CEO的廢話

我打咗20幾年工，在街外識咗唔少人，我有一個習慣，在每一個人身上探求一個故事。我最喜歡問人職場成功的竅妙，諗住偷吓師嘛，但在吹水的過程中，得到各式各樣工作的、情愛的、人生的故事，有些還相當有趣。

在吹水的過程中，我發覺好多人並不了解自己，或者咁話，佢講說話出口的「意識的我」，不一定準確描述自己人生軌跡，而真正主宰他人生的「無意識的我」就在旁邊冷笑，話你咪講埋呢啲廢話啦。

好似有一日同個CEO在君悅飲茶，問起佢近生意點，講起佢成功之道，佢就大大聲話俾我聽:「靠運囉！你都知道，我出咗名係擦鞋仔，老細又無乜要求，咁好彩俾我識著佢，我就行運行到落腳趾尾啦。古語有云，呢啲叫無風無浪到公卿呀。」

我聽後沒好氣，本來想訪問佢寫番篇文，佢咁講唔通我叫讀者博好運啦，搵玲玲姐姐同民峰大師啦。實俾人柴台，亦不符事實。

但CEO大哥講「靠運」講得太朗朗上口，我估佢講過好多次，佢「意識的我」已信晒，一問佢就彈呢個版本出來，但我從佢眼神內見到，講呢啲話時隻眼無光芒，唔似太真，佢的「無意識的我」，出賣咗佢。

 

CEO大哥個老細係創業老闆，做廠出身，到60張幾嘢想退休，搵咗佢做CEO，CEO大哥係核數師出身，10年前核數時識得呢個老闆，挖咗佢到呢間公司做CFO搞上市，到老闆話退時，升佢做CEO。

好多數佬出身的人未必懂得做生意，但CEO大哥接手後真係搞得有聲有色，我就係想問佢點解佢做得到。我磨咗佢好耐，佢講完一輪「運氣」之後，終於講出少少真相，佢話轉做CEO時，老細拍晒膞頭同佢講：「我當你朋友架，大家friend，乜事都有商量(佢老細係唔太識英文friend字會讀成「番」音的人)

CEO大哥話，「你唔使當我做friend，老闆伙記做唔成friend架啦，老細你要乜?你想間公司變成點?你覺得間公司仲有乜潛力未發出來? 你講我知啦。」

你幾句話有效，老細一五一十咁講出來，大家君君真真。老細話想把間公司做大兩三倍，呢啲廠搵到客可以做大好多，但佢自己年紀大再搵美國新客能力有局限。聽完佢講，CEO大哥明晒，佢話最明白盤生意，始終係做咗幾十年的老細，點解唔將老闆當老闆，甚至將佢當老師，而要將佢當做friend呢? 我將佢呢句話記在心中，後來遇到網友Myself講起佢老闆同佢好friend，叫佢直叫佢英文名時，我先諗起CEO呢件事，再諗起另外一連串的例子，就在頭條網寫咗一系列「老外老闆」的文章，叫大家警愓職場之險惡。

陸羽仁

** 博客文章文責自負,不代表本公司立場 **

信和(0083)推大埔白石角樓盤「逸瓏灣」，折實呎價1萬1千左右，有雜誌就話佢最平單位折實呎價8600元，信和賣一間要蝕一間，又話信和當年買地呎價7000幾一呎，而家單計地皮帳面唔見咗50億咁話。

雜誌講嘢誇唔出奇，但攞最平個單位嚟講就比較夾硬，最怕有人信咗想去買8000呎的樓，結果入去搵唔到，矇查查被經紀吹到買咗1萬1000元一呎的單位就唔好啦。邊有咁多8000幾元一呎，1萬1000元呎價就多啲，賣呢啲價信和都唔使點蝕。所以亦唔好睇完雜誌覺得信和盤數好差。

其實信和老細黃志祥一見特首CY上台，話要大力搵地起屋，已經唔太睇好，呢兩年你有無見黃老闆投地，無喎，淨係九倉仲係咁勇仲不斷去投地啫。當然，信和過去投咗較貴的地就無計。黃老闆對後市亦唔係咁樂觀，所以貼市推盤。當然手上土儲若然高價買回來，遇上而家大埔4300元一呎的地價，未來年結都要撇少少帳啦，不過應該唔會撇太多。

信和而家穩穩陣陣，接近淨現金的狀況，長期負債佔資產淨值比率只是5.4%，即使打風都唔使驚。你話建築費貴，佢至多唔買地之餘，亦唔咁急起樓，這樣做會對未來盈利有啲影響，但勝在防守性強。

所以當雜誌講到信和好唔掂時，卻見到外資行仲唱好，例如法巴近期有報告，話本地一手樓市氣氛好轉，信和最受惠，調高集團目標價，由12.1元升至14.7元(周四收12.78元)，維持「買入」評級。

信和2月見低位9.83元，而家比低位升咗三成。你話法巴呢啲行會唔會唔知信和要為地皮撇帳，當然唔會，信和老闆一直對此直認不諱，我估證券行都計埋呢條數，如今消化埋仍然睇好。

所以雜誌見到賣樓吹淡風，其實慢咗兩拍，只係反映緊2、3月的狀況，其後大行見有小陽春反手睇好，而家睇好都去到咁上下，差不多炒到近短期水尾。

結論係信和無事，佢咁保險，唔使睇得佢太淡，不過現價升咗上嚟，就無謂追啦，等下一浸回吐時，跌番近11元先至睇啦。