仁哥被追交律師費

民主黨何俊仁同「長毛」梁國雄，在2012年指特首梁振英參選期間，就大宅僭建問題作失實陳述，分別提出選舉呈請及司法覆核，想推翻選舉結果，結果一齊敗訴。

件事仲有下文，鐵頭仁同佢的律師拗唔掂數，律師事務所周二入稟高院，向鐵頭仁追討律師費，並要求法庭評估當年的訟費。入稟狀無透露具體金額，何俊仁亦唔肯講金額係幾多，只係話同律師行開的價錢有分歧，但有傳高達200幾萬。根據司法機構的公告，案件在下月14日提訊。

鐵頭仁當日玩一玩，而家都有排煩啦。

Ariel

** 博客文章文責自負,不代表本公司立場 **

清晨傳來葵涌8號貨櫃碼頭迴旋處發生奪命車禍，2名國泰男機師在「波子」(保時捷跑車)上，失控撞壆被活活燒死，真係令人心痛又惋惜。

係人都知在香港考機師好難，考到入國泰更加要係精英中的精英，兩個死者都係得27歲，放假期間約埋幾個機師，半夜三更走去貨櫃碼頭吹水，姓黃司機突然興起想揸架靚波子去兜風，友人贈興上車，估唔到就咁上咗部「烈火戰車」。

出事的波子Cayman S，馬力325匹、極速283km，聽講行貨車賣成百萬，就算二手都要幾十萬，睇報道同行幾個機師係一人一部靚車，做機師似乎都真係好有米。

Ariel搵番國泰份年報睇吓，睇完真係「哇」一聲，以2013年計（2014年未出），年薪過百萬飛行人員數目成2300幾人，比其他職員只有500幾人年薪過百萬，足足多成三倍幾，最高薪那位飛行人員年薪仲高達450萬至500萬元，勁過好多公司CEO。果2300幾個年薪過百萬的飛行人員中，相信大部份都係機師，所以國泰都有過千名年新過百萬的黃金打工仔機師啦。

難怪做機師係好多後生仔的夢想，著起套機師，即刻「Cool魔」、「Sam哥」上身，人工高社會認知地位又高，真係揸靚車、溝死女。不過，揸得掂飛機唔代表乜都攪得掂，本來後生、叻仔、有錢，前途無限，今次呢單車禍，真係令人好遺憾。