上次我講了個輸1000萬的故事，有網友反映事件很令人沮喪，希望我寫番篇「如何搵番1000萬」來補數，我從善如流，馬上動筆。
第一個方法，嫁人。最好搵個七、八十歲的富翁或富婆嫁/娶咗俾佢，如果女的職業是護士，男的職業是風水師，有較大機會成功，你睇富豪三太和在赤柱的哨牙通，都係呢種例子，不過成功機會太低，十萬中無一。
第二，戒賭。若然嫁不到娶不到有錢人，一般人的想法就是去賭一舖，以求一朝發達。以賭場為例，你見賭股炒翻天，就知道贏的只是賭場，拉長來計賭客永遠輸錢，因為賭場中各種賭博，賭場都以機會率取勝，賭仔長賭必輸。在股市這個大賭場也是如此，好多人抱賭博心態去炒神仙股去炒衍生工具，好易輸死。要累積財富，就由戒賭開始，即使不能一朝到站，起碼向著正確方向進發。
第三，複式投資。不要少看投資複式增長的效果，有一個叫「七十二律」，即是每年有10%回報，把回報的錢再投入投資，只要7.2年就可以翻一翻。若你今年有100萬，每年有10%回報，23年多一點就有1000萬。如果你今天32歲，已有100萬儲蓄，做到每年有10%回報，真係55歲可有1000萬上岸。你話我32歲無100萬噃，唔好忘記如果你仲做緊嘢，從工作不斷有新錢加入去投資的資金池中，即使起步時得三幾十萬，都有類似效果。關鍵係盡量保住不輸，反而唔使強求高回報。至於投資對象，好多不同的東西都可以，難題是要有相當技巧，才能每一年在不同投資標的中，揀到既穩陣又有10%以上增長的對象。
第四，買樓。好多人唔識揀投資對象，所以在樓價平時買樓，係最容易的投資。2003年沙士後你用100萬俾首期在港島買間330萬的樓，如今隨時值1000萬。買樓有借貸槓桿，是一個較大碼投資，買完樓要供樓，是一個強逼性的儲蓄，若入場時間好，是一般人較易把握的投資，可惜現時香港住宅樓價太貴，難以入場。有些新發展區商舖可能還比較合理，但銀碼較大，加上無經驗者好難揀到好東西。
第五，低買好股。每年股市都有低潮，要避開高峰，在低潮時買股，笨笨地每年在股市低潮時低買好股，不斷累積，收到息又投入去買股。見升得好多時，可以賣一點，但不用清倉，高位減倉，低位加倉，年年如是。在報紙唱到好淡時買股，講到好好時沽貨，累積咁做十零廿年，其實到50幾歲時有1000萬都唔係咁難事。
陸羽仁
陸羽仁
** 博客文章文責自負,不代表本公司立場 **
逢年過節，朋友聚會，都會談起來年投資，雖然無乜人知我係陸羽仁，但都有好多人問我對投資的看法。有一個朋友我叫佢做「漏水王」，所有「水」都會從佢荷包漏走，堪稱經典中的經典。
漏水王好喜歡問股票冧巴，年年如是，愈問愈忘形，而家仲非要升100倍的冧巴不可，話要搵一隻5蚊時的騰訊(700)喎。我講講吓，近年都唔敢再對佢講任何冧巴。
漏水王係一個學歷超高的專業人士，收入穩定，起碼6、7萬一個月，年近半百，個樣好樸實，為人好善良，左睇右睇都應該係一個富婆，但我估佢身家和收入不相稱，係好少那種不相稱，佢連樓都無，主要身家係一籮雞股，數目多極有譜。
10幾年前漏水王已經有兩間樓(加埋出出入入的數目更多)，一間九龍地鐵上蓋屋邨新樓，一間香港灣仔舊樓，如果揸到今天，唔止1000萬，我估值1100、1200萬都有。可惜，佢買樓好短癮，炒出炒入，賺少少或輸少少就閃，早就沽晒兩間樓，如今兩手皆空。
漏水王愛炒股，成日望一朝發達，手上兩隻中型毫子股，百利保(617)和中芯(981)，中芯好啲，百利保差啲，夾埋無乜大作為。即使中芯升咗啲，對佢都無大幫助，因為佢0.6元買，佢想中芯變60元，所以中芯起到1元佢唔會沽，跟往去番0.6元時佢又嘈。
漏水王係一個好會嘈的人，佢早年同一間台灣銀行買咗隻ELI(股票掛釣票據)，國壽(2628)跌穿42元就要接貨，佢用200萬買，後來國壽大插，佢接到成手國壽，輸咗錢(如今國壽20元)，佢見買咗買雷曼迷債有得賠，問我好唔好同銀行打官司索償? 我話雷曼迷債事件政府被投訴監管不力，政府逼銀行賠。但你同其他銀行買ELI，點會有得賠? 你告銀行佢實同你打官司，一上高院律師費都要幾百萬，真係想找死才去告銀行。
漏水王就係咁，亂諗嘢，坐唔走，炒出炒入，成日想攞個冧巴一朝發達，結果一事無成。佢若正正經買樓坐住唔郁，或者買大股坐住唔郁，十幾廿年做嘢積埋都有過1000萬，叻少少投資都有2000萬，但佢就炒來炒去得個桔，佢胡亂炒作，起碼唔見過1000萬。
性格決定命運。唔想做另一個漏水王，第一要儲錢，第二要坐定定投資，買股收息，複式增值，唔好望買中百倍股，望一年有10%以上回報，咁樣十零廿年就上岸啦。
後記:「漏水王」揸咗好耐的中芯(981)，1月開始由0.6元炒上0.8元，農曆年間有消息流傳，話隻嘢業績幾好，炒緊轉勢，估計業績公布前還有一浸炒作。
陸羽仁已開設Facebook專頁，快啲去Like：
https://www.facebook.com/pages/%E9%99%B8%E7%BE%BD%E4%BB%81/204865603047048?hc_location=timeline
