雖然我哋細細個就知道唔應該講大話，但喺感情的世界裡，你虞我詐好平常，有時男男女之間都要講吓氹對方開心吓。當然啦！最重要係識得分邊啲係真話，邊啲係大話。芝芝縱橫情場多年，今日就同大家分享吓男人成日掛喺咀邊的大話。
1.我唔在乎你的容貌
呢句係男人大話字典中最呃人的一句，女人似花，男人像蝶，花愈香而蝶愈旺，千年不變。
2.我乜都應承晒你
男人激動時講嘅嘢千祈唔好信到十足，佢哋hi起上嚟會iron man 上身，以為自己萬能。但佢哋好快又會清醒返，因為姊妹們好快就會聽到佢哋補返句︰「除咗呢件事，我乜都應承晒你。」
3.你係我嘅唯一
「我得你一個！」呢一刻咋卦！ 女人有政策，男人有對策，女人似乎真係無可能永遠綁得住啲男人。
4.我發誓
男人發誓，千萬別輕易相信，佢哋發誓真係當食生菜，對天發誓只不過是佢哋欺騙各位善良絲打嘅手段，記住唔好信！
5.係我錯啦！
女人總以為男人認錯，自己就贏，殊不知呢啲只係再次受騙的開始。女人好少認錯，可惜偏偏總是錯上加錯。
6.我戒啦！
戒？佢真係戒到？還是放長雙眼，觀察一排再下定論吧！十個男人，七個好煙、八個好酒、九個好色，還有一個樣樣都好。要是話戒就戒，那些煙啊、酒啊、bar啊！仲有邊個幫襯？
7.我一定改
一定改，保證，又是保證，仲信？
8.我會娶你嘅
結婚要付諸行動。講得愈多，娶你的機會愈細，基本成反比。
9.我無呃你
呢句話根本就是又呃你一次，罪上加罪、罪不可赦。
10.愛你一萬年
你估佢係劉華咩！女人唔係烏龜啊，點活到一萬年？姊妹們都知道男人靠得住，豬公（我鐘意豬公）都會上樹。可惜女人依然會仆到去受騙。
驟眼睇，姊妹們或許太易受騙，我哋要站起來，拆穿男人嘅大話！
芝芝‧知性
** 博客文章文責自負,不代表本公司立場 **
失戀，每個人都試過。咁你失戀後會傷心幾耐？一個星期？一個月？定係一年？
前排芝芝跟閨蜜Vivian食飯，我問佢失戀後要傷心多久，才能從痛苦中走出來？Vivian話：失戀時間是你戀愛時間一半。咁即係假如拍拖一年後散咗，就要半年先能夠走出失戀陰影。芝芝忍不住問：咁會唔會長咗啲呀？嗰啲拍拖十年八載的人分手，咪要用四、五年來品嘗失戀的痛苦？如果係咁，上天太殘忍了！
之前睇新聞見過，上海有公司推出「失戀假期」的福利，員工失戀可有五日假，公司話咁做係為了讓員工開心啲，照咁睇，失戀傷心五天都好正常喎！
芝芝記得以前都問過當時的男朋友︰「如果我離開你，你會難過多久？兩個禮拜？」點知佢諗都唔諗就答︰「兩個禮拜太無人性啦！」我又問：「兩個月？」他點點頭說：「差不多啦！但都唔係話一夠兩個月就好，過程係緩慢的，只是不會再好傷心，但到某天諗返起，都係會傷心。」雖然我哋最後都分咗手，亦唔知佢最終傷心咗幾耐，但呢個問題不禁令我諗到，每個人諗法都不同，即使同一個人每次失戀，傷心期限亦會唔同。呢啲涉及到當時兩個人感情點樣？係唔係好投入？中間發生過啲咩？係唔係初戀？是主動分手定係俾人飛？……
如果是初戀，失戀者又感性，通常就會傷心得耐啲，芝芝真係有朋友話試過傷心兩、三年。亦有朋友話傷心時間長短，同拍拖次數成反比，即係拍多幾次，失戀時就更識得調節情緒，將痛苦時間縮短。
失戀的痊愈是緩慢過程，多數人會一天天慢慢好起來，有新對象、新朋友、新生活，漸漸就會諗少啲過去，即便第日再諗起，都唔會再咁痛苦。
不過，有啲人始終跳唔出失戀的痛苦，繼續沉淪喺撕心裂肺的傷心中，佢哋成日拿起電話按下對方號碼，但在撥通前掛斷；不停地查看對方的fb、微博，不放過對方每一次更新，捕捉每粒文字背後的深意；他們聽著苦情歌，覺得每句歌詞都為自己而寫；他們喝酒、失眠、流淚，硬係要捉緊回憶唔肯放手，一提起往事依然會喊，痛苦似乎沒有終點……
記得早幾年有個絲打失戀，拉住我同幾個老友出去大吃大喝、瘋狂購物、通宵唱K，她點了一首又一首傷心的情歌，邊唱邊哭，我們一直安慰。點知佢唱完之後話︰「我無咁傷心架，不過失戀總有失戀的樣子。只有失戀先有借口放縱自嘛！」原來她的痴情與傷心只是偽裝。
失戀傷心得耐，可能係對對方的尊重，但絕對是對自己的殘酷懲罰；短暫傷心則是對尊重和愛惜自己。各位，你會揀邊種？
