《壹週刊》揭黎智英上月斷言「我點會賣俾黃浩呀！」

壹傳媒日前宣佈出售《壹週刊》，引起員工不滿，《壹週刊》總編輯黃麗裳公然反對賣俾商人黃浩，話「《壹》仔精神玩完」。新一期《壹週刊》爆料，話老細黎智英一個月前先至講過唔會賣俾黃浩。

《壹週刊》今期以「出賣壹週刊內幕」作封面故事，披露賣盤的過程。內容指早於2013年，黎智英已向《壹週刊》管理層警告，如雜誌見紅，只能容許做到2014年9月。

但2014年爆發佔中，《壹週刊》未有執笠，但在佔中後發行量及廣告收入急轉直下，發行量由佔中前賣7至8萬冊，佔中後跌到5萬冊。《壹週刊》廣告愈來愈少，虧損嚴重，多次裁員。

報道指在今年4月中，黎智英與部份公司高層聚會，指雜誌已做不下去，並提出新穎的外判方式經營：「大部份工序要盡快outsource（外判）出去，剩番十幾二十人。Cut書、只做digital、我哋要自己揸住《壹週刊》個招牌先有得做！」至5月中，有《壹週刊》高層收到消息，指有一名買家正洽購壹仔，買家正是黃浩，向集團高層查詢，促成6月初與肥佬黎的一次飯局。

肥佬黎在飯局中說：「我點會賣畀黃浩呀！」有份出席飯局的壹仔總編輯黃麗裳聽後，憶起1995年入行時，黎智英也說過不會賣Giordano的一番說話，當時也說過不賣，最後還是賣了。

最後肥佬黎反口，在本周一宣布將《壹週刊》賣給黃浩。報道披露，在本周一公布公布出售前的早上，壹傳媒行政總裁張嘉聲，才會見《壹週刊》的主管，向他們正式宣布集團計劃將《壹週刊》賣給黃浩，期間壹仔總編輯黃麗裳激動得多次拍枱，連枱上水杯也倒瀉。執行總編輯殷明偉也痛哭流涕。

《壹週刊》的報道又指壹傳媒股價受消息刺激急升，一批董事手頭的股份和購股權亦水漲船高。而壹傳媒行政總裁（CEO）張嘉聲今日就透過《蘋果日報》澄清，話公司一直都有授出認股權畀高層，屬正常事情。佢強調《壹週刊》報道中，指公司畀500萬股認股權佢，佢從未行使過：「我睇《壹週刊》報道，佢有列個表出嚟，講晒公司董事有幾多股份，有幾多認股權同獎勵股份，係冇錯嘅。不過我冇行使500萬認股權，公司股價有上落，只係賬面所賺，我都冇買賣過公司嘅股票。」

看完《壹週刊》的報道，明白了壹仔高層為何激動，他們或許信晒老細肥佬黎的說話，以為壹傳媒即使賣《壹週刊》，也不會賣給黃浩，但最後事情發生了，自然有被背叛的感覺。

小鯊

** 博客文章文責自負,不代表本公司立場 **

最近好多人賣產，將自己搞了幾十年的心血資產出售，有人話呢啲都係計數，不過只講計數可能不太全面，沒注意到一些幕後政治事態的變化。

話說有個老細5月去咗美國，走了一轉，他見到乜人就唔知，亦都不知道他是否有接觸到特朗普政府高層，但據他公司內部的同事講，老細去完美國返來，就好似死咗老竇一樣，成個人榭晒，心情極燥，搵人嚟鬧，並對前景睇得好淡，然後就出現了這個賣產的決定。

從環境證供去分析，以前美國無論是共和黨人還是民主黨人當總統，都玩緊一個全球戰略遊戲，係亞太區就會支持一些反對勢力，同中國對抗，去到奧巴馬政府時，就更加明顯地打出「重返亞洲」牌。美國要在亞洲有影響力，當然就要揼水支持啲反對力量，這就會令到啲反對運動相當活躍，做相關行業都很容易搵到水喉支持。

但特朗普上台之後，不單只同中國表現出友好的態度，更加重要的是他大力削減美國國務院對外援助的經費，他向國會提交的新年度預算，就將國務院和國際開發署對外援助經費大斬32%，即近200億美元唔見咗，支援海外反對運動的錢自然就少了一大截。呢啲錢過去除咗支持NGO仲支持咗乜嘢，無人知，但無咗就無咗啦。

在這樣的前提底下，美國也不會有太多錢支持香港搞乜嘢反對事業，你去敲門，一係就俾你食閉門羹，更加衰的是就是開門請你入去，然後打開口牌，告訴你以後都唔會有水支持。在聽完這些說話，自然就會心灰意冷。

做生意蝕唔緊要，最緊要有前景，若前景都無希望，就唔好叫我繼續捱了。做出賣產決定，減少虧損，縮短戰線，希望捱過好長的寒冬，就正常不過啦。