買油股要稍等

油價低迷，兩大油股中海油（883）及中石油（857）公佈中期業績都唔掂，或者可以話是一如所料地唔掂。

中海油中期純利大蝕77.4億元人民幣；中石油中期雖然中期純利仍然有5.31億元，但已大跌了97.9%，這是兩家公司上市以來最差的中期業績。

兩家公司出少少財技，盡量維持派息頂住股價，中石油派0.02131元，等如去年同期的三分之一左右，中海油派0.012元，也等如去年同期一半。蝕錢及盈利大跌仍盡量維持派息，對股價有些支持。週四中石油股價跌0.95%，收5.22元；中海油跌幅差唔多，跌0.9% ，收報9.52元。

有朋友問我油股現在買不買得過？

首先，要分開中石油及中海油，中海油主要做上游業務，即開採石油，對油價反應比較敏感。至於中石油，上下游業務兼備，既開採石油也做成品油分銷，股價的波動相對中海油較很多。兩家公司盈利也反映了這個特色，油價跌，中海油蝕錢，而中石油仍然可以維持比較微薄的盈利。

油價一年圖

其次要看油價。睇油股近半年走勢，我覺得有幾點值得留意。第一，國際油價今年初跌至34美元低位，拖著兩隻油股向下走，也差不多同一時間見到低位，意味著如果未來油價再跌，兩隻股票亦會有機會回落。

油價與美元向來有反向關係，即美元升，油價跌。看美元走勢，雖然今年好大可能還會加息一次，但之後可能長期都不會加息，所以美元未必如想像中的強。估計油價仍然有回落的空間，會跌穿4月接近40美元的低位，但未必能夠跌破今年低位的34美元。如果在油價跌穿40美元，回落到38美元的時候，買油股，可能會找到低價吸納。

中石油一年圖

中海油一年圖

第二，中海油對油價比中石油相對敏感，所以在油價大跌時買中海油比中石油好。

第三，市場似乎對石油股的壞消息相對麻木，特別是中石油，今年低位4.16元，之後長期在大約5元浮沉，所以即使油價大跌，中石油股價亦未必會跌得太多。

綜合而言，我有這樣的看法，等油價跌、中海油跌得較多時較吸因為它對油價的反彈比較敏感，長期油價回升時向上空間大啲。可以等美國快加息或油價回到38美元才入。

總體而言，兩隻油股已經跌得比較低殘，但睇圖都知現價反彈了，等回吐時買好啲。

陸羽仁

** 博客文章文責自負,不代表本公司立場 **

一個20年老友打電話來，話有啲錢想投資，乜都貴，但黃金好似仲幾平，2011年前高位1920美元一安士，而家1349美元(佢明顯做過功課)，樣樣都創新高，佢距離高位仲有30%，邊度有得輸？

直到佢講最後一句「邊度有得輸?」之前，我都覺佢講得頭頭是道，但聽埋呢句我就覺得有啲問題。

我就話無嘢買落去一定唔輸，投資前第一個要諗的問題，唔係會贏幾多，而係會輸幾多，要預咗睇錯咗輸起上來，要自己受得起至好。

我自己都睇好黃金，認為可以等佢回吐時慢慢吸，到美國今年加一次息明朗化時，更大力啲吸，但要設想買完之後輸的情況：

第一，美元不斷走強。我經常覺得，主導黃金走勢主要是美元，而不是實金的使用需求，美元弱，黃金升，相反美元升，黃金跌。睇吓黃金同美元5年圖就知，兩者呈反向相關。未來睇好黃金，主要係睇淡美元長線升勢，認為美國即使12月再加一次息都有排加唔到，所以難阻黃金升勢。

黃金5年圖

美元指數5年圖

若美國只能有限加息的前題出錯，黃金就會不升反跌。所以若買咗金，或將會買金，要密切睇住美國經濟數據，要符合通脹上唔到、就業又唔會太強兩大條件，條件若大變，美國會連番加息，就要減倉。

第二，黃金無息變相有成本。黃金若相對無風險的港元存款，存定期只有0.5厘息，代價不太大。若然相對高息的房託，例如越秀房產基金(405)，差別就大。405現價4.94元，有6.3厘息，你等到佢回落到4.43元才買有7厘息。

若然長揸比較兩者，黃金無息收少了7厘一年，5年複式少了40.2%，即係話現價1349美元買金，5年後累升40.2%，到1888美元。這樣和買入在4.43元買入405，5年後佢股價唔升唔跌都係4.43元，但計及收息其實同揸金升4成一樣。這就是買無息東西的成本。即係話若然黃金唔係升咁多，買高息房託可能仲好。

結論唔係話黃金買唔過，只係想話俾大家聽買乜嘢都有風險。若想等回吐買金，可以黃金ETF，包括SPDR金ETF（2840）或價值黃金ETF（3081），這些基金價格則會緊貼金價走勢。