預算案有科技概念

財爺陳茂波公佈預算案，由於並無派錢6000元，俾人鬧爆，亦都成為過去10年評價最低的預算案。

猶記得以前港英政府年代，政府對經濟的影響唔細，所以每年預算案公佈，大家都留意有乜概念可以炒下。但係回歸之後，政府影響力日漸降低，連股市都唔理佢，亦都冇乜人炒預算案概念。

但係我覺得預算案其實潛藏一個相當大的概念，就是科技股。預算案提出投資五百億搞科技，雖然當中有相當部份是在河套區搞基建，但無論如何，政府催谷科技發展的心態很明顯。

這個趨勢和港交所推動同股不同權公司在香港上市相關，港交所加快諮詢，希望在5月左右，已經可以容許同股不同權的公司在香港上市，基本要求是100億市值，但對生物科技相關的公司，就降低要求到10億市值。聞說內地和香港的科技公司已經摩拳擦掌，準備利用這個新的嘗試窗口，上市集資。相信開始有更多所謂香港獨角獸，即市值在10億美元，78億港元以上的公司，會在香港上市。

假設大市不死，到今年下半年，香港股市應該會催谷出一個科技浪潮，所以可以睇好香港上市的科技股，因為倒新股洶湧而至之時，現有的股份都會有炒作。香港科技股的龍頭是騰訊（700 ）其他如美圖（1357）這類股份，由於在中國的其中一個市場已是龍頭，也可以睇好。這些股份可以候低吸納，慢慢儲貨，等候香港股市的科技浪潮到來。

陸羽仁

** 博客文章文責自負,不代表本公司立場 **

經常有朋友問我跌市的時候，股票跌到乜嘢位可以買。老實講隻隻股都唔同，大市的跌法亦都不一樣，唔係咁容易可以捕捉，不過如果你要我俾個技術指標，等RSI（相對強弱指數）下跌到30時候買，買一啲大中型的股份，走下波幅，好多時都有收穫。

可以以兩隻股票為例，一隻135（昆侖能源），另一隻1357（美圖）。

昆崙能源一年圖。

先睇隻昆侖能源，過去一年，佢有三次RSI跌到或跌穿30，對上兩次到30的時候如果買咗，即使佢跌穿30再跌得深啲，後來都係升返上去。最近呢次跌穿30之後反彈，而家RSI去返45左右，可以等佢略回吐，買入揸一段時間，博佢RSI升返上70的時候沽。佢上兩次上升，都升穿70。

或者分兩次買，現價7.3買入一注，7再買一注。入齊平均價7.15元。上望8.6元，目標兩成回報。

美圖一年圖。

至於美圖，過去一年有五次跌到或跌近RSI 30的水平。現價10.22 ，RSI 47左右，可等回吐至10元吸納，若分注可現價一注，回到9.8元入第二注，RSI 再見70時，股價會去番12.5元，目標回報25%。

按RSI 炒較大型的股份，不會發達，但可以走吓波幅。