仁哥賞女 高登逐個起底

做到咁攰攰哋，估唔到比平時密密實實、老老實實的仁哥會為我哋帶來咁清冷的驚喜，真係爽呀！

見到仁哥睇咁多女，全部都係祖國佳麗，真係分唔清邊個打邊個，小鯊好身痕咁想逐個去查，查到眼花，搵極都搵唔齊，點知轉頭一睇，天下無敵的高登仔，已經做晒我哋想做的嘢。

高登起底組已經將仁哥睇過女，一張張搵番出來，仲放大俾大家睇清楚。至於係咪高質素到要冒死喺立法會睇，就見仁見智喇。

小鯊

** 博客文章文責自負,不代表本公司立場 **

《都市日報》新老闆入主後動作多多，最近有猛將加盟，請咗

Miranda Chan加盟做 COO，佢做過《蘋果日報》和《星島日報》高層，在銷售和管理方面都好有經驗，《都市》搵咗佢實在得一強助。

《都市》新老闆黃浩仲對媒體話，想投資工廈物業做公司總部，又想自建印刷廠，用5 億至6 億元去投資金額不輕，務須小心審慎咁話。

《都市》新老闆一入場就話用5、6億自己起廠，都幾有雄心壯志，行內人話「像真度」比《晨報》更大，關鍵係《都市》已亮出幕後水喉，《晨報》雖然傳6月16日創刊，但仲唔知邊個出水。《巴士日報》早前報道過阿水哥郭炳湘有意投資《都市》，而水哥的發言人亦不否認，咁講可以話變相證實咗《都市》的幕後支持者。有咗水哥呢枝超級水喉照住，唔好話5、6億啦，10、20億都濕濕碎啦，邊個夠膽質疑水哥支持的報紙無水。

雖然時至今日，仲有人懷疑點解呢啲超級富豪要加入辦報呢個夕陽行列，小鯊就話大家真係唔明白財主的心態咯，佢地大把錢，好多嘢都做得到，但偏偏係見傳媒講嘢未必啱聽，佢地又改變唔到，十分無能為力，到某年某月某日有人叫佢地辦報，佢地會覺得「Why not?」起碼有個發聲園地，講自己喜歡講的話，唔使假手於人，所以就有咁多人入場啦。

小鯊