中美貿易談判無進展 4隻股帶住大市回落

昨日上海A股上證指數收報2933點，大跌2.5%或77點，圖表上是一個大陰燭，今日微跌0.2%。但也不用大驚小怪，上海A股一天有兩三個巴仙上落其實好普通，昨日下跌的藉口是上週五美國非農業新增職位比預期多，呢個月減息0.5厘的機會大減，所以美股回落，其實呢啲都唔係乜嘢特別嘅理由，非農業新增職位比預期好，代表經濟好，理論上股市應該升，所以呢個消息你鍾意話好又得，話唔好又得，都可以要來解釋個市嘅升跌。

其實自從習近平主席與特朗普證實會在大阪會面開始，恒生指數由6月最低26671點反彈至7月4日最高29007點，量度反彈幅度，先計累計下跌的點數，由4月30280點下跌至6月26671點（共3609點），若反彈61.8%，亦即反彈2230點，目標28901點左右，和上週四高點29007點，只是相差106點左右。隨着大市每日成交跌回至500至600億元，大市基本上完全沒有動力再升，加上近日香港政局確不穩，如果在27000點以下買咗貨，真係冇乜理由唔先沽為快，鎖定利潤。

事實上，恆指6月的反彈浪，主要由四隻重磅股領導，包括騰訊（0700）、友邦保險（1299）、中國平安（2318）及港交所（0388），或者你可以勉強加埋強勢股港鐵（0066）、領展房產基金（0823）以及中華煤氣（0003），這7隻股份的市值加起來便已達62000億元，而50隻恒生指數成份股巿值是179600億元，上述7隻股份已佔恆指成份股總市值的34.5%。換句話說，只要集中買賣此7隻股份，便基本上可以控制指數的上落，所以大市的波動會久不久殺一次熊証，又久不久殺一次牛証，指數其實是被衍生工具的殺倉盤牽着走，令散戶不容易捉摸。

如果股市好，大家就會買入風險資產，但當大家對後市有戒心，便會不停掃入避險資產，好似黃金已升至近6年新高，美國國債10年期息率跌至2厘，香港的收息股煤氣、地鐵、領展及房託，不斷被掃高，都係代表股市後市有隱憂。

習特會之後，美國容許美國公司可以賣晶片等配件給華為，暫時不會加徴新關稅，彼此計劃重開談判，不過已經過咗個幾禮拜，未定到重開談判的日期，又有少少膠著感覺。美國副總統彭斯及國務卿蓬佩奧更接見了香港反對派龍頭大佬黎智英，中美關係唔係幾對路。

貿易談判好消息未有，貿易戰的影響逐步浮現，吉利汽車（0175） 、建滔化工（0148）及建滔積層板（1888）近日發盈警後股價大挫，相信類似報告陸續有來。此時沽空機構又想混水摸魚，渾水追擊安踏（2020），慌死個市冇壞消息。

其餘有人歸咎國內創科版上市，抽乾市場水源，令內地股市下跌。而香港亦有大型IPO招股，像百威亞太（1876）集資規模有機會高達764億港元，抽走及凍結嘅市場資金，抽高同業拆息，均是令大市下挫的藉口。

技術上，恒生指數昨日裂口低開後，已失守10天及20天線，今天星期二指數在50及20天線附近掙扎，兩者水平大概是在28160點附近，今天收28116點，微穿這個水平，如果未來明顯失守，指數可能要回補6月19號的上升裂口，要下試27584點。要睇睇未來一兩日大市守唔守得到了。

恒生指數未必能守得住20及50天線，雅虎圖片

尚風

** 博客文章文責自負,不代表本公司立場 **

今日商台人生交叉盤20周年特輯，陸叔訪問前財爺曾俊華。

陸叔：John, 你真係犀利，退咗休之後仍然活躍，你同時在商台、港台電視部及新城電台開咪，係唯一一個可以跨越三個台做節目嘅名人。自回歸後已經超過20年，你做過咁多職位，有啲乜嘢可以同我地分享一下。

曾：過去20年真係好波動，回歸之後，我先喺倫敦做商貿代表，然後返香港做海關，之後歴任發展局、經濟商貿、特首辦，然後做咗財爺10年。我慶幸係呢一段時間，香港並無出現太大嘅問題，我做財爺嘅時候，每一件事我都會作出適當嘅準備，每個禮拜我都會同金管局陳德霖、港交所李小加以及證監高層傾計，睇下有啲乜嘢重要嘅事將會發生，好似每逢到季尾或者年尾嘅時候，資金特別緊張，我會睇吓有冇D乜嘢需要準備，通常我會做一啲壓力測試（stress test), 確保銀行同埋證券行嘅資金周轉冇問題。呢類咁嘅Scenario planning我會做好多，有時啲同事會埋怨是否需要做咁多，不過，我向來都對每件事作出充分準備，以防有乜嘢突發事發生。

陸叔：你在港英政府時代做政務官，回歸之後做問責局長，你覺得有乜嘢唔同？

曾：我覺得分別唔大，政策都係由下而上，先做研究，分析唔同選擇嘅好壞，再加入一啲政治及宏觀經濟嘅元素，平衡各方嘅利益，然後做出決定。工作量方面，以前港英政府時代，同時是D8司級官員，又是局長，工作量較多，現時行問責制， 司級官員同埋局長身份分開，理論上工作量冇咁大。

陸叔：你宜家已經退休，未來有乜嘢大計？

曾：老實講，我冇退休呢個概念，宜家啲人咁長壽，我係火麒麟周身癮，其實仍然有好多嘢想追求。你知道我在麻省理工（MIT)畢業，特別對理科同科技情有獨鍾，其實早在70年代，我已經對人工智能（AI)好有興趣，我一路都有留意關於AI同機械人嘅文章，未來我會多啲參與同年青人合作嘅嘢。我最近做咗一間虛擬保險公司嘅顧問，是FINTEC的領域。

我做財爺嘅時候，其實政府在科技園成立咗一個香港應用科技研究院(ASTRI)，果陣時Blockchain 仲未有中文名。香港三間發鈔銀行其實一直在推廣，市場發展要一步一步，其實網上銀行online banking都係FINTEC（金融科技）。

陸叔：有人話深圳嘅支付系統發展得好好，出街唔使帶現金，香港落後咗咁多，不如唔好做啦，你同唔同意呢？

曾：我絕對唔同意，深圳電子支付，不用帶錢出街，其實香港都可以早啲做到。不過，各個地方嘅結構文化不同，好似美國加州，最近已經唔批准以面孔識別。我做財爺嘅時候，冇特別推動電子支付，因為香港好注重個人私隱，當時嘅科技未必能好好保障個人嘅私隱度。當然，宜家保密度高咗好多，香港宜家推，其實先至係適當嘅時候。

曾俊華下決策前，都會做足準備，資料圖片。