英鎊到7.8？ 急跌接刀有技巧

今期忍唔住都要再講係英鎊，上星期話最希望英鎊跌之9算， 可以低位入貨，後來見有啲大行講得仲誇， 話英鎊要同美元一對一的水平，即係兌港紙要跌到7.8， 聽落都幾得人驚。

上星期寫文的時候英鎊兌港元仲係9.6691，到周四英鎊收市再跌到9.4841港元，即係一個星期跌咗2. 2%，匯率跌2.2%已經好大件事，因為好多炒外匯孖展的人，只係放低5%按金，英鎊一跌差唔多跌咗一半按金，若然睇好英鎊買入，跌得急孖展按金唔夠，已經要枱錢去補倉。所以我話等英鎊跌到殘去買，主要講俾長線投資者聽，短炒者莫買當頭跌，反而應該係每逢見英鎊反彈就沽貨，食佢2、3 %就走。

英鎊1個月圖

既然英鎊短期走勢咁衰，點解我仲要叫大家留意呢？ 主要因為全球央行印錢太多，乜嘢都貴，如果想搵一啲平少少的東西去長線投資，唔係太多選擇，跌到阿媽都唔認得嘅英鎊，肯定係選擇之一。

買急跌之中的產品作長線投資， 第一樣要注意的事情是會否全面輸光，如果買一間公司股票佢最後執了笠，就會輸光，不過買英鎊作為一個國家的貨幣，就算超級地衰低位也不是零，問題是會跌到9算，還是跌到7.8算而矣。英國咁大個國家，英鎊兌港元萬一跌到7.8，會吸引好多去英國投資，英國出口亦會因為匯價優勢而大增，所以不會無底地一直跌下去。

買急跌之中的產品第二樣要注意的事情是入市價位，不要睇小9算和 7.8算的分別，兩者差距18%，以貨幣來計算，這已經是極大的差距。表面上睇入貨係愈低愈好，但結論當然不是最好等到7.8才買，因為7.8是一個超低的低位 ，出現的可能性亦較低，將買入的目標價定得太低，就有睇得太盡、買不到貨的風險。

若要我現在去估，估計英鎊跌到9算的機會，有70、80%，都好大機會出現，這已經是一個好低的水平。再跌深啲跌到8.4的機會又低啲(這是9和7.8中間的位置)，可能性降到50%左右 。再深跌到7.8算的機會率只有20、30%，不是不會出現，而是要有很多環境因素配合，例如英國和歐洲領袖都好唔理性，做出一些鬥氣行為，令市場好大擔心，觸發一些金融危機，才會跌到這些水平。當然這一切都是靠估，但總的來說，價位愈低，發生的機率愈低。

在資產價格急跌時去接貨，有如伸手去接跌下來的飛刀，拿捏不好，馬上會損手流血，有些人唔怕見血，有些人一見血就暈，人人心理質素不同，所以要按自己的心理質素，睇埋市場環境， 作較好的部署。

若然你是冒險派，等跌到9算的時候，已經可以比較大手入貨。若是穩陣派，不妨分三注入，等英鎊跌到9算入一注，跌到8.4入第二注，再跌到7.8入第三注，入齊貨平均價8.4，這種穩陣派入貨方式可能入不齊貨，因為若最後跌唔到7.8，可能只入到一兩注，但要承受的風險就低一點，感覺會良好一些。

陸羽仁

** 博客文章文責自負,不代表本公司立場 **

英國首相文翠珊上周日晚話明年3月啟動脫歐程序， 即時嚇到投資者狂沽英鎊，令鎊匯兌港元跌穿10算後江河日下，今早一度再急跌6.1%，跌至31年以來新低，兌港元見過9.2，其後急速反彈，英鎊早上9時報9.6691 港元。想買英鎊的朋友相當興奮，手揸英國資產者就腳軟軟， 怕英鎊無底深跌。

我反而覺得最近的形勢對英國利好，想揸英鎊或買英國樓的朋友， 應該期望英鎊快快手急跌，在明年3月時跌到9算，更是入貨良機。 利好在幾個地方:

第一，文翠珊選在明年3月開板機脫歐，剛好挑在德國5月大選之前 ，明顯地利用德國總理默克爾的弱勢， 爭取對英國最有利的脫歐條件。 英國講明不會用拖泥帶水的方式脫歐，即是不會用所謂「挪威模式」 ，脫歐後歐洲人員可以自由進出英國，換取貨物自由入口歐。 但英國是德國主要貿易黟伴，德國對英貿易有好大順差， 默克爾若對英國開出強硬貿易條款，自己都好傷。 所以談判上風在英國。

第二，英鎊大跌利好英國經濟。英國9月製造業活動以逾兩年來最快 速度增長，英鎊下跌，出口訂單大增提振了製造業活動。英國9月M arkit製造業採購經理人指數(PMI)升至2014年6月以 來最高，從8月的53.4升至55.4，繼續從脫歐後7月觸及的 3年低位反彈。已升穿去年9月的近年高位，直撲2013年高位5 7.5。

第三，股市創高信心向好。與英鎊滙創新低同步，英國富時100指 數卻創新高。英國股市今年以來累升13.3%，英鎊兌美元則累跌 13.6%，二者互相抵銷。股市大升利好本地消費心理。 睇埋債市亦好，英國10年期債息5月底脫歐前的高點是1.45厘 ，公投脫歐後跌至8月中的低點0.5厘，最新0.78厘， 息跌價升，債價比5月升了不少， 意味鎊匯大跌但資金並沒有沽債沽股大幅流出英國。

結論係脫歐並未對英國經濟構成致命影響，資金確會流走， 但並不災難性，更良性的是鎊匯愈跌，英國實體經濟愈好， 出現歐盟國家可遇而不可求的實體經濟回升。 加上英國未來不用再為難民和救助歐洲銀行埋單，更利好當地財政。

若是長線投資者，而不是短線投機者，購買一地資產， 最怕它無底下跌。英國如今是匯價跌經濟好， 捱埋脫歐方案落實的一擊，一減一加之下，長線未必對英國GDP有 很大影響，但鎊匯大跌令東西便宜了，鎊價不似無底下跌， 就是買貨的機會。

若想買英鎊或買英國樓，短線仍有下跌壓力，不要一舖入市， 分段入為宜。一睇價位，英鎊兌港元跌到9算左右支持較大， 二睇時間，明年3月展開脫歐談判前後，匯價壓力較大。 我都幾期望見到鎊價見9算，那時可以較大手入貨，買入後睇3年， 希望英鎊可以上番11元的水平。