*

男人失戀愈多愈好

表弟阿Man呢排無晒心機,芝芝作為表姐,自然要好好關心吓佢,一問先知原來佢失戀!阿Man唔係情場初哥,今次拍拖都有好幾年,事先都無咩徵兆會掟煲,芝芝無追問表弟死因,唯有安慰佢︰「唔駛驚!男人失戀愈多愈好呀!」

 

「表姐,咪玩啦!」阿Man對芝芝苦笑。「我唔係玩,有晒科學根據架!」

 

網上圖片

網上圖片

 

英國倫敦大學瑪麗女王學院一個研究小組,著手研究「分手對男女雙方心理健康影響」,結果發現在同居關係下,女性較男性容易出現焦慮等心理問題,原因可能同姊妹們容易感到缺乏安全感有關!至於男人,就關心會唔會成世俾人「箍」住多啲。

 

到兩個人分手,情緒低落好正常,但女性復原時間亦比男人耐,女性的心理健康會隨分手次數增多而惡化。男人就啱啱相反,研究話有過兩次或以上分手經歷的男人,心理狀態極佳,甚至仲好過其他男人添!

 

芝芝一輪咀講完,阿Man就聽到擘大個口,話從來無諗過男人失戀愈多愈有著數,仲話要立即搵個新女友,投入新一段感情添!男人真善變,芝芝衷心祝福佢啦!

芝芝‧知性

** 博客文章文責自負,不代表本公司立場 **