上個星期講到美女高管沽出中國海外（688 ），沽出的價位是26 元，都本周中段內房股又升了上去，周四收26.65元。我不知幾驚美女高管打嚟同我投訴，話點解我唔制止佢沽貨，沽完這股又升左上去，結果佢冇打電話來，我都放心晒。
如果佢再打嚟，我會咁答，「在升市當中，股價反覆向上，尋找頂部，通常是大戶沽貨，越沽越高，所以恭喜她了，她已經有股市大戶的思維。」
話時話，上次美女高管看完我寫她的那段文， WhatsApp俾我澄清：「呢段唔多寫實噃，我跟你買股點只幾年？＆好似冇乜輸（因輸嗰D未沽）」
佢話：「其實我仲有細注龍湖地産960，也是跟你買的，也gain 10幾％早走了，現在再升了不少。」
龍湖一年圖
我真係有少少老人癡呆，唔記得建議過佢買龍湖，如果只賺10幾個%，就真是賺得少了。
美女高管有個習慣，買入的股票有相當賺頭就走，如果輸咗就坐，到坐返轉頭先至沽，所以才形成這個所謂「長勝」的策略。佢呢種做法有兩個問題，第一買入的股票都是我建議的大股，唔會執，否則死坐著隻會執笠、會停牌的股票，變成輸清，咁就喊都無謂。第二要有耐性。
其中一個例子是碧桂園（2007 ），當年我見碧桂園回落到4個幾時叫她買，她買完跌穿4元，佢勝在冇投訴，就咁坐落去。佢最近留言講番起呢件事：「隻2007，睇番＄4.45平均價入，分段由＄4.6賣到＄5.65，avg gain 13％only，認真渣。」
碧桂園一年圖
碧桂園周四收市10.52元，美女高管平均5元沽，當然係沽低咗好多，但我話買股票最緊要有得賺，能夠保持贏錢記錄，已經可以跑贏90%的散戶，因為按一個交易網的數字，有90%的散戶是輸錢的。
低位買大股，有賺時分段沽出，看似容易，其實很難。美女高管話，佢本來唔買股，用咗呢個方法，變成買股有錢賺，增加收入，以彌補現時打工世界艱難，加人工唔多的苦楚。
陸羽仁
** 博客文章文責自負,不代表本公司立場 **
