正當壹傳媒主席黎智英的捐款風波有愈搞愈大之勢時，《壹週刊》出一隻「私拍艷舞挑逗片曝光」，立時搶奪了大量眼球，成為一時話題。
昨天出席一班傳媒及政界朋友的飯局時，同枱者當然對肥佬黎事件的是非對錯好關心，我就話「馬賽新聞多人睇好多喎」，在座竟然有不少人不知誰是馬賽。問起其中一個猛人他最有印象的明星是誰，他答稱「柯德莉夏萍」，雖然我都對柯德莉夏萍的《羅馬假期》印象殊深，但當你知道這是一套黑白片時，你應該明白年代有多久遠。
昨日早上最多人談論的不是幾個泛民議員到底有無收過黎智英錢，而是那裏可以找到沒有馬賽克的馬賽片(即是無打格的艷舞片)。但這是殘酷的現實，對政治時時都關心的只是一小撮人，大多數人大多數時候其實相當政治冷感，對性感的東西敏感。
所以當《壹週刊》打出這隻馬賽故仔時，真是很難制止大家去想像，這是不是肥佬黎的高招，無論如何，客觀效果是馬賽救了肥佬黎，令本來肥佬黎在李慧玲節目中承認幾個泛民議員收了他的捐款去選舉、而泛民馬上否認的大新聞，消失在空氣中。
話時話放馬賽的艷情片出街似是有心靠害，問題選擇什麼時候出街。馬賽呢的閨中艷舞，好明顯是跳俾情人欣賞，俾人拍埋留低，到感情變酸後，放番條片出街，就成為報復利器。協助的傳媒有如導演，或者改唔到主要情節，但可以就放映日期俾俾意見。
講番馬賽點解會拍呢啲片，好多家長有仔女正在春青期，睇呢啲新聞有另一個角度，佢地好擔心自己的兒女都會拍這些片。唔介意話俾大家聽，呢啲真人真事三級片，真係愈來愈多，中港台明星名人都有，傳媒亦收到很多，不少片段由於過份四級，反而不會出街。我們由過去收到這些片段時大感吃驚，變成見怪不怪。
手機拍攝功能普及，人們亦愈來愈喜歡在網上社交媒體上什麼也貼一番，如果吃飯時是手機先吃的話，進行其他行為也是手機先來，其實很可以想像。不過這些什麼也拍下來的習慣風險很高，手機容易丟失，情侶關係易變，今天拍下了四級影片，難保那一天不會公諸於眾。做父母的要從小教育孩子，有什麼東西是永遠也不能拍的，否則孩子長大後，你想教也太遲了。
盧永雄
自由行退潮，旺區吉鋪湧現，主要零售區鋪位空置率大升，創10年新高，銅鑼灣於半年內，吉鋪暴升至126個，尖沙咀有95個，中環79個，旺角48個。鋪市陷入一個拉鋸局面。
過去半年核心零售區的人流漸疏，過住零售商狂俾租搶鋪的情況不再，部份在租約期滿後更收縮走人，業主亦不願大幅減租，就出現吉鋪。
一個著名奢侈品品牌代理商話，三四年前係最風光的年頭，大陸商家搵到錢，送禮風氣又盛，真係攞幾十萬現金嚟買隻錶送禮都唔講價。如今幾萬銀一隻錶都要講價，因為隻錶只係買嚟自用。啲客話無人再買名錶去送禮，自從內地出咗官員叫做「手錶哥」，上級領導去到佢個地方探訪，佢除咗隻錶迎接，露出一個白白的錶印，俾報紙登晒出來，以後就無人送錶，費事害死人啦。搞到佢地生意麻麻，雖然都頂住照租，但係利錢就大不如前啦。
睇完客個方面，又搵啲業主傾吓，原來業主好多都仲有力頂，所以由得啲鋪空置。好多業主手上唔止一間鋪，又按咗俾銀行，如果減租太多，銀行會重新為物業估值，為免牽一髮動全身，所以租金唔到價，業主情願唔租，以免拉低晒同區鋪位的估值。
有個業主咁話，「而家市面資金多，股市又唔係咁旺，住宅又無得炒，鋪主賣咗間鋪都唔知做乜，唯有照揸，始終有舊磚頭好似好啲，一綫鋪同10年前比，鋪價係5倍，租金係3倍，若然買得早者，無乜壓力，亦唔使急租出去。」
呢個業主估，而家係鋪主同租客拉鋸緊，空置一年半載，好多業主仲頂得住，若然市道唔恢復，空置一兩年，持貨多的業主頂唔順，最簡單是割價賣鋪，否則就要大幅減租就個市。
香港好多人做零售業，開始感受到旅客生意見咗頂，愈貴價的生意冷得愈快，平價生意仲有得做吓。未來內地打貪官唔似咁快停，香港反對內地旅客的聲音未減，阿爺又話要收縮自由行，負面因素唔少，唯一寄望是大陸經濟快啲好轉，等旅客手頭鬆番少少。
我認為呢個係一個零售的轉角市，雖然唔係跌得好急，但係由盛轉衰的苗頭已現。過去租金、工資、物料等做生意成本大幅上升，初時遊客多對產品需求同時急升，產品賣價同樣急升，生意仲好好。到需求下降，銷售不前時，成本無法降低，做生意者輸錢頂唔順就要離場，若大面積出現這些情況時，經濟調整就會來臨，要洗牌再玩過啦。
盧永雄
