我上周一在《頭條日報》的專欄內提到，近期內地樓市升溫， 內房股可以炒一下。及後有網友留言問點解咁睇好內房股， 因為內地樓市的基本因素仍然唔得，內房股唔值得睇好咁話。 我相信這位網友誤會了我的意思，不妨在這裡詳細講講。
買投要分開「投資的我」和「投機的我」。投資睇長線， 投機睇短線。我對內房股所謂的睇好，只是從投機的角度出發， 並非覺得內房股長線值得看好。
內地經濟一沉未起，生產物價指數PPI，連跌近四年; 採購經理指數 PMI，長期處於50的榮枯線之下。睇睇這些數字， 就知道國內經濟搞極都唔得。經濟原本唔好， 又遇上年初股市及人民幣匯價急插，頭經濟唔好， 猴年開波便中了一棍，令到阿爺非常緊張。
阿爺去年12月開始話催谷樓市去降低庫存， 見到股市同人民幣匯價滑坡，更加強要谷起樓市的逼切性。 阿爺連番出招，先將買樓首付成數由兩成半降至兩成， 其後又調降買樓契稅，這些措施固然會對樓市有幫助， 但樓市突然升溫，搞到很多人通宵排隊買樓的真正原因， 並不單單因為這些政策。實情是阿爺幕後大力放水，催谷樓宇貸款， 令到銀行可以放寬樓宇貸款。
我同意要承托樓市去支援經濟， 但對於內地很大力地催谷樓市去谷起經濟，我卻有點擔心， 估計在三個月至半年的短暫時間內，內地樓市會有一浪急升。 問題係樓價長期走勢與經濟掛鉤，短線則受到資金供應等因素影響， 經濟差，樓價急升，雖然短期內經濟會有些改善， 但經濟不能單靠樓市上升就能好起來，樓市升幅與經濟增長背馳， 樓市愈升得快、升得高，製造出來的泡沫將愈大，愈容易爆破。 阿爺今年催谷樓市，狀況與去年催谷股市救經濟一樣。
既然阿爺谷緊樓市，何妨短炒一下內房股。不過， 明知道樓市正在起泡，就不要以為內房股長期都會得， 買入作長線投資。我長線唔睇好內房，內地樓市愈升得急， 內房有更大隱憂，但短期炒作一下，我又覺得可以。 買股不能只看基本因素，你或許覺得某股票的基本因素不好， 但在資金催谷下仍會上升，你彈佢都無用，不如順勢走一轉， 睇位落車豈不更好？
陸羽仁
** 博客文章文責自負,不代表本公司立場 **
周四股市又跌300點，恆指跌到18888點，雖然有咁多「發」 ，但股民唔發，唔少股民輸到眼光光，非常沮喪。
傍晚時候，老友Jenny打電話問功課，佢話買股受重創，股票組合唔見咗三成，心情好差，想停止月供股票。恆指18000 幾點，已經跌到很低，但中國經濟還未有起色， 環球金融市場亦有點動蕩，我當然不敢說股市不會再跌，特別係今年上半年的確還有下插的空間。
我問Jenny是不是發生了什麼事，要急需用錢。據我所知，Je nny身為高級行政人員，年過40，又未結婚，每年收入超過「 一球」，一般情況下，使錢無憂。了解情況之後，原來Jenny並非等錢用，只是心情不好，又覺得股市沒有希望，所以想停供股票。
我跟她分析月供股票的好處。這種方法看似很蠢，只是以固定金額定期買入股票。這種方法不能讓人短期內發達，但又唔會令人輸大錢。因為使用固定金額月供，市升時，買到的股票比較少，但市跌的時候，買到的股票又會比較多，例如與去年28000點時比較，同一筆錢，現時可以買多35%的 股票。這有點低位買多的味道。
一般股民的習性都是在大市上升的時候想買，跌的時候便想沽，然而，想要長線賺錢，做法正好相反：升得多便沽，跌得多就買。 不過，要散戶選好時機入市，並不容易，人的心理就係咁，見到這種咁差的市道，很難買得落手，況且，買入之後再跌， 感覺更差。萬一18000點買入，跌到16000點， 心理已經頂唔順，要沽番出去。
月供則不然，長線儲貨，關鍵在於可以拉勻買入成本，長線而言， 揸股票都會勝過揸現金。現時存錢入銀行，利息少過1厘， 而大股基本上都有2、3厘息，光息口便優勝很多，仲未計股價長線還會向上。固然，這個講法的背後有幾個假設。
第一，這不是一個十年以上的長期通縮市。是長期通縮市的話， 揸現金好過揸投資產品；第二，中國股市不會一沉不起，如果中國將會一直衰落去，由於香港股市有很多成份股是內地股票，港股不會有運行。長線而言，我對對中國經濟仍然是樂觀派，睇好中國這個有13億人口的市場，但短線則認為中國經濟還要調整多一、兩年。現時定時買入，拉勻成本，睇幾年，將有合理的回報。
當很多人對股市很悲觀，連月供都想停埋的時候， 這不是沽貨的時候。
