藝人黃翠如個爸爸黃永華新上市那隻建築股聯旺（08217）， 呢隻股以全配售上市，周二掛牌炒高14倍，周三繼續狂升，最高升 2.5倍至14元，較配售價0.26元，高52.8倍! 周三收11.28元，仍升1.8倍，仍然較配售價高42.4倍！ 翠如BB爸爸黃永華持有4.68億股，佔股37.5%， 若以以聯旺昨日收市價11.28元計，持股市值超過52.8億港 元，這只是帳面財富，但娛樂版已當正翠如BB係富家女啦。
最好笑個笑位係翠如爸爸隻股市值141億，翠如 BB自己打工那一間 TVB(511)市值只有123億，一間創業版公司市大過TVB ，真係「信一成雙目失明」。一隻做土木工程的創業板股票，至20 15年3月底年度盈利1808萬元，炒到779倍市盈率，借中國 50年代搞大躍進的名言去形容:「人有多大膽，地有多大產」。 呢啲全配售股份圍晒飛，自己友買哂，並無街貨由外人持有， 真係要升幾多可以升幾多，市價幾多你真係唔好信呀。
有人可能話，我無咁蠢而家去買。但我怕佢有日急插8成，跌到2. 3元時，散戶會走去撈，博即日鮮反彈，你那時會忘記咗，2.3元 呢個價仍然係上市價0.26元的9倍，而0.26元的上市價， 其實已經係18.3倍的高市盈率，大戶派晒貨俾入場撈底的散戶， 你接咗貨後佢彈都唔彈，繼續直插。近排好多配售狂升股， 都係等跌落來得番高位一兩成時，引來一班撈底客入場， 就在呢一浸引到街客接貨殺人啦。翠如爸爸股惹來大量免費宣傳， 更易引人落叠。結論係呢啲股睇吓好啦，唔好掂呀。
聯旺上市以來走勢圖
後記：聯旺周五插水，開市稍抽高至12元後即插，低見5元，然後反彈，收報8.6元，仍跌26%，高位揸咗即刻扮蟹。
陸羽仁
** 博客文章文責自負,不代表本公司立場 **
最近有一位美女朋友問我，有種與美元利息掛鈎票據，買唔買得過？ 該票據的結構是這樣的，至少要投資7萬美元（大約係54萬港元） ，4年期，掛鈎的是美元3個月的倫敦銀行同業拆息。年息最低為1 .53厘，最高4厘。即盯著美元利利息， 賺取一個有上下限的變動回報。
我與美女朋友說，這種結講性產品，比股票掛鈎產品好一些， 因為買美元產品，與美元利息掛鈎，風險相對比較細， 惟一的壞處是要鎖死4年，時間比較長。 最大風險反而是承造銀行本身的信用，它的發行銀行是一間投行， 就要看這間投行倒閉的風險，一般來說唔高，但經歷2008年一役，又唔可以話無風險。
當然，做這種票據，可以話又比放在銀行做定期好，回報會高一些( 放在銀行一樣要承擔銀行倒閉的風險，除了政府包括的50萬存款保險)。
「債券大王」格羅斯已經講過，在美國大印銀紙、推低利息以後， 環球的投資市場已經進入「低回報時代」，低息成為主流，例如美國 10年期國債也只有1.75厘利息， 已不能夠預期投資可以有高回報。
投資回報高的產品或者股票，通常都隱藏著本金虧蝕的風險。 你今天夠膽買去買匯控（005），息率高達8.6厘， 遠比上述的結構產品約2厘息高，更係遠高過存錢在匯豐銀行。 不過，大摩上周唱匯控股價最熊的時候會跌至28元，昨日收45. 8元。你買匯控搏收息，要承擔股價可能會下跌的風險。
所以，我對這些與美元利息掛鈎的結構產品，睇法比較中性， 作為分散投資，如果你不想全數投資都冒買股票的風險， 也可考慮部份分散到這種產品，收1.53厘， 起碼比放在銀行收息較高，只要發行的銀行不倒閉， 你損失本金的機會不大。（當然，外國銀行無論規模有多大， 也有執笠的風險。）
我個人則比較喜歡買一些相對高息的股票，例如越秀房產信託基金（ 405），買入後放埋一邊，收完息，股價上升的話，升值加派息有 10厘的話，可以先沽出，待回落再買入。睇錯位， 坐貨收息也希望能保持7%回報，但要冒人仔回落、 或者中國陷入日本式衰退的風險。 當然買房託已比買一般股票好好多了，等如買舊磚頭， 唔得就揸長少少慢慢睇。可嘆在低回報的年代，投資產品價格低迷， 投資者要搵食唔係咁易也。
