騰訊低撈等食糊

中美貿易戰打打談談，最新一章又話美國要求重開談判，搞到恒指大反彈。有網友問騰訊(0700)現價323.8元，係唔係會轉勢可買入長揸？

我覺得可以分兩個角度講呢個問題。首先係相反的角度，延續上兩週話沽手上持有騰訊可向下短炒的話題。上周講到朋友K是退休人士，不太看好後市，我建議他將部份手持的股票向下炒，即在高位沽出，跌低買番，他在345.8元沽出騰訊，我叫他可以在跌一成，計埋手續費在310元水平買入。結果騰訊早兩日跌到低位305元，他在310元補了貨。他這樣做已成功食了10%差價。

騰訊現價323.8元，等升10%即341元，加埋手續費即342元，可以沽出。到接近中美貿易談判時，騰訊炒高的，見這些水平的機會不低。

騰訊半年圖

朋友K問我，上一浪騰訊反彈，在8月28日最高反彈至368.8元的階段性高位，朋友K問如果貪心一點，睇高少少先至沽得唔得。我話若想睇高的，可在升15%即356.5元，再加手續費即358元時沽出，博它反彈到這些位，因為未穿近期高位，仍有機會見。但我叫他記住，食糊位定高咗，成功食糊機會下降。例如見342元的機會有8成，見358的機會可能下降到6成，博唔博自己決定。

從另一個角度講騰訊，佢到底轉勢未，而家可唔可以買入長？科技股是風險股，若然中美貿易戰持續，風險股不會受歡迎，相對好少少的是大勢向好兼有收益的舊經濟股，派3.4厘息的中海油(0883)就屬此類。所以若睇基本因素，貿易戰結朿，才是買入騰訊的時機。

若論走勢，騰訊若要轉勢向上，要有一浪高於一浪的走勢，即高位比上次高(高於368.8元)，低位也比上次高(高於305元)。假定今浪騰訊反彈到380元，再回落時回到330、340元左右就頂住不再跌，就是一浪比一浪高，確認轉了勢。

所以想買騰訊不用急，先睇貿易戰如何，再看騰訊是否能上穿高位，若能好靚仔地升穿高位，等回到340元時才買都未遲。這樣買會買得比現價貴10幾、20元，但安全性也會高很多。

陸羽仁

** 博客文章文責自負,不代表本公司立場 **

中美貿易戰打到嚟前夕，大市周四再創低位，插穿27000點，早兩星期我講及朋友K是退休人士，不太看好後市，問我有何可炒 ? 我就說，唔睇好其實可向下炒，方法是炒手上的持倉 : 若持有100萬的股票，就攞10萬至20萬出來沽，例如騰訊（0700），當時是325.8元，我話等反彈20元左右，至345.8元沽出，等回落下插時再買，這是向下炒的方式。

結果騰訊（0700）確實反彈，8 月28日最高反彈至368.8元的階段性高位，朋友K在345.8元沽出，之後幾日見佢升得咁高，都有少少揼心，但其後騰訊回得好急，星期四已跌到314.6元，朋友K再問我，估唔到轉眼就插到這些低位，問我點搞。

圖:騰訊一年圖700

他拿著佔倉位兩成的騰訊出去游水，若要求唔高，可以在跌一成，即約311元，或計埋手續費即310元水平買入，到美國對中國2000億美元貨品制裁這一兩日推出時，相信就會到位。這樣走一轉賺10%，20萬貨賺番2萬，當做減低成本也好，當作搵吓飯錢亦得，係淡市搵番少少水的策略。

估計騰訊跌至300元邊有支持，或未必一舉跌破300元，即使跌破300元，也可能有一波反彈，到時或回升至320、330元，若睇淡可在這水平再沽。

這個以自己持有的股份沽貨游水，即使睇錯市，整體大市見底回升，手上仍持有八成股份，無乜相干，但若大市真反覆向下，既可過手癮炒下，也可減低持貨成本，都不失為淡市炒作方法。