買金不如買建行走波幅

過年團拜，有朋友是大學老師，是多金之人，四圍找投資目標，佢話有金融界人士建議買金，話今年黃金走勢向上，問我點睇。我話首先要確定向你建議的人，不是在推銷炒倫敦金，否則多多錢都唔夠輸。

講番金價，金價走勢比較睇好，主要是美元加息循環近頂，聯儲局都話要睇定先，美元好可能見咗頂，有機會反覆回軟，歐洲和日本經濟又麻麻，拖慢了她們停止量寛的步伐，本來歐、日一停量寛歐元日圓會炒起，如今又何能要拖慢少少，咁睇好黃金亦好自然。

黃金5年高位係2014年造的1380美元，過去3年一上1350美元高位就回，但當時美國仍在加息，睇2016年打後金價低位一級級上移，何以寄望黃金今次可以上破1350美元3年高位，金價升5%係1380美元，升10%係1445美元，如果黃金一年升10%，都係好大升幅，所以睇升都唔可以睇得太高。

黃金5年圖。

黃金被稱為無息貨幣，因為無息派，所以我唔太喜歡買金長揸，當然可以短炒，例如買隻黃金ETF，睇佢5至10%升幅。但如買金股，就要小心佢地波幅好大，若然升上去唔識走，睇落嚟鎖死都幾傷。

我有另一個建議，買金不如買內銀股如建行(0939)走短線，目標也是10%。每年業績公布期，內銀都會炒下，因為派息高，所以不少散戶見到宣布派息入貨，建行去年3月底公布全年業績，7月除淨，8月派息。

建行5年圖

建行股價近期略回，周五收6.91元，可以現價入一注，等回到50天線6.6元左右入第二注，入齊平均價6.76元，期望10%升幅目標價是7.43元，若只在6.91元入得一注，10%升幅的目標價是7.6元，在5月前都有機會見到。

陸羽仁

** 博客文章文責自負,不代表本公司立場 **

最近與陸叔吃飯，講起過年利是股。陸叔去年推介中石化（0386），本來這隻股表現不錯，由年頭的6.2元，升到5月高位8.35元，但很不幸的是在接近年底時，爆出炒燶對沖期油事件。初時中石化沒有披露虧損的數目，市場非常擔心，再加上當時市道不好，股價直插至5.37元低位。最近反彈，周四收6.57元。

圖: 中石化一年圖

陸叔說中石化的本質比較好，主要做下游生意，長做長有，本來去年有分拆業務上市概念，但由於內地A股市場不好，暫未分拆，又不幸地遇上「炒燶油」事件，不過，最後公佈出來的炒燶油，只輸了46.5億元，比市場預計的78億為少，此數目相對於中石化的全年盈利（2018年業績快報顯示全年純利624億元），46.5億未算致命，估計中石化應該慢慢會走出生天。

不過，中石化由5.37元反彈至現價，已經彈得比較多，不排除在反彈一輪之後會有回吐。穩陣一些，可以等回吐至6.2元左右才入貨，不至於吃眼前虧。當然，亦可以分兩段入貨，現價入一些，等再跌低一些再入。估計中石化今年會更加積極分拆業務上市去做好盈利，如果在低位買入，全年有望有20%回報。