買價值股避險

大市近期雖然已經反彈不少，但總體市況仍處於較低位置。大市未來的走向，很大程度上還是要睇美息走勢，以及市場對中國的信心是否回復。

有位投資比較穩陣的朋友問我，他在大約25000點高位，已經沽了部份的貨，現在見到市況穩定下來，想補一些貨，是否可以買首都機場（694）？他的理據是即使萬一買大開細，內地經濟沒有改善，股市還要下跌，首都機場生意應該不會受太大影響，北京仍是一個運輸中心。

我的回應是，從分析生意前景而言，他的睇法沒有錯，但從買股角度，按目前的市道，首都機場跌得少，股價貴，現價7.52元，等於18.8倍PE，息率2.13厘，市賬率1.53倍，即是說，市價比資產淨值高52%。看其股價走勢，可以發現，首都機場走勢硬浄，低位5.42元，現價仍遠比低位為高。究其原因，朋友及市場上很多人都覺得，首都機場的生意面對風險有限，所以有很多資金都泊入這隻股票避險，令股價跌得不多。

首都機場一年圖

在牛市的時候，炒升幅、講增長，但在熊市的時候，卻要搵價值、要避險。如果要我揀股，我較屬意招商局中國基金（133）多過首都機場，招商中國基金現價11.82元，距低位10.78元相當近，由於是基金股，很多股民都不清楚持有的是什麼股份，所以在跌市時，沽得特別厲害。招商局中國基金現價市盈率1.56倍，息率5.91厘，市賬率0.36倍。5.91厘的息率就相當吸引，更吸引的是0.35倍的PB，即是股價相對於資產淨值有65%的折讓。

招商中國基金一年圖

雖然我們不能期望這些基金股，很容易可以升上接近資產值的水平，處於一個「打到嚟」的市況時，亦不是說股價不會再跌，0.35倍的PB，可以跌到0.2倍的PB，但跌得更深的時候，也意味著相對於其資產淨值，有更加深的折讓，更加抵買。況且，收5.91厘息，絕對不失禮，就算人民幣還有7%的下跌空間，打折以後，還有接近5.5厘息。

招商局中國基金的組成，有接近半是招商銀行及中誠信托，這些大銀行股及大信托股一般派息比較高，其餘的組成是一堆新創的投資，派息會比較低，一高一低拉勻，仍有這樣高的派息水平，其實反映了一個事實，就是股價與資產值存有太高的折讓。如果沒有折讓，息率大約會是2厘。

在熊市中，買股便要預了要長期奮戰，至少要忍手揸它兩、三年，招商局中國基金有接近6厘息墊底，其中持有的主要股份招商銀行又是國內營運得比較好的商業銀行。因此，要買股，我不會揀類似首都機場的高PE股，而會揀招商局中國基金這些折讓比較深的股份。

陸羽仁

** 博客文章文責自負,不代表本公司立場 **

有朋友在高位280元買了港交所(0388)，話睇500元。 最後隻股跌了下來，他想在170元溝貨，結果呢個月低位只是174元，佢買唔到見到個市反彈，就好揼心。到今日見佢跌番少少去番 185.8元，仲話佢跌得唔夠多。

我首先對溝貨呢個手法好有保留。溝貨即係我買咗隻股大跌咗，就在低位買多啲，好似上面個例子，若然在港交所跌到180元時買多一倍貨，平均成本變咗230元。

表面睇溝淡呢啲策略好似好得，實際上有幾個問題。第一，在輸的倉位加貨。買完隻股跌，可能因為大市，可能因為個股的原因，溝貨係唔問情由，在輸的地方想爬番起身。好多時衰開有條路，輸的地方應該避開佢。你搞唔清楚跌因，又無睇清楚隻股份的基本因素得唔得，盲買好易輸多啲。

第二，按自己的成本行事，不看客觀環境。 有時我叫啲朋友不要溝貨，佢見隻股彈，又會怨我。 問題是溝了即使隻股彈，你走唔走到呢? 假設你真係在174元的低位買了港交所，但佢彈20、30元你不 會沽，你想見番230元，有時好黑仔，佢可能彈到228元就停， 然後再向下插，穿埋你溝貨價，但你買大咗一倍，輸就輸雙份。

第三不分大細。問心講，溝大股仲好啲，真係再跌下去，過幾年可能上番來。但溝慣貨的朋友，乜都去溝，大股又溝， 細股又溝，溝著啲殺人股，真係放多多錢落去都無埋。

長線投資關鍵還是睇隻股的基本因素，睇現價夠唔夠平。 唔好因為自己揸咗就要買多啲，而係你手上無貨，你都覺得呢個價位值得買至好買。港交所也好，證券股也好，他們是牛市(或熊市)的放大器，股市好景時，成交大量增加，他們就賺到笑，升幅也比大市多，相反跌的時候也是這樣。

港交所早前公布中期業績，差過市場預期。 佢上半年受惠港股交投暢旺及商品業務增長，上半年純利增加73% ，賺40.9億萬港元。營業額升48%，升至逾68億多元。大家要記住，上半年是大牛市，股市天量成交，下半年睇嚟唔會太好，成交唔會天量，所以佢今年會上半好，下半年差啲，而去年就係頭三季較差，第四季好。港交所現價市盈率 41.9倍，息率2.8厘。若然全年盈利加起來不是升得太多，今年預期市盈率仍有30多倍，都算幾貴。

佢現價180多元，有點雞肋，若然短炒，還有反彈的空間，但如果你是長線投資，現價就唔夠平，去年頭佢仲長期110幾元，而家唔係跌得太夠深，若然跌到140、150元那種水平，會吸引少少。所以若是長線投資，現價未買得落手。