內地A股指數加入摩根士丹利新興市場指數失敗。揭盅之前，新聞已經報道大炒家索羅斯重注沽空在新加坡上市的A50期指，賭中國入摩撻Q。
我有一位炒開期指的退休朋友，就在消息公佈前一日沽了一張期指，跟索羅斯炒，翌日A股入摩撻Q，誰知內地股票不跌反升，港股亦跌不下去，結果要蝕錢平倉。
他深深不忿之餘，問我點睇。我說索羅斯炒A股入摩撻Q，當然不是像散戶一樣完全靠估，説不定有內幕消息，知道入摩將會告吹。不過，相信大摩事先也會向中央通水，今次A股入摩無望。所以，在普通人眼中的不確定事件，中央與大戶其實已預知結果，這便變成一個大鬥大的局面，大戶沽空，中央護盤，不但不讓A股跌，還要挾高。
事實上，這種情況屢見不鮮，特別是美國受到重大恐怖襲擊之後，除了當年911事件發生，股市跌得好勁（之後亦很快挾上）之外，後來即使遇到重大恐襲，美股翌日都是不跌反升，好明顯是政府挾倉行動，不讓恐怖分子借恐襲賺錢。因此時不時出現壞消息挾高的市況。
無論如何，預知的好消息或壞消息公布後，都可能出現相反市況。所以你在炒什麼，到消息公佈時，朝早9點15分期指開市，大局已定。
如果你預期A股入摩失敗，估期指應該跌500點，但期指早上開市只跌了100點。你不應該說，有冇搞錯，跌得咁少？或者期望期指往後會跌得更多。剛剛相反，見到跌幅不如預期，甚至不跌反升，便要馬上走人。因為一切行情皆在市，市場走勢，其實反應了市場買賣雙方角力為結果。不可以不信市場，盲信自己的估計。
推而廣之，很多預知會發生的事件，例如公司出業績，如果市場已預期公司業績會很好，股價此前亦已上升了的話，到業績公佈當日，即使業績如預期地好，股價好可能只會升5分鐘，如曇花一現，隨即回落。如果你在業績公布前一天買入，第二日覺得股價升得不如理想而不沽出，隨時會因股價倒跌收場而損手。
從入摩撻Q這個例子可見，估得到的事件，實現之後，大市是隨時會向相反方向走。不要堅持自己的信念，炒股票要定好止蝕，一見不對路，便要馬上走人。
陸羽仁
** 博客文章文責自負,不代表本公司立場 **
去年12月11日我寫過一篇文題為「預跌仍買收息股」（http://goo.gl/j0JYoM），提到有個朋友怕人民幣貶值，沽出咗人民幣，套現200萬，問我買咩嘢好，我當時建議佢可以留意中電控股（002），結果佢真係買咗，隻股升咗上去，創埋一年高位，而家打電話來問我沽唔沽好。
我當日嘅文章係咁寫：「中電一年的股價波幅在6 3元至69元之間走動，現價64.75元，已回到相對低的低位。純以走勢分析，加息對公用股不利，可能會令到中電下行至比較低一些的位置，例如60元的水平，但大跌的機會應該不會太高。中電現價市盈率大約14.6倍，息率 4.1厘，買來收息也不會太差。巴克萊最近發表報告睇好中電，目標價睇76元，評級為增持。」
朋友聽咗我講，就在中電股價64.75元時入咗貨，中電現價76.55元，加埋收息兩次，2月收息1.05元，最近將派0.57元（已經除淨，沽出不影響收息），合共有79.17元，相比買入價64.75元，加埋有回報22.2%。
老老實實，當日我講中電的時候，唔預佢股價可以升得咁高，只係諗如果半年加埋收息有10%回報，已經好好。而家升到連巴克萊嘅目標價76元都穿埋，可以話超額完成。
中電去年業績唔錯，純利按年增近四成至156.7億元，反映營運盈利強健以及出售澳洲Iona燃氣廠的貢獻，但賣野得到的特別收益不是年年有。以營運盈利計，去年有115.3億元，按年增長14.6%。呢個業績算做幾好，但係股價咁大升幅已經反映咗。
中電一年圖。
我覺得好似中電呢啲公用股最近升得咁多，除了因為美國加唔到息令收息股看俏外，多多少少反映市場嘅避險情緒，例如美股升近高位，升得多都係公用股。雖然內地好多大型股票派息都好高，但係外國投資者怕中國有債務危機，驚中國經濟硬著陸，都唔係幾敢掂內地的高息股，所以搞到中電大創新高。
中電雖好，但現價已經比較貴，我建議朋友佢既然有22%回報，可以沽吓。要預咗沽完可能再升，但錢係賺唔晒嘅。在股份升高的時候，減磅增持現金， 等股市下跌時，先至有錢買入相同嘅股票，長線嘅回報會比較高。
