陸羽仁早前講過，每年10月，都係大市一個調整期，有趣的是，年年調整理由都不同，但大市都傾向在這個淡月調整。其中一個理由是9月公布了上半年業績，炒完之後要抖抖，等到來年再炒過。
今年調整的理由是特朗普上周末威脅要加中國100%關稅，但特朗普信用太差，所以美股一跌就彈，有美國市場人士話，這是TACO交易的機會，TACO是「特朗普永遠會退縮」的英文縮寫，即是賭特朗普這次又話要加中國100%關稅，但睇死他最後會對中國退讓，所以港股周一都跌唔多，但之後就陰陰跌。
我上周末講博優質股深度調整撈貨，話中芯國際(0981)如大跌到61元可入貨。阿里巴巴(9988)如跌到145元也可入貨。結果股份無大跌，中芯周一收80.15元，阿里巴巴收162.6元，遠未到我講的執平貨價，所以亦無興趣大手買。隨後大市彈完又回調，這些股份都繼續下滑，中芯周四收73.9元，阿里周四收161.2元，股價向下尋底的態勢十分明顯。
中芯5日圖。
阿里巴巴5日圖。
這也可以理解，因為無好消息刺激這些股份向上，雖然大家都睇死特朗普，但中美還在日日嗌交的境地，也好難睇得太好，大市還是一個尋底格，在這種情況下，對散戶入市也有些建議:
1. 大市調整無咁快完。散戶日日出入，通常一見跌市反彈，就會覺得壞消息已經過去，會飛身撲入，一注買哂，咁樣好易中伏。如果優質股一跌跌10幾個巴仙仲話平啲，可以買多啲，但只跌幾個巴仙未跌夠，還要慢慢下跌搵底。
2. 睇唔通就分段入市。散戶傾向一注買盡一注沽清，想買到最平沽到最高，但現實上睇錯的機會好大。替代方法係分注，以想在145元買阿里巴巴為例，可以變成155元買一注，145元買一注，135元買一注，買齊3注平均價都係145元，買唔齊係快樂難題，即係佢跌唔到135元，手上的貨都有錢賺。
3. 估跌市可以先沽後補。散戶傾向單邊買上，其實如果手上有貨，也可以睇短期會繼續回吐，以中芯為例，如手上有貨覺得佢要再調整，可以等佢一彈就沽，例如上番73元就沽，博佢跌落65.7元補番，咁就賺咗10%差價，等如降低10%持貨成本。風險係沽咗唔跌減持咗，所以唔好沽清手上的貨，想走位都只沽一部份就好啦，睇錯唔跌都仍有一部份貨在手。
暫時仍然估大市要調整一段時間，風險係中美突然達成協議，咁股市會急彈，在特朗普時代什麼也有可能，所以做什麼都要留有餘地，贏唔會贏晒，輸亦唔會輸晒。
(如想睇多啲陸羽仁分析大市貼股票，即訂閱「石榴台」，逢周日至周五，日日睇陸羽仁專欄，吼實有乜好股可以投資！)
陸羽仁
** 博客文章文責自負,不代表本公司立場 **
