美股在歷史高位附近徘徊，已經有一段日子，衝唔穿，亦唔回調（ 所謂回調，一般指係吐套10%以上），市況都幾沉悶。同2013 年的大升三成比較，固然差天共地，與去年比，亦呆滯好多，去年標普500指數全年升13.6%。不過你如果以為大市升得咁勁，股民必定賺到錢，就錯啦。 據投資公司SigFig分析了超過25萬個的投資者的投資組合，投資者的平均回報，只係上升咗4.2%，當中有三份之一的投資者回報食蛋，甚至蝕錢。
點解會係咁呢？當然係喺投資的時候犯錯啦，有專家指出，投資者犯嘅最大錯誤係嘗試擊敗大市， 更重要的係佢哋以為自己有咁的能力。Texas Tech University教授伊雲斯基(Harold Evensky)解釋，這正如所有父母、祖父母都認為兒女或孫兒女都比別人的優秀一樣，呢個係人類的通病，不喜歡被視為平庸。
但當投資者太過心雄想擊敗大市時，往往就會跌入一個以至多個的投資陷阱，傷害到回報。第一個陷阱係將資金太集中於某隻股票，據SigFig分析師指出 ，有60%投資者將超過10%的資金投放到一隻股票上；另外有1 5%的人將超過一半的資金投放在兩隻股票上。當該公司出現問題的時候，便損失慘重，當年的安龍（Enron） 就係一個慘痛教訓。分散5、6隻股票較佳，或者買重指數基金，因為指數基金本來已包含大量不同股票，有分散投資的作用。
第二個陷阱係太過「地方主義」，將投資集中在本土。分析指出，有 60%投資者嘅投資組合之中，外國的股票不足10%。反映投資者出於本土主義，將投資太集中於本國，或者自己熟悉的地方。當本國經濟麻麻時，這些純本土的投資組合就唔掂。套用到香港的情況， 如今本土零售經濟麻麻，買本地股亦會差啲。
第三個陷阱是投資者購買基金時，往往希望買一個「好故事」， 買一些已經很流行，價格已經升得很高的基金。而一般流行嘅基金，手續費亦高很多。而多個研究已經證實，即使在熊市中，買較昂貴、 更多人買嘅基金，唔一定跑贏較為平價、唔係好熱的基金。 點解要多俾一點佣金呢？
最後一個陷阱，亦係最普遍嘅錯誤係交易太頻繁。同誤判市場的狀態。頻繁交易係導致回報減少嘅最大元兇。據Sig Fig的資料顯示，5個投資者之中有一個在期內將手上的股票全部 轉手。凡係咁做的話，只係扣除交易費用，回報都會少咗0.5%， 一年少0.5%，咪以為好少，一萬元投資，每年6%回報，30年 累積就有81.6萬元，回報由6%，減至5.5%， 總收益將會減少7萬元。記住投資和投機的分別，投資要長揸。
在這種牛市中，「投機的我」會好高興，但不要忘記搞好「 投資的我」的倉位，上述分析對「投資的我」的組合是至理明言， 假設你把五成資金放入一個投資倉，這個倉位要長贏， 唔使期望成投資成績跑贏大市，指望成績中中等等就OK，做一個多樣化、平衡而合理的組合，能夠與大市同步，已經好理想啦！
陸羽仁
後記:南車（1766）昨日見好消息不升，近日已見動能轉弱， 恐怕炒作資金已經流失。之前建議分三注入，現在建議停止入第二、 三注，已經入的第一注可定穿低位的14.6元止蝕， 若反彈上購入價沽出。
陸羽仁
** 博客文章文責自負,不代表本公司立場 **
呢排股市Chok 上Chok落，搞到人都癲。這種中國式炒法，或者中國式回吐，究竟韻律係點，我也在研究當中。
大陸股市還在上試新高，但有些股份卻回吐得厲害，有些則仍在喪炒，隨時搞到人都癲。正如星期三收到兩個朋友電話，他們的際遇，可以用天堂同地獄來形容。一位朋友早前睇到我的推介，買入了中航科工（2357），大市輕微回落的時候，沽出了四份一的貨，到星期三，股價大升近14.4%，好開心的告訴我，好彩沒有全部沽出，入貨時4.8元，再升一些，股價便翻一倍！另一位朋友則打電話來哭股喪。他揸了中國南車（1766），在個多月前起步位9.8元買入，星期一升上高位沒有沽貨，南車其後兩日急插，星期三低位見過14.7元，收市反彈上16.26元，但已較高位回吐了一半。
其實，他之前問我應否沽出，我說揸了重貨的話，食部份糊也無壞。結果他一股也沒有沽，見到股價跌番咁多，就好揼心。我跟他說，「股價仲比你買入時高好多，仍然賺緊6成，依家只係賺少咗，點解咁揼心呢？」不過，人就是這樣，最想在高位沽清，在低位買番，高位沒有沽出，見到股價回落，就極不高興，卻忘記了自己的處境仍然很好！
現時大市仲好得，但「一帶一路」板塊，已經回得好勁。很多人整天都在問我炒乜好，我覺得很多股都可以炒，不過，如果你不是很貼市，天天坐在屏幕前炒即日鮮，也很難炒得掂。因為股市升得急，便隨時出現回吐，一旦吐套，便是兩三成，輸起上都很傷。中國南車及中國北車（6199）就是這種例子。不過，我覺得兩車回吐得咁急，又造成投機的機會。
南車差不多一個月前還在9.8元左右牛皮上落，之後一路急升，抽上星期一高位20.65元，升了10.85元，跟住就急插。南車及北車兩隻股份在高位時市值合共一萬億元人仔，係兩隻巨股，也一樣插得好急，插下來在周三低見14.7元，不見了升幅的一半以上。如果你不是很貼市的話，很難高追，但可以攞少少錢，待股價回落時炒炒南車。可以分三注吸，第一注可以在回吐升幅的50%，即15.2元的位置買入；回落到13.4元，買第二注；12元時，買第三注。南車股價跌到12元的話，其實已經回吐了升幅的67%，跌幅很深。（進取一點第一注可在現價15.98元買，其餘價位不變）
市場上常常聽到黃金分割比率，即是看著33%、50%及67%這些數字，來嘗試搵出買貨位。如果按上述入貨價買南車，三注買齊，平均入貨價為13.4元（第一注現價買平均價13.8），南車即使再跌，這個價位也ok，會有一定的防守力。
記住，這種見到股份急插，向下分注撈底的炒法，如果不是有質素的大股，千奇咪制。因為細股，或者庄家股，散咗跌下來，跌得咁勁，反而係走人而唔係揸貨的時候。為什麼我建議大家炒炒南車呢？理由係以佢現價15.98元計，32.8倍P/E，雖然不算平，但也不算超貴。過去南車、北車兩間公司，經常互搶生意，把工程合約價錢鬥得很爛，如今兩車合併，成為一家公司，往後便無需再鬥價，還可以產生協同效應，減低生產成本，估計盈利會得到改善。
再加上阿爺大力推行「一帶一路」政策，將會有很多外國承建高鐵需求，佢未來的生意前景，可以睇高一線。所以，南車是有些基本質素的，在股價急回的時候買一些，從投機角度，博佢熬幾個月又上番高位，都有點值博率。
