股神巴菲特日前接受CNBC採訪，教投資者賺錢方法。其中一個建議係叫人唔好長線投資比特幣，因為比特幣唔能夠滿足貨幣的條件，所以唔係貨幣，只係短炒投機品，同當年瘋炒的鬱金香一樣，10年、20年之後就會消失。
比特幣係一種儲存於電腦內的電子虛擬貨幣，於2009年面世，剛問世時非常便宜，1美元買到30個，之後愈炒愈貴，不過真正進入狂炒時代，還是去年殺入了中國市場，受到一班「人多錢多」的中國大媽追捧才開始。去年的頭10個月，比特幣大部份時間仍係徘徊在不足100美元附近。之後短短兩個月，到11月底，比特幣已經炒至1240美元的歷史高位。不過阿爺好似唔想咁多大媽上當，一見比特幣在內地開始流行，馬上出手制止，人民銀行宣布唔承認比特幣係法定貨幣，之後又禁止網上平台用比特幣做交易。比特幣展開第一輪急插，在兩個星期之內大插至520美元，其後輾轉反彈企番定。阿爺呢一插，已經將比特幣泡沫刺穿了。
不過最傷的還是比特幣的交易系統出事，帶來第二輪急跌。2月24日，總部位於東京的比特幣最大交易平台Mt.Gox宣稱因為「系統有弱點」，發現有85萬個比特幣被偷去了，是次丟失的比特幣，相當于所有流通量的7%，總價約合4.7億美元。Mt.Gox在無法完成交收支付下，申請破產。所有在Mt.Gox交易平台上做交易的投資者，由於存在系統內的比特幣和現金都不能提取，即時變成一無所有，損失慘重。比特幣當日被洗倉，價格一度在一小時內由500美元跳水至110美元，雖然之後又彈番上去，但呢種波幅已嚇死人。日前，有美國用家正式入稟法院，控告Mt.Gox詐騙，但睇嚟只能夠得到個吉。
比特幣最近有反彈，最新報653美元，全日成交量也有超過2萬個，反映唔少投資者仍對比特幣的前景有憧憬。不過，我認為比特幣的泡沫已經爆破，比特幣於去年11月底創出的價格，其實已經去到泡沫頂峰。
首先係Mt.Gox出事之後，投資者對交易系統已經失去信心，而泡沫爆破，往往與造假或者交易系統崩盤有關。比特幣唔同傳統貨幣，傳統貨幣由國家發行，有國家做信用擔保人，交易平台係銀行，要搶國家錢、銀行錢，唔係咁容易。比特幣沒有信用擔保人，交易平台係網站，網站保安能力有限，被黑客入侵，頂唔順會執笠，客戶渣都冇。咁低安全度的工具，連炒都好難炒。
比特幣更核心的風險係美國的態度，比特幣之所以受到追捧，源於美國聯儲局天量印鈔，令到市場對美元失去信心，想搵可以抗衡美元的替代貨幣，比特幣就開始炒到癲。問題係比特幣萬一真係興旺到可以挑戰美元地位時，美國會袖手不理嗎？美國政府只要打聲招呼，都有一百個方法搞死呢種交易工具。強如歐元，推出時又話可以挑戰美元，結果都被人搞到死死地啦，比特幣無國家做後盾，想要挑戰美元地位？癡人說夢啫。
比特幣危機盡現，唔會有景，提醒大家不要沾手，有貨就要盡早沽啦，反彈都唔好理啦，怕你走唔切呀。
陸羽仁
** 博客文章文責自負,不代表本公司立場 **
我經常研究不同類型的人的投資習慣，發覺男人與女人的投資手法好唔同。大體上而言，男人傾向進取，女人傾向保守。一、二十年積累下來，男女的投資結果會出現好大差距，男人往往跑輸女人一大截。
可以先從大家最熟悉的「打麻雀」講起。我有個朋友，父母住公屋，好喜歡打麻雀。我問她:「佢地打咗咁多年，究竟係世伯贏多、定係伯母贏多？」她回答，「係阿媽」，至於點解，她話，「可能係阿媽章法比較好吧? 」不過，睇世伯、伯母外表，世伯醒醒目目，意見多多，伯母一臉純良，甚少發話，點睇都係男的醒少少。我突然想起一個角度，再問:「世伯鍾意造牌，定係伯母喜歡造牌？」朋友話肯定係阿爸啦。我又問，「佢地一般打幾大呢？」原來都係「衛生麻雀」，最大四番。
聽到這裡，點解「阿爸輸，阿媽贏」，就好易解釋了。關鍵係機率問題，世伯的打法，基本上用錯了。世伯經常造牌，造牌限制多多，食糊機會就細好多。伯母唔喜歡造牌，雞又食鴨又食，食糊機會就大，兼且食開有條路，會愈食愈旺。如果話打大一點，例如無限番，世伯造牌仲會好些，因為即使輸足八圈，食鋪自摸十番，都有機會一鋪返本。佢地最大打四番，伯母唔造牌，自摸平糊加隻正花，都已經三番啦，使乜造牌? 世伯咁辛苦造牌造到盡，最多都係得四番，點解仲要造呢？
從這個「打麻雀事件簿」，可以得出兩個啟發，第一，凡事都有其遊戲規則，打最大四番的麻雀遊戲，如果唔了解規則，就好似故事中的世伯一樣猛造牌，結果輸錢居多。
第二係男女有別，男人愛冒險，有時為了造大牌，打出都唔食，女人比較穩陣，唔理大細，有得食就食，密食當三番。在好多情況下，女人都比較容易贏錢。將打麻將引伸到投資，其實道理一樣。男人愛炒股，聽到冧巴就落重注，炒出炒入。女人會覺得自己唔識，傾向買大股，睇定先落注，無想過要「搏大霧」，有時甚至長揸唔出入。
買股票可以係投資，亦可以係賭，若然係賭，賭自有其道。長期下來，穩陣的女性，往往比冒進的男人更能夠贏錢。有網友同我呻，他的爸爸最喜歡炒股，就算輸晒成副身家，都要借貴利去炒，即使好好彩贏一兩次，最後都係輸突，但依然樂此不疲，真可以講係典型中的典型。尤其係近兩三年的股市環境，根本無大好過，只是上落市，基本上徘徊於雞糊與三番之間，你猛造牌，想搏中「雙辣」，贏大錢翻身，難矣！
陸羽仁
