有電台早前報道， 壹傳媒平面媒體行政總裁兼《蘋果日報》 社長葉一堅在該報的每日「鋤報會」會議上， 表示集團未來將改名Next Digital，以反映向數碼媒體發展的決心， 並會全面放棄印刷媒體。不過昨日壹傳媒老闆肥佬黎在遊行露面時， 就否認有此事。
據《蘋果日報》報道，昨日問肥佬《蘋果》係咪放棄紙媒， 肥佬黎回應：「唔會，唔會咁快死晒嘅」，繼而指：「唔會、唔會、 唔會、唔會，大佬，你唔好亂噏啊」， 肥佬黎講完六個唔會之後又話：「壹傳媒完全無紙， 都會好多年後囉，我諗十零廿年後囉會，十零年後囉，希望。」 問起有人話壹傳媒會由Next Media改名做Next Digital，肥佬黎話「事前唔知道」，又重申：「我哋係做d igital，但唔係唔做報紙」。
肥佬黎呢句「事前唔知道」，又有少少可圈可點喎，只係話「 事前唔知」，唔係話「絕無其事」。傳聞事件主角葉一堅阿堅哥， 亦指消息「九唔搭八」。同樣唔係全面否認。
肥佬黎已辭任壹傳媒主席，只是大股東，對壹傳媒的事情，「 事前唔知道」唔係好奇。會唔係會開會大家吹吹水， 件事未最後決定，爆咗出街外間反應唔好，結果又縮沙呢？好似建制派WhaysApp漏料事件，那個「著短褲好型」 的嫌疑男議員，亦因為被記者問起件事時無發毒誓否認， 被認定是漏料者。肥佬黎同堅哥都無發毒誓否認， 花生友就會講四個字:「可疑呀！」
小鯊
** 博客文章文責自負,不代表本公司立場 **
看朋友轉發過來DBC數碼電台的一段報道， 話壹傳媒可能改名叫Next Digital(壹數碼?)
DBC昨日如此報道，「本台收到來自壹傳媒(00282) 內部人士的消息，壹傳媒平面媒體行政總裁兼《蘋果日報》 社長葉一堅在每日的『鋤報會』會議上， 表示集團未來將改名Next Digital，以反映向數碼媒體發展的決心， 並會全面放棄印刷媒體，不過未有提到具體執行時間及具體安排。 消息又指，蘋果動新聞過去幾個月有可觀利潤，而且每月增長， 因此集團將集中資源發展數碼媒體。」
雖然唔見《蘋果日報》自己有報道，但DBC呢單嘢好似係堅料。 若壹傳媒連名都改埋，叫Next Digital，可見佢地瞓身搞數碼的決心。由1995年香港《 蘋果日報》創刊開始，肥佬黎先瞓身搞香港《蘋果》， 然後再瞓身搞台灣《蘋果日報》，再瞓身搞台灣電視， 結果兩成一敗，搞兩份報紙成功，搞台灣電視輸晒， 唔知呢舖佢再瞓身會點。
搞數碼媒體係傳媒行業大趨勢，但肥佬黎的策略獨特之處係瞓身， 既然瞓身數碼，本來衰衰地的報紙和雜誌業務，因為公司策略轉移， 難免更衰。
壹傳媒早前公布截去今年3月底止的年度業績，盈利減少31.5% 至1.64億元，當中「報章出版及印刷年內盈利」減少27% 至2.16億元，數碼業務首次扭虧為盈賺3742萬元。
細心睇「報章出版及印刷」一項年內盈利少了7910萬元， 係集團整體盈利倒退的主因，雖然香港和台灣報刊收入都跌， 但香港香港《蘋果日報》又真係跌得好勁，香港《蘋果》 廣告去年少了1.57億，由對上年度的5.01億， 跌到這個年度得番3.44 億，唔見呢1.57億，可以話係壹傳媒業績不前的一大死因。 數碼業扭虧有3740萬盈利，暫時未補得番報紙急跌條數。
曾幾何時，《蘋果日報》在3幾年前，還有6億以上的廣告收入， 是香港廣告收入第二高的報紙，幾年間就跌咗近半，蒸發3億以上， 下跌速度都好驚人。若然宣布集團改名，等如正式放棄報紙、 雜誌業務，你自我放棄，廣告自然跌得更快。最後佢就好似係一個「 生死時速」的遊戲，到底報紙雜誌廣告跌得快， 還是數碼收入升得快呢？這顯然是肥佬黎繼台灣電視後另一場豪賭，機會和風險並存。
還有一個問題，香港《蘋果日報》1995年創刊， 估計它的廣告收入在2010年左右上高峰，之後逐回落， 即是享受15年後開始出現衰變。數碼媒體變化如此快， 究竟蘋果網可以享受多少年收入高增長，又在何時開始出現衰變呢? 2008年時Nokia還是世界最大的手機供應商， 5年後它已接近消失，諗起數碼世界的變化，都幾得人驚架。
