近排股市反彈左唔少，但係基本上都唔能夠擺脫擺脫一個熊市的勢頭，同股民傾計，都係抱怨的比較多。
我有一個講法，旺市跟索羅斯，淡市跟巴菲特。旺市嘅時候，順勢而炒，即使你水平唔係咁高，都好容易有得着，那些是盲俠都會贏錢嘅時代，舊年4月就係咁樣。所謂跟索羅斯，只係講手法，即係搵嘢嚟炒，炒上炒落都得，主要係走短線。
但到咗淡市的時候，就最好跟巴菲特，睇長線，唔好太重視短期股價的起跌。
巴菲特最近接受CNBC訪問，講到2016年開始，投資市場不太好，佢對投資者的建議係：「揸住啲股票，長期持有，唔好去睇。」
佢認為最容易賺錢嘅方式係長期投資，買入一隻好嘅股票，揸佢10年、20年、30年，長期持有，就可以賺錢。
股神話如果你買股票，跌左少少就好擔心，想賣左佢，佢認為咁嘅方法，長遠唔可以賺錢。佢認為合理嘅方法係咁，例如你在你身處的城市，見到一間好公司，佢的管理人又好，咁你以合理價錢買左佢嘅股票，就長揸落去，你唔會日日去睇佢股價。
呢個就係股神領導巴郡51年嘅心得，呢個係令佢成為全世界最富有的投資人的方法，巴郡持有80間公司的股票，佢投資經驗可想而知。
聽完股神忠告，最後一點要提醒，你買的股票係好公司，如果你只係買咗三四線公司股票，咁就另計啦。
有興趣可以睇睇股神點講：
http://www.cnbc.com/2016/03/04/warren-buffett-buy-hold-and-dont-watch-too-closely.html
陸羽仁
** 博客文章文責自負,不代表本公司立場 **
我上周一在《頭條日報》的專欄內提到，近期內地樓市升溫， 內房股可以炒一下。及後有網友留言問點解咁睇好內房股， 因為內地樓市的基本因素仍然唔得，內房股唔值得睇好咁話。 我相信這位網友誤會了我的意思，不妨在這裡詳細講講。
買投要分開「投資的我」和「投機的我」。投資睇長線， 投機睇短線。我對內房股所謂的睇好，只是從投機的角度出發， 並非覺得內房股長線值得看好。
內地經濟一沉未起，生產物價指數PPI，連跌近四年; 採購經理指數 PMI，長期處於50的榮枯線之下。睇睇這些數字， 就知道國內經濟搞極都唔得。經濟原本唔好， 又遇上年初股市及人民幣匯價急插，頭經濟唔好， 猴年開波便中了一棍，令到阿爺非常緊張。
阿爺去年12月開始話催谷樓市去降低庫存， 見到股市同人民幣匯價滑坡，更加強要谷起樓市的逼切性。 阿爺連番出招，先將買樓首付成數由兩成半降至兩成， 其後又調降買樓契稅，這些措施固然會對樓市有幫助， 但樓市突然升溫，搞到很多人通宵排隊買樓的真正原因， 並不單單因為這些政策。實情是阿爺幕後大力放水，催谷樓宇貸款， 令到銀行可以放寬樓宇貸款。
我同意要承托樓市去支援經濟， 但對於內地很大力地催谷樓市去谷起經濟，我卻有點擔心， 估計在三個月至半年的短暫時間內，內地樓市會有一浪急升。 問題係樓價長期走勢與經濟掛鉤，短線則受到資金供應等因素影響， 經濟差，樓價急升，雖然短期內經濟會有些改善， 但經濟不能單靠樓市上升就能好起來，樓市升幅與經濟增長背馳， 樓市愈升得快、升得高，製造出來的泡沫將愈大，愈容易爆破。 阿爺今年催谷樓市，狀況與去年催谷股市救經濟一樣。
既然阿爺谷緊樓市，何妨短炒一下內房股。不過， 明知道樓市正在起泡，就不要以為內房股長期都會得， 買入作長線投資。我長線唔睇好內房，內地樓市愈升得急， 內房有更大隱憂，但短期炒作一下，我又覺得可以。 買股不能只看基本因素，你或許覺得某股票的基本因素不好， 但在資金催谷下仍會上升，你彈佢都無用，不如順勢走一轉， 睇位落車豈不更好？
