一枝燈

朋友Anna是一個退休公務員, 我知佢經常都買吓賣吓股票, 最近有一次同佢飲茶, 佢哭喪著臉地同我講唔知點解佢自己係一枝燈,買股票經常都是輸多過贏, 我問她買股票的習慣是如何, 是否有做功課？

佢話佢退咗休, 拿着一筆退休金, 都好努力做功課, 日日刨報紙去買股, 出出入入夾埋舊年都係輸少少錢, 雖然輸得唔多, 但唔知點解咁樣, 特別是去年下半年國企股都炒得好行, 但她買的國企股買得遲贏得唔多, 其他股又輸得比較多, 拉埋都係要輸錢。

我詳細了解佢買股的習慣, 發覺佢都係人講咩佢買咩, 通常係睇住報紙頭條嚟買股。佢買股的組合, 大股中股細股都有, 我問佢點解買中型股小型股, 佢隻隻都頭頭是道講出一個理論, 呢個就係因為國家有咩國策攪新能源, 果隻就係有個政策一帶一路攪公路,呢個又話高鐵走出去, 那隻又話聽個名「中國乜乜」都覺得係行業龍頭(佢唔知國企除咗幾 千億市值的超大股之外，都無「中國」做名), 全部都有個理論, 但細細睇返佢買股的時機都係比較差, 由於睇報紙買股, 通常係出到報紙頭條的時候, 那些股都炒得比較熱升得比較高, 唔升高就唔會做新聞, 到做新聞特別係財經版頭條甚至係頭版頭條的時候, 隻股甚至整體大市都升到好高啦。

佢就係揸住自己的退休金, 有少少騰騰雞雞, 開始時唔敢買, 到見到報紙買到行哂出哂頭條時, 先至走去買, 通常係唔摸頂都已係近高位, 好多股票升咗好多佢走去買, 買完再升多幾個巴仙又唔夠水位走, 到碌落嚟時又傻傻地坐係度, 好喇到碌返咁上下, 跌咗十幾二十個巴仙的時候, 又見報紙做頭條, 通常這時候個股市都比較衰,講過股又出現一些極壞的消息 覺得全行業一切黑暗, 中國經濟又爆煲, 銀行又會崩潰, 高鐵又走唔到出去, 反正全部都係衰野, 到呢個時候佢通常會忍唔住走去沽貨喇？

佢坐落賺到錢的都是大股, 輸錢的好多都係中型股小型股, 買的時機係高買, 賣的時機係低沽, 佢所講的做功課, 都只是睇吓報紙而已, 年報都無睇過一本, 幸好佢已無買那些蚊型股(唔少放消息出來話有得炒是想高位派貨) 但總體來說, 佢都係走在人後面。

我比Anna的建議是如你以往買股是贏好多錢的, 就順住個方式去做, 如果過去買親輸多贏少, 其實就是你買的方法是錯, 首先要改變方法才會成功, 比較容易掌握的是不要隨大流, 不要睇報紙的頭條買股, 可能調轉頭係報紙唱到行哂唱到好好時要沽貨, 唔沽哂都要沽一半, 到報紙話到好衰, 好似呢個星期初中國又話出口大跌, 又話1月CPI通脹率得返0.8%, 呢個時候壞消息已出得六六七七, 呢個時候反而是買股的好時機。 我叫佢要有逆反的思維, 買股票的回報就會好些。

陸羽仁

** 博客文章文責自負,不代表本公司立場 **

最近與一位上市公司董事食飯，他提到自己的投資經驗， 我覺得可以和大家分享一下。

這位朋友的公司規模不小，市值超過百億。 席間講到公司的起起跌跌，以及公司老闆的能力。 朋友對老闆有很高的評價，形容老闆能夠掌握機會，歷經風浪， 挨過低潮，且覓得大基金入股，未來前景亮麗。

不過，朋友講完公司的威威史之後，不忙加上注腳， 表示不要聽完他對公司的盛讚，便去買公司的股票， 因為二線公司的股票很難炒，他自己都沒有買。他表示只買了工行（ 1398）及建行（939）兩隻內地銀行股。

我回家後看看他的公司的股價圖，走勢真的很強勁， 一年多一點已升了四倍。 我覺得朋友叫我不要買他公司的股票是出於一番好意的， 因為雖然這家公司經營得很好，但可能已經在股價升幅中反映了， 不是那麼容易炒。

這位朋友說他對投資的回報要求不高，期望每年大約10%已經滿意 ，所以他把資金只投入工行建行兩隻股票上。 我說很多人都睇淡內銀，為何他卻卻獨沽一味，只買內銀呢？ 他說公司在國內有很多業務，對於內銀前景，他不知道， 只知道內地銀行生意不憂做，很多公司想借錢也借不到， 所以短期睇唔到內銀有問題，長期就唔知啦。

例如建行，5.8倍市盈率（PE），利息5.9厘， 盈利或許沒有增長，但穩定經營應該沒有問題，買佢每年可以穩收近 6厘息。他說，他每年都做差不多的工作，多數時間等收息， 收息以後便伺機出貨。由於很人買內銀股都是等收息，收完息， 股價已差不多了，是時候沽貨了。沽了以後，等到五窮六絕的月份（ 五、六、七月）再買，周而復始。這樣做，回報會很高嗎？ 當然不會，但每年賺個十巴仙左右，應該沒有問題。

我覺得這位上市公司高層，其實已經看透了股市這個局。 例如他自己的公司，前景雖好，但股價已經反映了大部份， 在高位追入，誰知一兩年後公司的狀況會否逆轉呢？ 倒不如持有大公司股票，做個笨小孩，不要求高，穩穩陣陣， 反而在過去幾年都有增長。

我想這種笨方法不太適合年青人，他們大都喜歡搏殺， 一年只有百份之十幾的回報，會覺得食之無味。不過， 對中年人而言，年輕時可能也搏過，也輸了不少錢， 人到中年才知道，不輸錢已經是最大得著，若有穩定的回報， 笨些少也無妨也。

陸羽仁