陸羽仁成日唔停口講儲蓄，有一個最損害儲蓄的行動，一定要講講：借錢俾人。以我所知，呢家嘢女人唔係幾興，男人唔少人做，懶係有義氣咁樣，其實係極度愚蠢的行為，陸羽仁過去做唔少，40歲之後戒咗，不妨講幾個自己親身經歷的事例，俾大家聽聽。
事例一：借錢俾人包二奶。話說有個做公司中層的朋友，話自己近期唔係好掂，開口同我借4萬，我(過去)係那種為朋友乜都得的人，同佢雖然唔熟，但係無乜諗就借咗俾佢，一來佢係高收入人士，根本無想像佢會唔還，二來覺得唔係大數目，問長問短好似好衰咁(你睇我蠢成點)，只係講咗兩句:「以後唔好咁大使」，「有錢記得還俾我」，就寫咗張支票俾佢。
哈，呢個朋友叫做中層，月入當然有幾萬，但借完去如黃鶴，一去不回頭，沒有還錢，偶然見到我當無件事。我後來聽人講，就係我借錢俾佢差唔多時候，佢包咗二奶，後來連仔都生埋。到今天我估個仔都十幾歲囉。我以為佢有乜嘢事情咁手緊，原來包二奶?! 後來當然係有錢包二奶，無錢還我呢區區4萬元債啦。
我無追呢筆債，我用呢筆債來提醒自己，以後唔好咁戇居胡亂借錢俾人啦。
事例二：無情情做生意。如果上一個朋友係個樣都古古惑惑，咁呢個朋友就啱啱相反，個樣老老實實，即係擔屎唔偷食那一種(其實擔屎有無人偷食架?)佢有一排話屋企有事，四圍問同事朋友借錢，佢係老實到無人會懷疑佢講大話那種人，好多人借咗錢俾佢，我無借(因為上便那個教訓)。
後來聽人講，所謂屋企有事，原來係佢識咗一個女朋友，佢係50歲都無結婚那種人，入世未深，從未試過有一個女人對佢咁好，佢當咗人係佢屋企人一樣(咁都得?)後來呢個女人話自己生意出咗啲問題，叫朋友幫吓手，入埋股咁話，朋友不單用晒自己積蓄去幫，唔夠仲四圍同人借，結果欠落成街債。唉，真相係點，好易估啫，個女人對佢咁好，九成九係一個局啦。
事例三：有時唔係借錢，係叫你俾錢佢幫你投資，結局都一樣。我大學剛畢業，有同學去咗金融機構做外匯，四圍要搵客，我見佢搵唔到客咁慘，就俾咗5萬銀佢代我炒，其實當時都心知一個剛畢業的同學，炒匯炒得幾叻，但係亦都係那種幫人心態，亦唔估會輸咁多，就俾佢代我開戶炒。結果「你懂的」，唔使半年輸清光，真係輸到一毫子都無那一種。
仲有仲有，也是剛畢業的時候，朋友的老婆做咗保險經紀，叫我幫佢開單，我的第一張保險單就係咁開的。近30年過去，朋友老婆老早轉咗行，張保險單固然變咗孤兒單無人理啦，朋友老婆後來發咗大達，我估佢而家有10、20億身家，當然唔識得我啦，過年都無發個短訊來問候。幫人開單，你老襯啫。
助人不是望報，但上述的事件，除了那個保險經紀之外，其餘根本幫唔到借錢人，借俾人包二奶做咗幫兇，借錢俾人俾女友「做生意」，只是送錢俾佢被人騙，俾朋友炒匯我輸咗佢亦無埋份工，有乜得著呢? 呢啲錢若當然夾埋做首期，當時都買到間樓啦(當時只是一成首期)，當年10萬買間樓，今天值500、600萬啦。
所以我今天會捐錢俾慈善機構，絕不借錢俾人，希望看了此文章的人，特別是年青人，引以為戒，莫走上我相同的蠢路，搵錢唔易呀!
陸羽仁
** 博客文章文責自負,不代表本公司立場 **
今天中午和一個專業的靚太食飯，她和先生都是高職厚薪人士，講起未來退休生活時，佢提到一個「唔夠可以靠阿仔」的意見，我叫佢千祈唔好咁諗。靚太有兩位公子，全部是高材生，預計未來都可找到好工作，按我見他們兒時的印象，都是聰明聽話的乖孩子，但我仍然勸靚太不要有靠個仔的思想(雖然我估她其實無此需要)。
我上期寫到送仔女出國讀書是極昻貴的「消費」。有不少人不同意我的看法，除了覺得我太市儈，對仔女教育不應以金錢衡量之外，亦有不少人有「養兒防老」的心態，覺得送仔女出國讀書，將來他們讀好書搵到好工，會回報於父母。真的嗎?
我知道的一個個案，就是反面例子。父母是政府的初級職員，兒子中一的時候就送他去英國讀書，不知父母是因為公務員子女去英國讀書有津貼，還是覺得英國教育好好多(其實我都覺得英國教育比香港好一點，但付50萬一年去讀是否負擔得來，就要看自己的情況)，總之那時兒子根本不想出國，是父母逼他去。
但父母收入有限，供得兩三年父母已耗盡積蓄，唯有將自住樓拿去銀行盡量加按，再拿200萬出來支持兒子讀書。後來兒子讀到中七，英國高考成績不俗，同時報英國大學和香港大學，結果港大收了他讀商科，但英國也有大學收他，父母唔係太頂得順英國高昻的學費，想兒子讀港大，但兒子卻想在英國讀書，理由只是「我啲friends全部在英國讀大學喎!」為此父母暗中流淚，但兒子一意孤行，父母要借突供兒子在英國完成學業(今年畢業)，我恐怕兒子將來會留在英國做事，根本不會返香港。這對父母想要兒子回報他們，起碼幫手供按揭，但兒子是鬼佬思維，no way!
我認為這個慘局全是父母造成，當日兒子年紀少自己不願出國，為什麼要逼他去? 逼了他去他在那裡生了根，又怎能逼他回來唸大學? 兒子知不知道父母按樓按到突去供他讀書? 就我所知，父母一句沒有提，只說「總唔知想你返來讀大學」，他又怎會回來?
講番靚太那一筆，我話女兒顧家機會大少少，男孩多數不顧家。那麼他兩個兒子將來娶了老婆，老婆一句不同意他去養老豆老母，你話個仔聽邊個話。
我的媽媽對我影響很大。我自細她就對我講:「你唔讀書聽乞米」、「你大個唔好旨意我俾錢你買樓你要靠自己」、「我老咗唔使你養我，你搞掂自己就得啦」。我長大後才知道，她想培養我自立自強的性格，叫我長大後不要靠屋企，她也不會靠我。我想所有父母也應如此，否則仔女不會有獨立的搵食能力喎。
巴士的退休資金計算機：
http://bastillepost.com/hongkong/Calculator
