我經常研究不同類型的人的投資習慣，發覺男人與女人的投資手法好唔同。大體上而言，男人傾向進取，女人傾向保守。一、二十年積累下來，男女的投資結果會出現好大差距，男人往往跑輸女人一大截。
可以先從大家最熟悉的「打麻雀」講起。我有個朋友，父母住公屋，好喜歡打麻雀。我問她:「佢地打咗咁多年，究竟係世伯贏多、定係伯母贏多？」她回答，「係阿媽」，至於點解，她話，「可能係阿媽章法比較好吧? 」不過，睇世伯、伯母外表，世伯醒醒目目，意見多多，伯母一臉純良，甚少發話，點睇都係男的醒少少。我突然想起一個角度，再問:「世伯鍾意造牌，定係伯母喜歡造牌？」朋友話肯定係阿爸啦。我又問，「佢地一般打幾大呢？」原來都係「衛生麻雀」，最大四番。
聽到這裡，點解「阿爸輸，阿媽贏」，就好易解釋了。關鍵係機率問題，世伯的打法，基本上用錯了。世伯經常造牌，造牌限制多多，食糊機會就細好多。伯母唔喜歡造牌，雞又食鴨又食，食糊機會就大，兼且食開有條路，會愈食愈旺。如果話打大一點，例如無限番，世伯造牌仲會好些，因為即使輸足八圈，食鋪自摸十番，都有機會一鋪返本。佢地最大打四番，伯母唔造牌，自摸平糊加隻正花，都已經三番啦，使乜造牌? 世伯咁辛苦造牌造到盡，最多都係得四番，點解仲要造呢？
從這個「打麻雀事件簿」，可以得出兩個啟發，第一，凡事都有其遊戲規則，打最大四番的麻雀遊戲，如果唔了解規則，就好似故事中的世伯一樣猛造牌，結果輸錢居多。
第二係男女有別，男人愛冒險，有時為了造大牌，打出都唔食，女人比較穩陣，唔理大細，有得食就食，密食當三番。在好多情況下，女人都比較容易贏錢。將打麻將引伸到投資，其實道理一樣。男人愛炒股，聽到冧巴就落重注，炒出炒入。女人會覺得自己唔識，傾向買大股，睇定先落注，無想過要「搏大霧」，有時甚至長揸唔出入。
買股票可以係投資，亦可以係賭，若然係賭，賭自有其道。長期下來，穩陣的女性，往往比冒進的男人更能夠贏錢。有網友同我呻，他的爸爸最喜歡炒股，就算輸晒成副身家，都要借貴利去炒，即使好好彩贏一兩次，最後都係輸突，但依然樂此不疲，真可以講係典型中的典型。尤其係近兩三年的股市環境，根本無大好過，只是上落市，基本上徘徊於雞糊與三番之間，你猛造牌，想搏中「雙辣」，贏大錢翻身，難矣！
陸羽仁
陸羽仁
** 博客文章文責自負,不代表本公司立場 **
我在上一文章講過賺1000萬的五個方法，其中包括第二招「戒賭」，搞到個個唓唓聲。但有個叫Shing Shing的網友，在我的Facebook上留言，話就係「做唔到戒賭。」所以唔好以為我無point.
我覺得「戒賭」係五個方法之中最重要的，如果你想要有身家，一千萬也好，一百萬也好，你若好賭的話，都好難達標啦，所以累積財富的第一步，就係要戒賭。
賭馬、賭外匯、賭股票都係一樣，沉迷其中，將會抽空大家的財富。賭馬，唔駛多講，馬會賺梗，大家在跑馬日去馬會投注站睇睇，好多人踎在路邊刨馬經，絕大部份都係男人，你可以估到，他們唔會富有。想「贏」馬會錢，惟有唔賭。我有個朋友十幾年前期期六合彩都會買大約50蚊，唔算多。一個星期三次，一年就唔見咗七千八，佢見一次都未中過，決定唔玩，10年來，已「贏」了馬會七萬八。六合彩三獎，好多時都冇咁好分。
再講賭外匯，我有個朋友係外匯公司老細，有次去到他的公司。他好興奮的對我說，公司今個月賺了3000萬，仲畀埋條數我睇，上個月執千多萬，個個月都有得執。我就問買賣外匯，可以收到咁多佣金？
細問之下，原來朋友賺錢唔靠佣金，佣金太少，無肉食，「肥肉」主要來自同散戶對賭。除非買賣金額好大或者好傾斜，外匯公司基本上唔會將客戶的買賣盤射到外邊，而係同客戶對賭。
之所以咁做，係散戶十賭九輸，散戶送錢過來，當然唔會唔要啦，唔好射啲盤出街啦，自己同啲客對賭啦。我了解後，覺得好有啟發，原來散戶十有九輸。贏錢的秘訣，就係同散戶對賭。散戶賺錢的秘訣，就係唔好賭。
另外講炒細股。最近因整傷手指去睇跌打。跌打醫生話最近買了隻股票，我㩒機睇睇，呢隻唔知係乜嘅股仔，唔賺錢，市值十幾億，一直蝕緊錢，一睇就知係一隻炒股。跌打醫生話0.35元買入，當時經紀話隻股會升上0.6元。佢話隻股仔依家升到0.4元，醫生好開心，問我點睇，估佢係想我讚佢有眼光。我問佢買了多少，他說不多，只買了十萬元。我建議佢一、不要買多，二，有得賺就賺啦。他當時滿臉不以然。
我隔了一個星期再見佢，股價再升，他更開心。又問我意見，我的回答仍是一樣。他覺得好奇怪，呢隻股票得呀，買入0.35元，現在升到0.42元，經紀而家改口話會升上0.8元，更高，他想加注。我問他加了嗎，他回答仍然係10萬蚊。
我對佢講，你唔明白，這類炒股，純係對賭的遊戲。真正的街外的成交量好低，絕大部份的成交量都係左手交右手造出來的。所以，你賺錢，佢就輸錢。股價由0.35元升上0.42元，股價升兩成，你未沽，只係賬面數。今日沽的話，10萬元就賺2萬。這2萬元，可以算係莊家送的。醫生就問，點解咁好人送2萬給我呢。
我話，你試試買100萬元，得的話，你試試買500萬，睇睇得唔得。這些炒股其實已經圍晒飛，買10萬、8萬佢唔理你，你買得多啲，莊家已經盯住你，起你底，怕你打亂佢檔攤。莊家慢慢造價格，引街外客落搭，0.5元、0.6元，甚至去到1元。到咁上下就吹雞散水，散戶一網成擒。呢種手法，同街邊聚賭，見枱面夠數，大喊一聲「有警察」，然後掠水走人，基本沒分別。你食少少，都可以，你想食佢大大筆？發夢冇咁早啦。
賭馬、賭匯、賭股其實都係同莊家對賭，你贏，佢就輸，睇你有冇咁叻，可以砌低莊家。不妨睇睇戰績，你過去賭錢贏多輸少，當然可以繼續玩啦，如果係輸多贏少，咁就要戒啦。
陸羽仁
