昨日講到英國肥男阿Mike的食咖哩減肥法，其實是一個早上食得多，晚上食得少的節食辦法，這令我想起老友提到的超級富豪同佢講的減肥法，方法不謀而合。
呢個超級富豪係大集團老細，行年60幾，但身段比好多40幾的更fit，好奇問起佢用乜方法保持良好身段，富豪有一套特別方法，叫做3、2、1法。
富豪話佢早餐會食到足，食得比較豐富，唔需要特別戒食，咁每朝睇住報紙，食早餐都食得好開心架。
到中午都叫做食得正常，但要稍稍克制，太肥的嘢就唔好食咁多，但都可以食到飽，唔需要餓住個肚，只要唔好太暴飲暴食就得。
好啦，到晚餐啦，就要比較節制啦，食得比較清淡，盡量食少啲澱粉質，食到半飽而矣。如果晚上肚餓，就食啲菜頂肚。所以佢晚上可以就唔安排應酬，要約人食飯傾計盡量安排在中午。當然有時晚餐有約都推唔到，佢就盡量食少啲，少肉少澱粉多菜，唔好食到咁飽。
早餐食得豐富等如三份，中午可以正常食等如兩份，晚上食少啲就係一份，所以稱為3、2、1法，亦好似一個倒轉金字塔那樣，上多下少。
富豪呢個3、2、1減肥法，唔需要節食節得太辛苦，大體上食得正常，只不過將食嘢的quota移到早上，晚上食少啲而矣。
其實食嘢多少係一個問題，食咗消唔耗得到係另一個問題，早上多食仲消耗得了，到晚上多食消耗唔切，易變肥膏，所以只要改一改飲食習慣，就可以收到減肥之效，若然再配合適當運動，當然就事半功倍啦。
Lobo
** 博客文章文責自負,不代表本公司立場 **
睇《巴士的報》見到一單新聞，有個英國肥男阿Mike，原本重到336磅，但佢發明獨有咖哩減肥秘方，每天早上6時吃辛辣的印度咖喱，上午過後少量進食，結果11個月內減掉140磅，減至195磅，由肥佬變成fit男。
表面睇食咖喱減肥呢個方法有啲騎呢，但我作為減肥愛好者，細心研究一下，發覺佢呢個方法得架。
首先睇吓呢個來自英國曼徹斯特的肥人Mike Snell做乜咁肥。佢任職送貨員，體力勞動，食無定時，只要有時間就會吃高熱量的快餐，後來肥來300幾磅，好易氣喘，於是決心減肥。
佢覺得傳統節食方法對自己無效，自行發明「咖哩減肥法」。早上6時就會吃印度咖哩加速新陳代謝，選在這時間的原因是一早食辣嘢，可以消除一整天想吃的慾望。早上10時前可以盡情吃自己喜歡的食物，但10時之後就要吃很少，到晚餐只會吃小食甚至只喝湯。結果成功減肥。
阿Mike呢個減肥方法其實好科學，關鍵不是咖喱，而是一個「倒金字塔式」的飲食方法，我地平日的飲食習慣是早午晚都食，一餐比一餐多，而晚餐通常是最勁的一餐，有啲人仲有食宵夜的習慣，是一種金字塔式的習慣，想唔肥都難。唔止因為食得多，仲因為食得遲，夜晚食咁多，食完一兩個小時未消化就瞓，積累脂肪，想唔肥都幾難。
而阿MIike的方法晨中先食，在10時前任食，中午之後已經少食，晚上只是飲湯，係一個倒金字塔的飲食方法，的確有助減肥。食唔食咖喱唔係關鍵，食法是關鍵。明天可以講講一個富豪減肥法，亦相當類似。
