啲停報紙的舊例，仲仍然存在架，所以肥佬黎擔心都有理由呀。

要注意肥佬黎只係辭《蘋果日報》社長，無辭上市公司壹傳媒的主席職位，睇嚟真係驚影響報紙多啲。

佔中前「壹傳媒股民」爆肥佬黎秘聞，其中爆出一封葉一堅與肥佬黎的電郵，人稱「堅哥」的葉一堅，知道肥佬黎找人製作佔中教戰動畫，他覺得黎智英及壹傳媒參論與其事，不甚妥當，於是建議壹傳媒與肥佬黎都不要在這方面提供幫助。肥佬黎當然係啋堅哥都有味。

後來佔中爆發，肥佬黎唔止整吓動畫咁簡單，出錢出力，仲站埋出台前。如今回想，堅哥當日的提醒，真係有先見之明噃。

Ariel

** 博客文章文責自負,不代表本公司立場 **

佔中、清場在政壇炒到熱一熱，社會上分成兩批撕裂晒，立法會內亦唔走得甩，泛民發聲明，建制派又會齊齊出來發聲明，好似昨日建制派議員一齊開記者會，要求當局依法追究違法佔領人士，包括發動行動人士。但好似又唔覺自由黨有代表出席建制派的活動，自由黨都幾特立獨行喎。

之前前黨主席田大少就走去見當時絕緊食的學民思潮黃之鋒等人，仲答應向CY轉達會面要求，真係遊走兩面，八面玲瓏咁話。唔止田少，當日一齊去探黃之鋒的仲有「西環契仔」之稱的謝偉俊阿Paul。早前政壇已有傳聞，自由黨覺得阿Paul同傳統建制唔多同，好想拉佢入黨。

據聞阿Paul就心大心細，不過，一啲舉動就似乎同自由黨行得好埋，交通運輸界因為佔領運動，大呻影響收入，旺角同金鐘都分別由運輸界出頭入稟申請禁制令，結果就變相搭橋俾政府有咗清場開通道路的機會，但自由黨的易志明身為交通航運界立法會代表，全程唔多覺佢好高調撐業界要求通路，到今日清金鐘時，先至俾人見到佢同冠忠董事長一齊出現在現場。

同自由黨關係幾好的阿Paul，就作為冠忠的法律代表協助申請臨時禁制令，唔知係咪自由黨搭路呢，咁都算向業界有交待啦，又唔使令人覺得太高調參與反佔中俾人鬧，又有個角色做咗啲嘢。睇吓潮聯在旺角入稟成功清障後日日俾人圍，有時做出頭鳥都要承擔風險架。之但係，依家社會咁撕裂，阿爺未必再需要兩面派，打起仗嚟就好難面面俱圖，唔係吓吓都可以又要威又要戴頭盔喎。