假期間同朋友飲茶，講起買股。我發覺後生仔買股，多數係想搏隻股一倍一倍咁升，但到年紀大啦，好多人買股都會問有無息派。
講起派息，首選當然係大陸房託，好似越秀房託（0405），就算股價升咗上去，仍有6.1厘息派。另外，銀行股都唔不差，匯豐(0005)派息5.4厘，內銀，例如建行（0939），亦派4.3厘。
過去幾年，一路聽到好多外資講內銀買唔過，講到中國會大崩潰，內銀股會大爆炸咁，搞到內銀股價好低迷，變相扯高息率。時至今日，建行已經升咗唔少，由過去的牛皮位6個幾至7元左近，最高升到9.39元。現時回到8元邊。我覺得以收4.3厘利息計，建行絕對唔失禮。
建行一年圖
有老友問起內銀股去到呢個水位，仲買唔買得過。我話主要睇長期抑或短期，如果諗住長期嘅話，買下無妨，或者依家入貨較貴，買咗之後會碌低一啲唔出奇，但揸長線，內銀應該唔錯，反正有4.3厘收，放埋一邊五年都有21.5%股息回報，若將股息再投資，複式計有36%回報，好過揸一啲無厘頭股，賺唔到錢有之，盈利急速倒退有之，但股價就炒到天咁高，呢啲股份舞龍舞鳳，短期好似好勁，但幾年後可能剩番啲渣。你買匯豐或者內銀，單係收息，可能已經比神經股剩低嘅渣多得多。
買收息股係一個保守做法，只啱中老年人，但亦係一個買股唔輸，老來有依靠可以食吓息的投資方法。
陸羽仁
** 博客文章文責自負,不代表本公司立場 **
最近傳出中央高層集中力量支持樓市，將陸續有政策出台，內房股近期反彈理想，其中一隻值得留意的是萬科(02202)。
呢一趟內房股出事，風波影響範圍之廣，超越外界原來的估計，本來市場預計可在國企和民企內房股之間劃線，民企內房受壓力極大，但國企內房由於有阿爺支持，可以免疫，但後來萬科出現財務危機，令人大感意外，萬科是深圳國資委旗下的公司，大股東深圳地鐵，是深圳國資委直接管轄的國有企業，2017年深圳地鐵斥約663.7億元人民幣，向華潤集團及恒大收購萬科股份，成為萬科第一大股東，市場資料顯示，深鐵現持有萬科27.4%股份。
有地方的國企背景，但今年年初開始傳出萬科資金緊張，未能如期找供應商的數，萬科股價及債價隨即急跌，搞出一場危機，到4月初萬科公布業績，去年全年收入4657.39億元人民幣，按年跌7.6%，淨利潤121.63億元，按年跌46.4%。呢種業績本在市場預料之內，但萬科首次不派末期息。集團表示經過深入考慮，目前產業正經歷深度調整，經過綜合考量，2023年度公司不發放股息，不送紅股，也不進行資本公積金轉增股本。可見萬科要集中資源，解決資金周轉的問題。
去年萬科實現銷售額3761.2億元人民幣，按年跌9.8%，規模仍維持在產業第二，但今年銷售數據錄得大幅倒退，根據最新公布的銷售數據，4月份合約銷售面積164.3萬平方米，較2023年同期的206.3萬平方米減少19.9%，合約銷售金額人民幣208.9億元，較2023年同期的334.7億元，減少37.6%。
2024年1月至 4月份累計合約銷售面積555.4萬平方米，較去年同期的832萬平方米減33.3%，合約銷售金額人民幣788.7億元，較去年同期的1348.6億元，減41.5%。
受財務狀況困擾，萬科售樓也有點壓力，最近與一位內房CEO交談，我和他看法相似，覺得內房股最壞情況應該過去，但好的情況尚未到來，主要是國家挺內房態度明顯，但市場信心仍未恢復，所以當售樓緩慢，內房企業資金周轉就很容易出現問題，不過他認為，像萬科這種有國家資本背景，管理層不會讓公司垮掉，縱然遇上困難，應可以捱得過去。
萬科企業一年圖。
萬科52周高位是11.46元，最低見過3.63元，周四收5.73元，今日大幅反彈十多個百分點，萬科可以是一種投機的選擇，不過始終內房風險仍未排除，不要真的以為萬科一定不會出事，但從投機角度考慮，萬科又有一定的入場價值，可以小注怡情，待回吐較多時吸納，搏未來仍可反覆向上。
(陸羽仁《金融High Tea》專欄，逢周一至五，在「石榴台」獨家發布，歡迎您訂閲石榴台收睇)
