我在上一文章講過賺1000萬的五個方法，其中包括第二招「戒賭」，搞到個個唓唓聲。但有個叫Shing Shing的網友，在我的Facebook上留言，話就係「做唔到戒賭。」所以唔好以為我無point.
我覺得「戒賭」係五個方法之中最重要的，如果你想要有身家，一千萬也好，一百萬也好，你若好賭的話，都好難達標啦，所以累積財富的第一步，就係要戒賭。
賭馬、賭外匯、賭股票都係一樣，沉迷其中，將會抽空大家的財富。賭馬，唔駛多講，馬會賺梗，大家在跑馬日去馬會投注站睇睇，好多人踎在路邊刨馬經，絕大部份都係男人，你可以估到，他們唔會富有。想「贏」馬會錢，惟有唔賭。我有個朋友十幾年前期期六合彩都會買大約50蚊，唔算多。一個星期三次，一年就唔見咗七千八，佢見一次都未中過，決定唔玩，10年來，已「贏」了馬會七萬八。六合彩三獎，好多時都冇咁好分。
再講賭外匯，我有個朋友係外匯公司老細，有次去到他的公司。他好興奮的對我說，公司今個月賺了3000萬，仲畀埋條數我睇，上個月執千多萬，個個月都有得執。我就問買賣外匯，可以收到咁多佣金？
細問之下，原來朋友賺錢唔靠佣金，佣金太少，無肉食，「肥肉」主要來自同散戶對賭。除非買賣金額好大或者好傾斜，外匯公司基本上唔會將客戶的買賣盤射到外邊，而係同客戶對賭。
之所以咁做，係散戶十賭九輸，散戶送錢過來，當然唔會唔要啦，唔好射啲盤出街啦，自己同啲客對賭啦。我了解後，覺得好有啟發，原來散戶十有九輸。贏錢的秘訣，就係同散戶對賭。散戶賺錢的秘訣，就係唔好賭。
另外講炒細股。最近因整傷手指去睇跌打。跌打醫生話最近買了隻股票，我㩒機睇睇，呢隻唔知係乜嘅股仔，唔賺錢，市值十幾億，一直蝕緊錢，一睇就知係一隻炒股。跌打醫生話0.35元買入，當時經紀話隻股會升上0.6元。佢話隻股仔依家升到0.4元，醫生好開心，問我點睇，估佢係想我讚佢有眼光。我問佢買了多少，他說不多，只買了十萬元。我建議佢一、不要買多，二，有得賺就賺啦。他當時滿臉不以然。
我隔了一個星期再見佢，股價再升，他更開心。又問我意見，我的回答仍是一樣。他覺得好奇怪，呢隻股票得呀，買入0.35元，現在升到0.42元，經紀而家改口話會升上0.8元，更高，他想加注。我問他加了嗎，他回答仍然係10萬蚊。
我對佢講，你唔明白，這類炒股，純係對賭的遊戲。真正的街外的成交量好低，絕大部份的成交量都係左手交右手造出來的。所以，你賺錢，佢就輸錢。股價由0.35元升上0.42元，股價升兩成，你未沽，只係賬面數。今日沽的話，10萬元就賺2萬。這2萬元，可以算係莊家送的。醫生就問，點解咁好人送2萬給我呢。
我話，你試試買100萬元，得的話，你試試買500萬，睇睇得唔得。這些炒股其實已經圍晒飛，買10萬、8萬佢唔理你，你買得多啲，莊家已經盯住你，起你底，怕你打亂佢檔攤。莊家慢慢造價格，引街外客落搭，0.5元、0.6元，甚至去到1元。到咁上下就吹雞散水，散戶一網成擒。呢種手法，同街邊聚賭，見枱面夠數，大喊一聲「有警察」，然後掠水走人，基本沒分別。你食少少，都可以，你想食佢大大筆？發夢冇咁早啦。
賭馬、賭匯、賭股其實都係同莊家對賭，你贏，佢就輸，睇你有冇咁叻，可以砌低莊家。不妨睇睇戰績，你過去賭錢贏多輸少，當然可以繼續玩啦，如果係輸多贏少，咁就要戒啦。
陸羽仁
陸羽仁
** 博客文章文責自負,不代表本公司立場 **
上次我講了個輸1000萬的故事，有網友反映事件很令人沮喪，希望我寫番篇「如何搵番1000萬」來補數，我從善如流，馬上動筆。
第一個方法，嫁人。最好搵個七、八十歲的富翁或富婆嫁/娶咗俾佢，如果女的職業是護士，男的職業是風水師，有較大機會成功，你睇富豪三太和在赤柱的哨牙通，都係呢種例子，不過成功機會太低，十萬中無一。
第二，戒賭。若然嫁不到娶不到有錢人，一般人的想法就是去賭一舖，以求一朝發達。以賭場為例，你見賭股炒翻天，就知道贏的只是賭場，拉長來計賭客永遠輸錢，因為賭場中各種賭博，賭場都以機會率取勝，賭仔長賭必輸。在股市這個大賭場也是如此，好多人抱賭博心態去炒神仙股去炒衍生工具，好易輸死。要累積財富，就由戒賭開始，即使不能一朝到站，起碼向著正確方向進發。
第三，複式投資。不要少看投資複式增長的效果，有一個叫「七十二律」，即是每年有10%回報，把回報的錢再投入投資，只要7.2年就可以翻一翻。若你今年有100萬，每年有10%回報，23年多一點就有1000萬。如果你今天32歲，已有100萬儲蓄，做到每年有10%回報，真係55歲可有1000萬上岸。你話我32歲無100萬噃，唔好忘記如果你仲做緊嘢，從工作不斷有新錢加入去投資的資金池中，即使起步時得三幾十萬，都有類似效果。關鍵係盡量保住不輸，反而唔使強求高回報。至於投資對象，好多不同的東西都可以，難題是要有相當技巧，才能每一年在不同投資標的中，揀到既穩陣又有10%以上增長的對象。
第四，買樓。好多人唔識揀投資對象，所以在樓價平時買樓，係最容易的投資。2003年沙士後你用100萬俾首期在港島買間330萬的樓，如今隨時值1000萬。買樓有借貸槓桿，是一個較大碼投資，買完樓要供樓，是一個強逼性的儲蓄，若入場時間好，是一般人較易把握的投資，可惜現時香港住宅樓價太貴，難以入場。有些新發展區商舖可能還比較合理，但銀碼較大，加上無經驗者好難揀到好東西。
第五，低買好股。每年股市都有低潮，要避開高峰，在低潮時買股，笨笨地每年在股市低潮時低買好股，不斷累積，收到息又投入去買股。見升得好多時，可以賣一點，但不用清倉，高位減倉，低位加倉，年年如是。在報紙唱到好淡時買股，講到好好時沽貨，累積咁做十零廿年，其實到50幾歲時有1000萬都唔係咁難事。
陸羽仁
