十隻新股九隻唔留

近排有很多新股上市，很多都係熱門股，從閱文（772），雷蛇（1337），到易鑫(2858)，排住隊上場，不過升幅就愈來愈細。

易鑫昨日上市早段最多升過32%，收8.12元，較發售價7.7元只係上升咗5.5%。熱門新股上市開始出現「半衰期」，好似核幅射咁，一開始好勁，愈來愈弱。

散戶買新股，好多時都諗住喺最高位至出貨，見升幅不理想，放埋一邊等等。不過，我要提提大家，等吓佢可能過一兩個月炒炒時沽出，吼位食糊無壞，但不要放埋一邊完全唔理，不要兩、三年過後，揸到成手都係那些「新股」。喺熱門時期上市嘅新股，幾年之後，十隻當中有一、兩隻得，已經好好，不要妄想隻隻新股都會變成騰訊（700）。

新股唔熱唔上市，上市之後再炒高，股價會變得很高。每年咁多股份上市，最後有三兩隻變身成鳳凰，幾年後節節上升。但好公司，十中無一，甚至百中無一。短炒唔妨，長揸真係要揀。

大多數嘅新股，特別係喺熱潮上市，定價都會比較高，上市之初有個食糊期，一係在股市夠熱時直接炒上，或者初時回吐下收乾貨再炒上，總之在上市頭一年好少少的股份都有一個炒作期，但炒完派完貨後，就打回原型。有部份唔得的股份，榭咗之後，有排都見唔到家鄉。所以，我奉勸大家，如果買新股要揸三年、五年以上的，這是「投資的我」的概念，真係要細心去睇清楚，所買嘅新股，有無長線投資價值，前景好唔好，入貨價夠唔夠平，係兩大考慮因素。

如果你唔識分析，我覺得你最好沽出大部份新股，只保留少數你覺得最好嘅股份。散戶買新股的陷阱係，買入嘅時候好熱，其實等如投機。但買入之後無沽，長揸變成投資。當投資倉裡面有好多高價貨，而且大部份都唔得，例如一隻得，有四、五隻唔得，埋單計數，仲係要輸錢。

美圖一年圖

其實部份上市一排的科技新股，上市後出過業績，前景仲易睇啲，好似近日美圖(1357)因為基金減持股價回落，但佢早前公布中期業績，生意前景唔差，美圖上半年總收入21.798億元，按年大增2.7倍；互聯網服務及其他分部的收入同比增長7.62倍，至2.468億元，有關分部收入佔總收入比重，由同比的4.9%，大幅增至11.3%。

美圖上半年，整體毛利率按年增7.3個百分點，至20%；其中互聯網服務及其他毛利率錄15.8%，較同比的毛損率119.5%大大改善；智能硬件毛利率則由同比的19.5%微升至20.5%。想買科技股，美圖呢類可以低吸。

陸羽仁

** 博客文章文責自負,不代表本公司立場 **

有無發現最近好多科技新股上市? 閱文之後有雷蛇，之後又有易鑫，大有輪住上之勢。其實唔止香港，中國科技企業也有很多湧到美國上市，最新的有搜狗。香港和美國的中企科技股上市後有不錯的表現。

美股在過去一星期當中，迎來了12家企業IPO，連CNBC都發現，從這些IPO當中，可以睇到一個越來越清楚的趨勢——中國人來了。這12家在美國IPO的企業之中，有3家企業是來自中國。

過去中美關係不太好，中企怕在美國上市會被留難，如今特朗普上台後中美關係改善，中企也不怕去美國上市。再加上美國科技股當炒，投資者亦開始睇好大陸股。Renaissance Capital創始人之一史密絲指出，「投資者願意在中國企業身上賭一把。如果你相信中國的國內生產總值還將持續增長，那麼你自然會相信中國會是新企業的重大機會所在。」

9月以來，美國市場共有44家企業IPO上市，中國企業有9隻，它們當前的價格平均較IPO價格平均上漲了21.9%，當中部份是科技股。近日最受注目的是中國排名第二的搜尋引擎公司搜狗，以13美元上限價上市。

如今無論香港也好，美國也好，市場愛科技股，所以新股蜂擁上市，體積較大者隻隻都升，體積較細者也不乏亂炒的例子。有人質疑5年過後，今天上市的科技股有無一半生意得？

我話最後有三成今天上市的科技股生意做得起，已經唔錯，但這種看法是一種「投資的我」的概念，所以唔見巴菲特會買新上市的科技股，但抱這種態度，無乜新股可買。

買如今新上市的科技股，可以用「投機的我」的心態，擺明係炒，大中型的新技股隻隻都去認購，在如今的市況，多數唔會跌穿招股價，如果熱度維持的話，仲會玩一排。認到新股後，上市有水位就走，大多數不長揸。沽完隻股再升，都無遺憾。

後記：組合中油股中海油近排不俗，繼續持有，候高才減持一半，油價再上有機會見12元。閱文真金白銀做試驗用20萬元去抽竟然咁好彩抽到一手，104元沽了。再用20萬抽咗易鑫又睇吓點。