我總想在《巴士的報》的專欄講少一點炒股，講多一點人生，今日試試。
我早前講過超級富豪李兆基話過可以用9成身家買30年命的講法，最近同一班人飲茶，有老中青三代，我又講起呢個話題。我話李四叔係千億富豪，肯用9成身家，買30年命，即係30年命值900億呀! 我仲好低能咁講，我而家51，李四叔後生30年都有55，我幾正，我可以好阿Q咁當自己有900億啦。
我愈吹愈勁，仲話如果有個神仙，同李四叔講價，話唔止要攞走佢9成身家，要晒佢10成身家，先至俾佢後生30年，我估李四叔都會制，因為佢覺得佢後生30年重新來過，以佢的才能，千金散盡都可以復來。除非神仙話俾佢後生30年但註定佢要做乞兒，咁李四叔或者會唔制。
同枱有朋友個女，佢只得23歲，可能覺得我講得無厘頭，佢話邊有人1000億身家肯放棄架? 一定要keep住副身家啦。
大家吹吹吓我突然發現，我身旁坐咗老友的媽媽，伯母今年正好又是85歲，和李四叔同年，心諗自己講錯說話啦，攞李四叔呢啲嘢出來講，伯母又同齡，唔知犯唔犯忌。
點知伯母好大方，插口講到自己的經歷，話好明白李四叔點解咁講，話朋友個女係後生女，無經歷過就唔識世界啦。伯母話佢30幾歲時睇相，相士批佢過唔到60歲，伯母d當時心諗，「我而家30幾，60歲有排都未到啦，我唔怕，到時6個仔女，全部大晒，無牽無掛，除死無大害啦。」之後20幾年風平浪靜，到伯母近60歲時，開始好驚啦，好擔心個相士會估中，佢好怕真係會死。結局當然無事，伯母好大聲咁講出一個結論:「後生仔來日方長，唔知命貴呀!」
最近聽到一些數據，到60歲時10個人有一個有腦退化症，到85歲時更高達三個有一個有腦退化症，60歲? 10份之1?機率都唔係好低喎。結論係我們大多數人都比李四叔幸福，就要珍惜眼前所有，好好地生活啦，當千億富豪都唔夠我同你咁好景時，怕者我都應該開心好多啦。
陸羽仁
陸羽仁
** 博客文章文責自負,不代表本公司立場 **
股神巴菲特日前接受CNBC採訪，教投資者賺錢方法。其中一個建議係叫人唔好長線投資比特幣，因為比特幣唔能夠滿足貨幣的條件，所以唔係貨幣，只係短炒投機品，同當年瘋炒的鬱金香一樣，10年、20年之後就會消失。
比特幣係一種儲存於電腦內的電子虛擬貨幣，於2009年面世，剛問世時非常便宜，1美元買到30個，之後愈炒愈貴，不過真正進入狂炒時代，還是去年殺入了中國市場，受到一班「人多錢多」的中國大媽追捧才開始。去年的頭10個月，比特幣大部份時間仍係徘徊在不足100美元附近。之後短短兩個月，到11月底，比特幣已經炒至1240美元的歷史高位。不過阿爺好似唔想咁多大媽上當，一見比特幣在內地開始流行，馬上出手制止，人民銀行宣布唔承認比特幣係法定貨幣，之後又禁止網上平台用比特幣做交易。比特幣展開第一輪急插，在兩個星期之內大插至520美元，其後輾轉反彈企番定。阿爺呢一插，已經將比特幣泡沫刺穿了。
不過最傷的還是比特幣的交易系統出事，帶來第二輪急跌。2月24日，總部位於東京的比特幣最大交易平台Mt.Gox宣稱因為「系統有弱點」，發現有85萬個比特幣被偷去了，是次丟失的比特幣，相當于所有流通量的7%，總價約合4.7億美元。Mt.Gox在無法完成交收支付下，申請破產。所有在Mt.Gox交易平台上做交易的投資者，由於存在系統內的比特幣和現金都不能提取，即時變成一無所有，損失慘重。比特幣當日被洗倉，價格一度在一小時內由500美元跳水至110美元，雖然之後又彈番上去，但呢種波幅已嚇死人。日前，有美國用家正式入稟法院，控告Mt.Gox詐騙，但睇嚟只能夠得到個吉。
比特幣最近有反彈，最新報653美元，全日成交量也有超過2萬個，反映唔少投資者仍對比特幣的前景有憧憬。不過，我認為比特幣的泡沫已經爆破，比特幣於去年11月底創出的價格，其實已經去到泡沫頂峰。
首先係Mt.Gox出事之後，投資者對交易系統已經失去信心，而泡沫爆破，往往與造假或者交易系統崩盤有關。比特幣唔同傳統貨幣，傳統貨幣由國家發行，有國家做信用擔保人，交易平台係銀行，要搶國家錢、銀行錢，唔係咁容易。比特幣沒有信用擔保人，交易平台係網站，網站保安能力有限，被黑客入侵，頂唔順會執笠，客戶渣都冇。咁低安全度的工具，連炒都好難炒。
比特幣更核心的風險係美國的態度，比特幣之所以受到追捧，源於美國聯儲局天量印鈔，令到市場對美元失去信心，想搵可以抗衡美元的替代貨幣，比特幣就開始炒到癲。問題係比特幣萬一真係興旺到可以挑戰美元地位時，美國會袖手不理嗎？美國政府只要打聲招呼，都有一百個方法搞死呢種交易工具。強如歐元，推出時又話可以挑戰美元，結果都被人搞到死死地啦，比特幣無國家做後盾，想要挑戰美元地位？癡人說夢啫。
比特幣危機盡現，唔會有景，提醒大家不要沾手，有貨就要盡早沽啦，反彈都唔好理啦，怕你走唔切呀。
