董伯伯半食減肥法

早兩次寫到唔同富豪的減肥法，各有根據，有老友睇完問仲有無其他名人有乜古怪減肥法可以參考，見咁高興，又可以寫吓前特首董伯伯的減肥法。

董伯伯睇落有少少肥，但有接觸過佢的老友話，其實董伯唔係肥，只係富貴相，一同佢握手，就知佢係有錢仔出身，因為隻手又肥又厚，正確點講，隻手係又軟又厚，握落好似棉花一樣，甚有貴氣。

講番減肥，老友講起十幾年前董伯伯仲係特首的時候，請我老友食飯，當時係食中餐，分餸個隻，佢見董生食剩唔少，問董生做乜咁細食。

董伯伯話，佢係特登食50%，每一樣餸都係食50%，呢個方法可以稱為「半食減肥法」。董伯話佢做特首應酬好多，差不多每餐飯都有約，係咁食法唔得掂，所以佢自己諗咗個方法，食一半，乜嘢都係食一半，咁食嘢的份量就少咗一半，由於本來應酬的菜都較多，食一半一啲都唔會餓。

董伯提到有時自己唔想食咁多，但同人食飯好難叫人遷就你，與其咁多要求，不如簡簡單單食一半，容易執行。佢實行咗呢個方法後，食嘢少咗，重量輕咗，身體都健康咗。

可能有人會話，董伯伯咁天一半地一半，咪好浪費? 我又唔太同意，呢啲應酬菜，一個人食多食少，唔可以改變大局。食埋另一半好似無嘥，但食咗落肚變咗肥膏，搞到週身唔健康，咪仲嘥?

我聽到任何好減肥方法都想學，聽完董伯伯呢個半食減肥法，就想在飲宴時用，我做生意應酬多，一個月都真係有好多飲宴，有時真係十幾道菜，食到好飽。我就試呢個半食法，發覺真係幾有效，可以食少好多。減肥，真係條條大路通羅馬，至緊要個原理啱。

Lobo

** 博客文章文責自負,不代表本公司立場 **

昨日講到英國肥男阿Mike的食咖哩減肥法，其實是一個早上食得多，晚上食得少的節食辦法，這令我想起老友提到的超級富豪同佢講的減肥法，方法不謀而合。

呢個超級富豪係大集團老細，行年60幾，但身段比好多40幾的更fit，好奇問起佢用乜方法保持良好身段，富豪有一套特別方法，叫做3、2、1法。

富豪話佢早餐會食到足，食得比較豐富，唔需要特別戒食，咁每朝睇住報紙，食早餐都食得好開心架。

到中午都叫做食得正常，但要稍稍克制，太肥的嘢就唔好食咁多，但都可以食到飽，唔需要餓住個肚，只要唔好太暴飲暴食就得。

好啦，到晚餐啦，就要比較節制啦，食得比較清淡，盡量食少啲澱粉質，食到半飽而矣。如果晚上肚餓，就食啲菜頂肚。所以佢晚上可以就唔安排應酬，要約人食飯傾計盡量安排在中午。當然有時晚餐有約都推唔到，佢就盡量食少啲，少肉少澱粉多菜，唔好食到咁飽。

早餐食得豐富等如三份，中午可以正常食等如兩份，晚上食少啲就係一份，所以稱為3、2、1法，亦好似一個倒轉金字塔那樣，上多下少。

富豪呢個3、2、1減肥法，唔需要節食節得太辛苦，大體上食得正常，只不過將食嘢的quota移到早上，晚上食少啲而矣。

其實食嘢多少係一個問題，食咗消唔耗得到係另一個問題，早上多食仲消耗得了，到晚上多食消耗唔切，易變肥膏，所以只要改一改飲食習慣，就可以收到減肥之效，若然再配合適當運動，當然就事半功倍啦。