漢能薄膜發電（566）呢隻喪升「神股」，星期三大跌47%之後停牌。表面上睇，有人在公司管理層開股東大會的時候，突襲大手沽貨，殺管理層一個措手不及，所以急急停牌止血。當時話「短期停牌」，但兩日後至今未復牌。
漢能差不跌了一半，但市值仍然超過1630億。炒得咁癲，遇到重挫，牌都停埋，是否這麼容易可以復牌，當無事發生，炒番上去，係一個好大疑問。
這些股，我當然叫大家不要掂。不過，好多時候，講是一回事，聽不聽又是另一回事。有位朋友在漢能仍是4元的時候，不知在那裏聽到隻股會衝上10元，問我點睇。我對這類炒作股票，答案都是「不懂」。好想炒的話，要睇住嚟炒，記住要定10%的止蝕位。
朋友聽完有點無癮，但仍跟我講了一番理論，全部都是關於漢能的業務前景的基本分析，又話佢產品得，又話阿爺政策支持。我告訴他，當時隻股已40倍市盈率，炒股就是炒股，不用講那麼多基本因素。知道是在炒股，防備心便會高些，就會限注，會止蝕，風險有限。但如果相信基本因素，搏老命大注去買，風險就會大好多。
當時的感覺，與朋友有點不歡而散。後來聽其他朋友講他不斷地在5元、6元、7元的時候大手買入漢能，股價在3月一度急衝上9.07元高位，朋友亦意氣風發，大宴親朋。不過，漢能本周大幅跳水，股價急插至3.91元，仲停埋牌。朋友睇怕未及時甩身，估計依家都好傷啦！
好多時候，有人問我點睇某隻炒股，特別係搬出好多基本因素的時候，我都是不懂得如何回答的。只能夠提他不要看基本因素，只看炒作因素。這類股票，很多都是倍升股。叫人不要買，等於阻人發達，因為股價隨時升1倍，甚至10倍。問題係，股票一日未沽，錢未落袋，都只係賬面財富。
不要理會該公司是3千億市值也好，3萬億也好，也不要看牌面上每日有多少成交，關鍵係街外有多少真實嘅貨易咗手，有幾多散戶真的能夠沽貨走人，那才是老散真正贏錢落袋的數字。你沒有沽貨，睇住股價不斷上升，但錢仍未係自己的，唔值得請客食飯慶祝，因為請客是真實開支，未賺嘅錢係唔可以用來結賬。
在牛市期間，未來將會有很多這樣的倍升股出現。質素愈差，股價愈落後的股份，只要有心人推介一下，便有可能會大升特升。我經常講一個笑話，有人問我冧巴，我便會叫他找50大上升榜的股票，合埋眼用手指一督楝一隻，講唔定會發達。
相信大家都明白我的意思：這些無厘頭喪升股，全無基本因素的支持，或者貌似有些基本因素，個股價卻不成比例，其實都係炒股。要買的話，就要有防備心，睇到不對路的話，便要即閃。還要有心理準備，會遇見像漢能一樣的股票，一日會暴跌幾十%，甚至停牌，你要返工唔得閒分分鐘望住佢，想沽已經趕唔切，錢已經被鎖死。所以，玩這類股票的惟一方法，只能夠細注，因為佢有機會升一、兩倍，但也有可能輸清。明白了這個道理，才可以參與。不然的話，遇到漢能咁嘅case，問我點算？我只能夠祝你好運啦。
陸羽仁
** 博客文章文責自負,不代表本公司立場 **
