快到新年，好多朋友去年都損咗手，就問我猴年的投資策略係點。猴子有名你叫跳上跳落，我恐怕大市都係咁樣，可能會大起大落，今年的投資唔易。
如果用一個正常的尺去度，依家的股票已相當便宜，如果你真係長線投資者，買入長揸，睇幾年應該都得。但係大多數人買股，都唔想吃眼前虧，你話一個組合派六厘息，揸三年，即使係每年都派六厘息，三年之後股價唔會差過依家，但係如果中間跌咗落去，心裡面都唔舒服，所以我遇到好多散戶，即使話幾長線都好，如果中間跌咗，個心都會乸住乸住。
如果大家都有呢個心理，我就建議猴年要忍，要忍到股價跌到比較低時先吸納，咁樣即使係吃眼前虧，買完即跌，由於已經跌得好深，就算再跌，可能挨一段短的時間，都會見底反彈。
至於買乜股，我就認為呢啲市道要買平股，睇長線。股神巴菲特慢慢去吸納油股，令我注意咗油價同油股，初步估計油價尚未見底，但喺今年下半年可能見底回升，如果以香港三大油股來計，中石油(857)、中海油(883)、中石化(386)，佢哋的走勢就唔似氣股昆侖能源(135)咁好，油價仲有一個反覆尋底的階段，但氣股昆侖能源就穿唔到底，佢哋之前的底報4.67元，上落下跌都跌唔穿，昆侖能源已發咗盈警，預計佢2015年的業績唔好，所以佢4.6倍的市盈率係唔作得準。不過，由於佢有一個重大併購，買入母公司的一個重大資產，係會令佢的產能倍升，係呢個併購支持住佢的股價。
買股要買得平先有防守力，如果真係想長線投資，想搏油價氣價今年見底，慢慢可以穩健回升的話，咁就等昆侖能源的價錢跌到好殘，例如跌近佢一年低位4.67時，先至買入，買完可能都要預咗佢再跌，不過亦都唔好期望自己買股可以摸到底部，或者買的時候係分一注、兩注、三注去買，即使買的價錢係相同，甚至係後面注數更高，攤長來買，可以將風險拉平均。
我建議留意呢個股，都係睇長線的回報，可能一年內未必好得，但係如果睇兩、三年，天然氣始終係潔淨能源，長遠市可能不斷上升，而昆侖能源係國內好大的燃氣公司，如果低價買到，睇長線應該無問題。
喺呢度順祝大家有豐盛的猴年！
陸羽仁
** 博客文章文責自負,不代表本公司立場 **
股市腳軟軟，不單止股民心情不佳，連上市公司的財務總監亦好頭痕，因為不少公司揸住現金，為了增加公司回報，都會放部份資金投資股票。但股市跌成咁，負責操盤的財務總監，無不大搖其頭。
最近遇到一位在上市公司做財務總監的老朋友，提到這個問題，他說，年頭股市一跌，搞到他們很被動。恆指跌到一萬九千點，睇一般的指標，例如市盈率、市賬率，或者息率，已經跌到比較吸引的水平。朋友覺得，雖然中國經濟疲弱，港元有受到衝擊的風險，但在如此低位買入，揸長一點當收息也無妨。
但作為上市公司的投資，卻不敢輕舉妄動，就像給人綁著手腳。香港主要原因係上市公司要定期匯報業績，香港有半年結及年結，在外國例如美國，更要每季公布業績。
作為散戶，如果怕大市仲會跌得更低，可以分段買貨，例如將資金分成四注，萬八點買一注；萬六點買一注；萬四點買一注；萬二點再買一注。即使出現金融風暴，港股大跌，估計跌到萬二點水平已差不多（無風暴未必買得齊）。如果跌到萬二點，四注平均買入價才萬五點，長缐計也不算貴。由於在大跌市時，氣氛太恐怖，令到好多人不敢入市。所以，定好計劃，分段低吸，是跌市時的一個良好投資方法。
不過，上市公司卻不可以這樣做，理由也很簡單，本地經濟不好，公司本業的業績也不會太理想，要投資股票，又要分段低吸，但去到今年的6月30日中期業績截數之時，大市跌到萬五點，此前在萬八點及萬六點買入的貨，便要對照市價記錄虧損，便會產生很大筆損失。由於本業的盈利已經肉酸，再加上證券投資的損失，不被罵死才怪啦。
用分段買貨的方法，等一年不要說大市會反彈得很高，例如只係回升到原來的位置萬八點，平均買入價只是萬五點，回報已經相當不錯。問題係，大市回升的時候，可能係一年多以後的事。朋友說，出中期業績時輸錢，到全年業績時繼續輸錢，未等到股價反彈，他已經給公司炒了魷魚。所以，他即使覺得這是可行的投資方法，上市公司不採用。
我跟他說，這就是散戶比機構靈活的投資方法。散戶只需要向自己交數，如果有錢「唔等使」，買大股，坐住收息，這種分段低吸，不失為一個好方法。
當然，也不要以為散戶買股一定跑贏機構，原因係散戶好多時都在等最低位至買，但當最低位到來的時候，通常也是最恐怖的時候，一般都唔敢買貨，只想沽貨。我常常提醒長線投資的朋友，要保留子彈在跌市時趁低吸納，而分段低吸，係抗衡唔敢買貨的一個好方法。
