風險遊戲

有網友Persie留言提問:「我每週都追看Bastille Post 的陸羽仁博客，覺得非常適合自己的投資路向。希望陸sir可以指 點一下退休人士的資產分配。假使一個55歲退休人士，擁有一個680萬自住單位和800萬現金，可如何投資？以55歲來計， 是否仍可以放 $8M X 45% = $3.6M 在股票市場？先謝陸sir 解答。」

我後來話會寫篇文答佢，佢再留言:「非常多謝陸sir不吝賜教， 如果早廿年認識陸sir我的人生一定好唔同，但幸好終於識到了。祝福陸sir身體健康，心想事成，理想達到，闔家平安， 恭喜恭喜！我以$4.7沽出了全部#405(越秀房託)，已經在 $3.65-$3.85補回。都想買多一隻房託，現留意# 778(置富產業信託)。我跟#823(領匯)有緣無份， 每次買都賺，但現在卻一股領匯都沒有。」

一般人講投資，主要講機會，講一個冧巴，投射出一個機會， 通常會講到係發達機會。

我講投資，先講風險，再講機會， 講冧巴時已考慮咗隻股包藏的風險，會執笠的高風險股，或者會1供 17、再2供25的高風險股，盡量唔會講。我認為專業的投資者， 主要係把握風險，把握得好，先會成功。

就Persie的提問，退休人士和年青人投資的分別， 主要是承受風險的程度。年青人資產少，未來就業獲取收入的時間長，所以可以承受高風險的投資。 中年人可以承受中度風險。退休人士只可以承受低度風險， 因為退休人士已無新收入來源，一定要保存資本才可以產生收益，支持老年生活。

以風險度為例，100%投資小型股票的組合，當然是高風險。 相反地，100%投資本地貨幣短期高評級債券(3年期或以下)，就是低風險(但息率也低而且少賣俾散戶)。但我也要提示大家，我講「本地貨幣短期高評級債券」，即係相對地非本地、年期長、 評級低的債券，風險也可以好高，例如買內房股派十幾厘息的債券， 風險和買內房股一樣咁高。大家亦要知今年美國10年期國債利息如今低到2厘，即是債券價格已經升到好高，所以債息才咁低，所以唔好以為買債券或債券基金好安全。

跳去講Persie的個案，退休宜保守，但Persie有自住單 位，料已供滿，撇除租金開支，每月支出有限，800萬現金， 若每年能產生5%回報，每年40萬，每月可用3.3萬， 生活舒泰。我覺得可以用50%投資股票，但不宜投資中小型股票， 100億市值以下可以不投資，以減風險。

405越秀房地產可以係一隻核心投資(可佔50至75%， 因為等如買樓，但如今無貨者要等回吐才好吸納)， 若非升得太高可以長揸(上次升到4.7元時放走也是明智之選)，主要因為市帳率只有0.73倍，有27%資產值折讓，主要資產是廣州國金中心，廣州經濟增長較香港快，但樓價較平，長線租金上升空間較大。

相對地778(置富產業信託)的風險明顯比405高，其市帳率有 0.86倍，資產值折讓率只有14%，加上香港物業較貴，而且置富的物業組合不太優質，香港租金長線上升空間有限，所以長線不太看好。要買只宜小注，不宜超過405持貨量四分之一 ，也不用看得太長線。

股票組合少部份資金如25%可以低吸指數股(如2828)， 目標是食10%，只要較有耐心入得較平，不太難做到。現在股價不夠平，要等回吐時候。

記住關鍵是研究風險有多大，問一問萬一股價跌了下去， 長揸有無問題，無問題的股票才好買。 說到底退休人士不能冒大量失去本金的風險了。

陸羽仁

** 博客文章文責自負,不代表本公司立場 **

朋友Anna是一個退休公務員, 我知佢經常都買吓賣吓股票, 最近有一次同佢飲茶, 佢哭喪著臉地同我講唔知點解佢自己係一枝燈,買股票經常都是輸多過贏, 我問她買股票的習慣是如何, 是否有做功課？

佢話佢退咗休, 拿着一筆退休金, 都好努力做功課, 日日刨報紙去買股, 出出入入夾埋舊年都係輸少少錢, 雖然輸得唔多, 但唔知點解咁樣, 特別是去年下半年國企股都炒得好行, 但她買的國企股買得遲贏得唔多, 其他股又輸得比較多, 拉埋都係要輸錢。

我詳細了解佢買股的習慣, 發覺佢都係人講咩佢買咩, 通常係睇住報紙頭條嚟買股。佢買股的組合, 大股中股細股都有, 我問佢點解買中型股小型股, 佢隻隻都頭頭是道講出一個理論, 呢個就係因為國家有咩國策攪新能源, 果隻就係有個政策一帶一路攪公路,呢個又話高鐵走出去, 那隻又話聽個名「中國乜乜」都覺得係行業龍頭(佢唔知國企除咗幾 千億市值的超大股之外，都無「中國」做名), 全部都有個理論, 但細細睇返佢買股的時機都係比較差, 由於睇報紙買股, 通常係出到報紙頭條的時候, 那些股都炒得比較熱升得比較高, 唔升高就唔會做新聞, 到做新聞特別係財經版頭條甚至係頭版頭條的時候, 隻股甚至整體大市都升到好高啦。

佢就係揸住自己的退休金, 有少少騰騰雞雞, 開始時唔敢買, 到見到報紙買到行哂出哂頭條時, 先至走去買, 通常係唔摸頂都已係近高位, 好多股票升咗好多佢走去買, 買完再升多幾個巴仙又唔夠水位走, 到碌落嚟時又傻傻地坐係度, 好喇到碌返咁上下, 跌咗十幾二十個巴仙的時候, 又見報紙做頭條, 通常這時候個股市都比較衰,講過股又出現一些極壞的消息 覺得全行業一切黑暗, 中國經濟又爆煲, 銀行又會崩潰, 高鐵又走唔到出去, 反正全部都係衰野, 到呢個時候佢通常會忍唔住走去沽貨喇？

佢坐落賺到錢的都是大股, 輸錢的好多都係中型股小型股, 買的時機係高買, 賣的時機係低沽, 佢所講的做功課, 都只是睇吓報紙而已, 年報都無睇過一本, 幸好佢已無買那些蚊型股(唔少放消息出來話有得炒是想高位派貨) 但總體來說, 佢都係走在人後面。

我比Anna的建議是如你以往買股是贏好多錢的, 就順住個方式去做, 如果過去買親輸多贏少, 其實就是你買的方法是錯, 首先要改變方法才會成功, 比較容易掌握的是不要隨大流, 不要睇報紙的頭條買股, 可能調轉頭係報紙唱到行哂唱到好好時要沽貨, 唔沽哂都要沽一半, 到報紙話到好衰, 好似呢個星期初中國又話出口大跌, 又話1月CPI通脹率得返0.8%, 呢個時候壞消息已出得六六七七, 呢個時候反而是買股的好時機。 我叫佢要有逆反的思維, 買股票的回報就會好些。