退休

過去一兩個月我都有叫大家買紅色股，都有講過H股指數市盈率只有7倍，應有價值，可以買吓，但都估唔到大陸A股升得咁顛，帶動香港紅色股都急上，令一眾買唔夠貨的朋友都哎哎聲，有個好朋友仲話食唔到呢個升浪，退唔到休啦。

退休呢家嘢，真係可以講講。我識好多人做金融界，真係30歲已講退休，其中一個到40歲真係有機會，公司有隻超級肥雞餐，賠成年幾人工，佢即刻走，如今退休三年，日日話悶。我話你做金融界，炒股咁熟，日日去炒吓股過日神都得，佢話唔番工在家炒股，讀中學個仔四點幾放學，回家見到爸爸覺得督眼督鼻，竟然問阿爸下午可否出去行開吓，到食晚飯先回家。朋友話:「天啊，以為退休可以日日享受天倫樂，點知阿仔已經唔需要我。」

所以呢位朋友而家唯有扮返工，去相熟經紀行搵個位坐吓，收市仲要食埋下午茶，行到6點幾才回家。呢個故事教訓大家，有些事情無就好恨，有亦未必咁好。

講番退休，去番那個「好朋友」想炒股退休的那一個位。佢話食好少使好少，有1000萬現金可以退休，而家只差幾百萬。我話易過食菜，當你有600萬，搵隻股有5厘息收，複式增長，咁10年就有980萬，即係10年多一點，都可以達標。咁買那隻唔識郁的越秀房產基金(405)，佢而家派7厘息，當佢派少啲派5厘，10年達標啦。

聽完我講好朋友塊面拉長晒，好似話我日日講405唔怕悶。我話呢啲叫做base case，一個基本盤，最簡單，唔用腦，都有這種效果。但你想用腦，想快啲，當然有另外一些選擇。

我呢個好朋友跟個市跟唔貼，唔想介紹啲太貼市上落太快的紅色股俾佢，怕呢個升浪升得急亦回得快，回頭去佢無睇唔識走。就話簡單啲，買405個阿媽123啦，即係越秀地產，405係一個房託基金，即係等如買一舊物業，但123係一間地產發展商，有較大槓桿，上落快過405。

越秀地產現價1.55元，市盈率4.1倍，息率5.1厘，股價唔貴。今年10月份合同銷售額按年增34%至8.6億元人民幣；合同銷售面積約8.19萬平方米，按年增25%。累計首10個月，合同銷售金額約133.6億元，合同銷售面積約102.2萬平方米，按年分別增15%和6%，分別佔調高後的全年合同銷售目標人民幣145億元和119萬平方米約92%和86%。全年賣樓有望達標，亦比去年略高。

廣州樓市呆呆地，但越秀今年賣樓好過去年，加上早前以1.25元供了股集了資，手頭資金較多，不怕爆煲。唯一有少少風險是廣東省、廣州市打貪未完，唔知會唔會波及公司，但佢係國企，即使老總出事，間公司亦唔會散。所以有多餘錢可以買吓呢隻股，買完唔包保唔跌，但跌又唔使驚，照計坐一年應該有一定回報，唔得亦可以守吓。

陸羽仁

** 博客文章文責自負,不代表本公司立場 **

最近讀到一篇有關美國對沖基金回報的統計報告，今年1月至10月，投資印度的對沖基金表現最好，有41.9%的回報，俄羅斯最差，跌12%。投資中國的基金表現亦麻麻，今年到10月只有3%的回報。

我過去都有留意投資基金的回報，發現散戶都會偏向投資即年回報好的基金，例如見到投資印度的基金今年表現好，就一窩蜂去買。但有研究發現，今年表現好的基金，明年唔一定好，成績曾經好好的基金，亦可以變得很差。即係話，基金回報多多少少要講些運道，唔可以長期照跟。市場表現亦然，今年好，明年可能會變壞。

我則傾向嘗試分析市場的基本因素，看看是否還有持續向好的空間。例如印度市場今年表現很好，主要係印度新總理莫迪上台，各界睇好其經濟改革，買佢能夠成功，但改革最終能否成功，是沒有人知道的，而印度經濟其實比較差，因此我覺得印度股市的良好回報，不是那麼容易持續。那麼，今年表現不好的市場，明年是否會繼續差呢？我分析俄羅斯及中國兩個地方，覺得俄羅斯經濟可能繼續差落去，中國則會有轉機。為什麼呢？

俄羅斯屬能源經濟，油價每桶在100美元以下開始，俄羅斯已經出現財政赤字，油價愈低佢愈衰，現時油價跌到73美元，市場還有人預期油價可能跌至50美元，甚至35美元，俄國經濟睇嚟仲有排衰，見到油價35美元時才買俄羅斯股票啦。

反觀中國，現時經濟無疑正處於低潮，原因除了是周期性下降之外，也與習近平上台後大力打貪有關，打貪在短期內經濟要承受痛楚，但長期而言卻有好處，市場將續漸適應沒有因貪汚帶來泛濫的高消費，經濟也慢慢會找到自己見的出路。另外，中央剛剛減息，估計還會陸續有來，中國正進入一個銀根比較寬鬆的周期。至於是否應該放鬆銀根，或者放鬆幾多，是一個很富爭議性質問題。不過，減息釋放出一個信號，讓外資好容易聯想到中國經濟會轉好，將吸引海外投資者入市買紅色股票，例如在香港上市的H股。事實上，大家都已見到A股市場近日持續走強，已經出現一些脫離熊市的跡象。

我比較睇好中國來年經濟，所以建議大家每當見到H股或者A股指數回落的時候，吸納指數基金股(最大路是H股指數基金2828和A50中國基金2823)，之前講過的招商中國基金133也可以。當然，如果大家有心水的話，也可以買入個別股份。在一個向上的市場，基本上是趁低吸納，即使想游水，都不要在高位沽清，假設你有三份股票，見高時只沽一份，回吐又買番。能夠持續這樣做好的話，相信明年有不錯的回報。