香港鋪租愈來愈貴，好多後生仔想創業時都要左度右度，但Jack收到風，有位善心人竟然無條件捐出，一個位處佐敦鬧市的鋪位，話要支持班咁有膽識嘅後生仔，呢啲善心人認真少有！
善心人捐出右邊鋪位（青年協會提供圖片）
地鋪喺上海街28號恆邦商業中心地下2號舖，實用面積都有約莫700呎，係由一名善心人士捐出，不過佢想低調啲，點都唔肯接受採訪。
Jack八到些少料，呢位善心人係位女士，鋪位之前賣過玩具，丟空咗一排，佢主動聯絡香港青年協會，話自己本身有能力，又有鋪位放租，想幫吓青年創業，就無條件捐出鋪位俾青協。
青年協會提供圖片
據知呢位女士並非「富婆」，但愛心同善心就認真「爆棚」！今次亦係青協首次收到呢類捐助，雙方傾完之後，就決心幫吓有意發展餐飲業嘅後生仔，青協「香港青年創業計劃」會喺星期一（19日）開始接受有意經營飲食業務的青年申請鋪位，以月租一蚊，租呢度嚟開食肆，為期兩年。
對象揀係餐飲業，因為食肆創業成本高，所以想幫佢哋，鋪位喺正佐敦，應該都有得做。咁呢區鋪位值幾多錢呢？Jack問過啲熟悉行情嘅朋友，話同區同類地鋪，月租都要五、六萬蚊，而家月租一蚊，計埋真係慳到唔少。
青協督導主任鄧良順Gary話，創業可能是唔少年輕人夢想，但香港鋪租貴，青年人自然會遇到唔少挫折挑戰，如果獲得各界支持同埋肯定，以實際行動扶助創業新力軍，相信可以為經濟發展注入新力量。
想申請嘅年輕朋友，要喺18至35歲，有一年內開業實際創業構思、或已開業不多於三年嘅完整商業計劃同埋營運報告；青年人要有開創及經營個人業務的決心，但缺乏開展業務資金；有飲食專業技能嘅朋友仲會獲優先考慮添！截止日期就係三月十六號。
Gary仲同Jack 講，希望有多啲善人心考慮捐出空置鋪位，等多啲後生仔有創業機會。
講開青協嘅「香港青年創業計劃」，到今年七月就推出咗十年，每年三、七同十一月都接受申請。成功申請嘅青年會獲免息創業貸款、創業導師，業務支援同埋人際網絡等支援。計計埋埋，至今已批核155項業務計劃，有超過250名青年受惠，貸款數目仲超過900萬添！
講到創業，特首喺施政報告，亦提出設立三億「青年發展基金」，其中一個用途係支持非政府機構協助青年創業，希望俾多啲機會一班年輕人啦！
Jack
** 博客文章文責自負,不代表本公司立場 **
